(ភ្នំពេញ)៖ ការប្រកួតកីឡាបាល់ទះពានរង្វាន់ LEO Cup International Volleyball 2017 នៅថ្ងៃទី១២ ខែឧសភា ឆ្នាំ២០១៧នេះ ក្រុមជើងខ្លាំងបាល់ទះវីសាខា បានឈានជើងចូលវគ្គផ្តាច់ព្រ័ត្រ បន្ទាប់ពីក្រុមនេះ បានយកឈ្នះលើក្រុមបាល់ទះ Vinh Long (វៀតណាម) ដោយលទ្ធផល៣ទល់១ ២២-២៥, ២៥-១៧ ,២៥-១៨ និង២៥-២០ នៅវគ្គពាក់កណ្តាលផ្តាច់ព្រ័ត្រ ដែលការប្រកួតនៅក្នុងវិមាននៃពហុកីឡាដ្ឋានជាតិ ក្រោមការសហការរវាងប្រធានសហព័ន្ធ កីឡាបាល់ទះកម្ពុជា និងក្រុមហ៊ុនស្រាប្រៀរ LEO។
សម្រាប់មួយប្រកួតទៀត គឺក្រុមបាល់ទះកងពលធំអន្តរាគមន៍លេខ៣ បានយកឈ្នះលើក្រុមបាល់ទះខេត្តកំពង់ចាម ក្នុងបច្ចេកទេសលទ្ធផល៣ទល់០ ២៥-១៨,២៦-២៤ និង២៥-១៩ នៅវគ្គពាក់កណ្តាលផ្តាច់ព្រ័ត្រដូចគ្នា។ ដូច្នេះក្រុមបាល់ទះវីសាខា និងក្រុមបាល់ទះកងពលធំអន្តរាគមន៍លេខ៣ ត្រូវប៉ះនៅផ្តាច់ព្រ័ត្រ ដើម្បីដណ្តើមតំណែងគ្រងម្ចាស់ពានរង្វាន់ LEO Cup International Volleyball 2017 ចំពោះក្រុមបាល់ទះ Vinh Long (វៀតណាម) ជួបក្រុមបាល់ទះខេត្តកំពង់ចាម ដណ្តើមយកលេខ៣ និងលេខ៤។
ការប្រកួតនេះមានចៅក្រម អន្តរជាតិមកពីម៉ាឡេស៊ី ចំនួន២រូប និងមកពីប្រទេសហ្វីលីពីន ១រូប សម្រាប់ក្រុម ដែលដណ្ដើមបានជើងឯកបានទទួលពានជើងឯក១និង ថវិកា១០.០០០ដុល្លារ ជើងឯករង បាន៤.០០០ ដុល្លារ លេខ៣បាន ២.០០០ដុល្លារ និង លេខ៤បានរង្វាន់លួងចិត្ត១.០០០ដុល្លារ។
ការប្រកួតចែកចេញជា២ពូលដោយមួយពូលៗមាន៤ក្រុម ចំពោះពូល «A» មានក្រុមបាល់ទះ Sunway (ឡាវ) ក្រុមបាល់ទះកងពលធំអន្តរាគមន៍លេខ៣ ក្រុមបាល់ទះវិសាខា និងក្រុមបាល់ទះមហាផ្ទៃ ហើយពូល «B» មានក្រុមបាល់ទះ Kasetsart (ថៃ) ក្រុមបាល់ទះ Vinh Long (វៀតណាម) ក្រុមបាល់ទះខេត្តកំពង់ចាម និងក្រុមបាល់ទះកងពលតូចអន្តរាគមន៍លេខ៩៕
