(កំពត)៖ ឧបនាយករដ្ឋមន្ដ្រី ទៀ បាញ់ រដ្ឋមន្ដ្រីក្រសួងការពារជាតិ តំណាងសម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា នៅព្រឹកថ្ងៃទី១៧ ខែឧសភា ឆ្នាំ២០១៧នេះ អញ្ជើញដាក់សម្ភោធឲ្យប្រើប្រាស់ជាផ្លូវការ មណ្ឌលសុខភាពមរតកសម្តេចតេជោ សម្តេចកិត្តិព្រឹទ្ធបណ្ឌិតប៊ុនរ៉ានី ជុំគិរី ស្ថិតក្នុងភូមិត្រពាំងវែង ឃុំត្រពាំងរាំង ស្រុកជុំគិរី ខេត្តកំពត។
ពិធីនេះក៏មានការចូលរួមពីស្ថាប័នពាក់ព័ន្ធមន្ត្រីរាជការ កងកម្លាំងប្រដាប់អាវុធ លោកគ្រូអ្នកគ្រូ សិស្សានុសិស្ស និងប្រជាពលរដ្ឋប្រមាណ១,២០០នាក់។
សូមជម្រាបថា មណ្ឌលសុខភាពដែលមានតម្លៃប្រមាណជិត២៤ម៉ឺនដុល្លារនេះ គឺជាអំណោយរបស់សម្តេចតេជោ ហ៊ុនសែន និងសម្តេចកិត្តិព្រឹទ្ធបណ្ឌិត តាមរយៈកងពលតូចថ្មើរជើងលេខ៧០ ក្នុងការបំរើសេវាព្យាបាលជូនដល់ប្រជាពលរដ្ឋទូទៅ ដោយមិនប្រកាន់សាសនា និន្នាការនយោបាយនោះឡើយ។
មណ្ឌលសុខភាពនេះ មាន៤ខ្នង បំពាក់សម្ភារៈរួចរាល់ និងបានដំណើរការសាកល្បងព្យាបាលជំងឺ ព្រមទាំងផលិតទឹកសុទ្ធ ជូនប្រជាពលរដ្ឋដែលមិនយកកម្រៃ តាំងពីថ្ងៃទី១២ ខែធ្នូ ឆ្នាំ២០១៦មកម្ល៉េះ។
ក្រោយបញ្ចប់កម្មវិធី ឧបនាយករដ្ឋមន្ត្រី ទៀ បាញ់ ក៏មានអំណោយ និងថវិការបស់សម្តេចតេជោ និងសម្តេចកិត្តិព្រឹទ្ធបណ្ឌិត ចែកជូនប្រជាពលរដ្ឋ និងលោកតាជី លោកយាយជី និងថវិកាជូនដល់លោកគ្រូ អ្នកគ្រូ សិស្សានុសិស្ស មន្ត្រីរាជការតាមស្រុក និងកម្លាំងប្រដាប់អាវុធផងដែរ៕
