(ព្រះសីហនុ)៖ ដើម្បីពង្រឹងកម្លាំងគណៈចលនាសាសនិកស្លាម CPP ក្នុងការគៀងគរកម្លាំង ពីមហាជនឲ្យគាំទ្រក្នុងការបោះឆ្នោត ជូនគណបក្សប្រជាជនកម្ពុជា ក្នុងការបោះឆ្នោតក្រុមប្រឹក្សា ឃុំសង្កាត់ ដែលនៅសល់ជាងកន្លះខែទៀតនោះ លោក អូស្មាន ហាស្សាន់ សមាជិកគណៈកម្មាធិការកណ្តាល និងជាប្រធានគណៈចលនាសាសនិកឥស្លាមCPP បានបញ្ជាក់ថា ​លេខរៀងរបស់CPP ខុសគ្នានៅឃុំ សង្កាត់និមួយៗ ក្នុងការបោះឆ្នោតក្រុមប្រឹក្សា ឃុំ-សង្កាត់ តែកុំភ្លេចថា ស្លាកសញ្ញាដែលមានរូបទេវតាបាចផ្កា នៅតែជាសញ្ញារបស់គណបក្សប្រជាជនកម្ពុជា​។

ថ្លែងបែបនេះ ត្រូវបានធ្វើឡើងនៅសៀលថ្ងៃទី១៥ ខែឧសភា ឆ្នាំ២០១៧ ក្នុងឱកាសដែលលោក ​សំណេះសំណាលប្រកាសទទួលស្គាល់ថ្នាក់ដឹកនាំ សមាជិក សមាជិក គណៈចលនាសាសនិកឥស្លាម ខេត្តព្រះសីហនុ នៅទីតាំងវិហារឥស្លាមភូមិបន្ទាយព្រៃ ស្រុកព្រៃនប់ ខេត្តព្រះសីហនុ ដែលមានការចូលរួមជាសហអធិបតី ដោយលោក ជាម ហ៊ីម សមាជិកគណៈកម្មាធិការកណ្តាល និងជាប្រធានគណៈកម្មាធិការ CPP ខេត្តព្រះសីហនុ និងសមាជិក៣៣០នាក់។

លោក អូស្មាន ហាស្សាន់ ក៏បានជម្រាបដល់ថ្នាក់ដឹកនាំ សមាជិក សមាជិកា និង​សកម្មជន គណៈចលនាសាសនិកឥស្លាម CPP ទូទាំងខេត្តព្រះសីហនុ ឲ្យជួយរំលឹកមហាជនទូទៅ ស្តីពីកាលបរិច្ឆេទកំណត់ នៃការបោះឆ្នោតក្រុមប្រឹក្សាឃុំ-សង្កាត់ នឹងត្រូវប្រព្រឹត្តទៅនៅថ្ងៃទី០៤ ខែមិថុនា ឆ្នាំ២០១៧ និយាយរួមនៅសល់តែ២០ថ្ងៃទៀតប៉ុណ្ណោះ។ ដូ​ច្នេះត្រូវតឿនរំលឹកពលរដ្ឋឲ្យបានជ្រាប និងត្រៀមខ្លួនសម្រាប់ថ្ងៃនោះ បើមាន គម្រោងណាមួយនៅថ្ងៃនោះ ចាំបាច់ត្រូវរំសាយ និង​លើកពេលធ្វើយ៉ាងណាឲ្យខ្លួនបានទៅបំពេញតួនាទីជាពលរដ្ឋ ដើម្បីបោះឆ្នោតជ្រើសរើសមេដឹកនាំ ក្រុមប្រឹក្សាឃុំ-សង្កាត់ ព្រោះក្រុមប្រឹក្សា គឺជាអង្គបោះឆ្នោត ដែល​ឈានដល់ការបោះឆ្នោត​ក្រុមប្រឹក្សាខេត្ត-ក្រុង នឹងបោះឆ្នោតព្រឹទ្ធសភា។

នៅចំពោះមុខសកម្មជន សមាជិក សមាជិការ គណៈចលនាសាសនិកឥស្លាម CPP ខេត្តព្រះសីហនុ លោក អូស្មាន ហាស្សាន់ បានសម្តែងសុទិដ្ឋិនិយម ចំពោះលទ្ធផលបោះឆ្នោតសភាអាណត្តិទី៥ ដែលសាសនិកឥស្លាមទូទាំងប្រទេស សម្រេចបានសម្លេងគាំទ្រគណបក្សប្រជាជន យ៉ាងច្រើនលើសលប់ជាប់លំដាប់ថ្នាក់លេខ១ ទូទាំងប្រទេស ចំណែកសម្លេងឆ្នោត CPP ពីសាសនិកឥស្លាមទូទាំងខេត្តព្រះសីហនុ ក៏ទទួលបានសម្លេងយ៉ាងច្រើន គិតជាមធ្យមទូទាំងប្រទេស គឺជាប់៧៤ភាគរយ ដែលជាប់លំដាប់ថ្នាក់លេខ៨ បើប្រៀបនឹងខេត្តផ្សេងៗ ទូទាំងប្រទេសដែលមានសម្លេងខ្មែរឥស្លាម បោះឆ្នោតគាំទ្រគណបក្សប្រជាជនកម្ពុជា៕