(ភ្នំពេញ)៖ ​ការ​ប្រកួតកីឡាបាល់ទះ ពានរង្វាន់ LEO Cup International Volleyball 2017 នៅថ្ងៃទី៨ ខែឧសភា ឆ្នាំ ២០១៧នេះ ក្រុមជើងខ្លាំងក្រុមបាល់ទះវិសាខា បានកក់កៅអីវគ្គពាក់កណ្តាលផ្តាច់ព្រ័ត្រមុនគេ បន្ទាប់ពីក្រុមនេះបានយកឈ្នះលើក្រុមបាល់ទះ Sunway (ឡាវ) ដោយលទ្ធផល៣ទល់០ ២៥-១៥, ២៥-១៩ និង២៥-១៨ ពូល «A» ដែលការប្រកួតនៅក្នុងវិមាន នៃពហុកីឡាដ្ឋានជាតិ ក្រោមការសហការ រវាងប្រធានសហព័ន្ធ កីឡាបាល់ទះកម្ពុជា និងក្រុមហ៊ុនស្រាប្រៀរ LEO ។

សម្រាប់មួយប្រកួតទៀតនៅពូល «A»ដដែល ក្រុមបាល់ទះក្រសួងមហាផ្ទៃបានចាញ់ ក្រុមបាល់ទះកងពលធំអន្តរាគមន៍លេខ៣ ដោយលទ្ធផល០ទល់៣ គឺ២៣-២៥, ១៩-២៥ និង២៣-២៥ ចំណែកពូល «B» ក្រុមបាល់ទះខេត្តកំពង់ចាម យកឈ្នះលើចាញ់ក្រុមបាល់ទះ​កងពលតូចអន្តរាគមន៍លេខ ៩ លទ្ធផល៣ទល់០ ២៥-២២,២៥-១៦ និង២៥-១៧។

​ការប្រកួតនេះមានចៅក្រម អន្តរជាតិមកពីម៉ាឡេស៊ី ចំនួន២រូប និងមកពីប្រទេសហ្វីលីពីន ១​រូប ​សម្រាប់ក្រុម ដែលដណ្ដើមបានជើងឯកបានទទួលពានជើងឯក​១​និង ថវិកា​១០.០០០ដុល្លារ ជើងឯករង បាន៤.០០០ ដុល្លារ លេខ​៣បាន ២.០០០ដុល្លារ និង លេខ៤បានរង្វាន់លួងចិត្ត១.០០០ដុល្លារ​។

ការប្រកួតចែកចេញជា២ពូលដោយមួយពូលៗមាន៤ក្រុម ចំពោះពូល ​«A» មានក្រុមបាល់ទះ Sunway (ឡាវ) ក្រុមបាល់ទះកងពលធំអន្តរាគមន៍លេខ៣ ក្រុមបាល់ទះវិសាខា និងក្រុមបាល់ទះមហាផ្ទៃ ហើយពូល «B» មានក្រុមបាល់ទះ Kasetsart (ថៃ) ក្រុមបាល់ទះ Vinh Long (វៀតណាម) ក្រុមបាល់ទះខេត្តកំពង់ចាម និងក្រុមបាល់ទះកងពលតូចអន្តរាគមន៍លេខ៩៕