(សៀមរាប)៖ បន្ទាប់ពីចំណាយពេលជិត១ឆ្នាំ និងទឹកប្រាក់ជាងរាប់ម៉ឺនដុល្លារ ឥឡូវនេះ រោងភាពយន្ត «បារាយណ៍អណ្តែត» ខេត្តសៀមរាប បានបើកដំណើរការឡើងវិញ ជាមួយសោភណភាព និងបច្ចេកទេសតាមស្តង់ដារទំនើប។ រោងភាពយន្តនេះ ចាប់ផ្តើមប្រើម៉ាស៊ីនបញ្ចាំង DCP (Digital Cinema Package) ក្នុងការបញ្ចាំងតាំងពីពាក់កណ្តាល ខែមេសាមក។
កាលពីពេលថ្មីៗកន្លងទៅនេះ រឿង«អាមោកលក់ម៉ាំ» ជាខែ្សភាពយន្តខ្មែរដំបូងដែល រោងភាពយន្ត «បារាយណ៍អណ្តែត» ចាក់បញ្ចាំងពិសេស ដោយសហការជាមួយក្រុមហ៊ុន ចែកចាយភាពយន្តខ្មែរ «ពូព្រហ្ម» និងប្រើប្រព័ន្ធទំនើបថ្មីរបស់ខ្លួន ដើម្បីបង្ហាញទំនើបកម្មរបស់ខ្លួន។ ក្នុងនោះ យើងឃើញមានការចូលរួម ពីសំណាក់ភ្ញៀវកិត្តិយសជាច្រើនរូប មកពីបណ្តាក្រុមហ៊ុនទេសចរណ៍ សណ្ឋាគារ ភោជនីយដ្ឋានពេញនិយម និងយុវជនមានឥទ្ធិពលមួយចំនួន នៅក្រុងសៀមរាប។
ភ្ញៀវភាគច្រើន ដែលបានទស្សនាហើយ បញ្ចេញយោបល់ថា រឿង«អាមោកលក់ម៉ាំ» មានលក្ខណៈកំប្លែង និងចង់តាមដាន រហូតចប់។ រោងភាពយន្ត«បារាយណ៍អណ្តែត» ជាមួយ សោភណភាព និងស្តង់ដារថ្មី គឺអាចទទួលយកបាន ហើយសេវាកម្មល្អគាប់ចិត្ត។
គួរបញ្ជាក់ថា រឿង«អាមោកលក់ម៉ាំ» ជាប្រភេទរឿងកំប្លែង លាយឡំនឹងមនោសញ្ចេតនា នឹងចាក់បញ្ចាំងនៅគ្រប់រោងភាពយន្តទំនើបៗ រួមទាំង រោងភាពយន្ត «បារាយណ៍អណ្តែត»ផងដែរ ចាប់ពីថ្ងៃទី ១៨ ឧសភា ២០១៧នេះតទៅ។ នេះជាវណ្ណកម្មថ្មីរបស់ផលិតកម្ម «មហាហង្ស» ក្រោមការចែកចាយរបស់ ក្រុមហ៊ុន«ពូព្រហ្ម»។
សូមជំរាបថា ពូព្រហ្ម អ៊ិនធើធេនម៉ិន (PuPrum Entertainment) ជាក្រុមហ៊ុនរួមសម្ព័ន្ធរវាង ក្រុមហ៊ុន ចែកចាយភាពយន្តធំៗ២ គឺ SABAY DIGITAL CORPORATION និង WESTEC MEDIA LIMITED។ ក្រុមហ៊ុនមានភារៈ ចែកចាយភាពយន្តដែលផលិតនៅកម្ពុជា និងជាក្រុមហ៊ុន ដែលផ្តល់អជ្ញាប័ណ្ណភាពយន្ត និងផ្តល់ខ្លឹមសាររឿងឈានមនុខគេ នៅប្រទេសកម្ពុជា។ ពូព្រហ្ម អ៊ិនធើធេនម៉ិន បានដាក់ខ្លួនជាក្រុមហ៊ុនចែកចាយជាតិ និងអន្តរជាតិ ដែលជំនាញ ខាងភាពយន្តខ្នាតវែងប្រកបដោយគុណភាព មកពីប្រទេសកម្ពុជា។
តាមរយៈបណ្តាញដៃគូ ចែកចាយ និងផ្សព្វផ្សាយទូលំទូលាយ ពូព្រហ្ម អ៊ិនធើធេនម៉ិន ចាត់ចែងសិទ្ធិដូចតទៅ៖ ចាក់ក្នុងរោងកម្សាន្ត តាមផ្ទះ ទូរទស្សន៍ និងវីឌីអូតាមតម្រូវការ។ ស្នាដៃកន្លងមករបស់ពូព្រហ្ម អ៊ិនធើធេនម៉ិន រួមមានភាពយន្តខ្មែរល្បីៗ និងជោគជ័យមួយចំនួន ដែលមានសក្តានុពលក្នុងតំបន់ និងលើឆាកអន្តរជាតិ៕
