(ព្រៃវែង)៖ នៅរសៀលថ្ងៃទី១៥ ខែឧសភា ឆ្នាំ២០១៧នេះ លោកទេសរដ្ឋមន្ដ្រី ញឹម វណ្ណដា ទទួលបន្ទុកអនុប្រធានប្រចាំការ និងជាប្រធានគណៈកម្មាធិការប្រតិបត្តិ នៃគណៈកម្មាធិការជាតិគ្រប់គ្រងគ្រោះមហន្តរាយ បានចាត់តាំងលោក ឡាំ ហេងហួត អគ្គលេខាធិការ នៃគណៈកម្មាធិការគ្រប់គ្រងគ្រោះមហន្តរាយ នាំយកគ្រឿងឧបភោគ បរិភោគមួយចំនួន ជូនដល់គណៈកម្មាធិការគ្រប់គ្រងគ្រោះមហន្តរាយខេត្តព្រៃវែង ដើម្បីជួយដល់គ្រួសារដែលរងគ្រោះក្នុងខេត្ត។
លោក ឡុង ថាត អភិបាលរងខេត្តព្រៃវែង បានថ្លែងអំណគុណយ៉ាងជ្រាលជ្រៅ ចំពោះសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់ជួយដល់ប្រជាពលរដ្ឋ ដែលរងគ្រោះដោយគ្រោះធម្មជាតិ ទីណាមានបងប្អូនមានទុកលំបាកទីនោះ មានសម្តេចទាំងទ្វេរ នៅជាមួយបងប្អូនជានិច្ច។
អំណោយគ្រឿងឧបភោគ បរិភោគរួមមាន៖ អង្ករ និងមី សម្រាប់ជួយដល់គ្រួសាររងគ្រោះចំនួន៣០០គ្រួសារ៕
