(កំពត)៖ ថ្នាក់ដឹកនាំជាន់ខ្ពស់ គណបក្សសង្គ្រោះជាតិ ប្រចាំខេត្តកំពត បានដឹកនាំសមាជិកសរុប១៥នាក់ ដើរចេញពី​បក្ស ដោយមកសុំរួមរស់ជីវភាព នយោបាយ ជាមួយគណបក្សប្រជាជនកម្ពុជា ដែលជាបក្សកំពុងកាន់អំណាច និងមានចរឹកចាស់ទុំខាងផ្នែកនយោបាយផងដែរ។ ថ្នាក់ដឹកនាំ និងសមាជិកសំខាន់ៗ ដែល​ចាកចេញនោះបានអះអាង គណបក្សសង្គ្រោះជាតិ មានបក្ខពួកនិយម ពុករលួយ និងបានតែសន្យា ប៉ុន្ដែមិនបានសម្រេចលទ្ធផលអ្វីនោះទេ។

ថ្នាក់ដឹកនាំ និងសមាជិកដែលបានចាកចេញនោះ ត្រូវបានទទួលដោយភាពកក់ក្ដីពីសំណាក់លោក ​វ៉ាន សំអឿន ទីប្រឹក្សាផ្ទាល់សម្តេច​តេជោ ហ៊ុន សែន នាយករដ្ឋមន្រ្តីនៃ​កម្ពុជា និងជាអតីតតំណាងរាស្រ្តមណ្ឌលកំពត គណបក្សសង្គ្រោះជាតិនៅថ្ងៃទី​១៤ ខែ​ឧសភា ឆ្នាំ​២០១៧ នៅភូមិ​ច្រកកែស ឃុំដងទង់ ស្រុកដងទង់ ខេត្តកំពត។

លោក វ៉ាន សំអឿន បានបញ្ជាក់ថា ថ្នាក់ដឹកនាំ និងសមាជិកសំខាន់ៗ CNRP ទាំង១៥នាក់នោះ រួមមាន៖ លោកក្រុមប្រឹក្សាខេត្ត២រូប, លោកក្រុម​ប្រឹក្សាស្រុក២រូប, ក្រុមប្រឹក្សាឃុំ១រូប និងសមាជិកចំនួន១០រូបផ្សេងទៀត ដែលបានមកចូលរួមជាមួយ គណបក្សប្រជាជនកម្ពុជា។ ពួកគាត់បានខិតខំធ្វើការទំនាក់ទំនងជាមួយបងប្អូនខ្លះ ដែលគាំទ្រគណបក្សសង្រ្គោះជាតិ ហើយមានបំណងចង់មករួមរស់ជាមួយគណបក្សប្រជាជនកម្ពុជា ជាបន្តបន្ទាប់ទៀត។

​ទីប្រឹក្សានាយករដ្ឋមន្ដ្រីរូបនេះ បានលើកឡើងថា សង្គ្រាមនាំមកនូវក្តីវិនាស មហន្តរាយ ខូចខាតទ្រព្យសម្បត្តិរដ្ឋ និងឯកជន រងរបួស ពិការ ស្លាប់បែកបាក់គ្រួសារ គ្មានសេដ្ឋកិច្ច គ្មានសេរីភាព គ្មានសេចក្តីសុខ គ្មានសុភមង្គល ហេតុដូច្នេះសូម បងប្អូនសម្រេចចិត្តឲ្យបានច្បាស់លាស់ថា តើបក្សណាដែល នាំយកសុខសន្តិភាព កសាងប្រទេសឲ្យមានការរីកចម្រើនដូចសព្វថ្ងៃ ហើយបក្សណាដែលតែងតែរួមសុខទុក្ខ និងជួយដោះស្រោយរាល់ការលំបាក ដែលប្រជាជនជួបប្រទេះនោះ គឺមានតែគណបក្សប្រជាជនកម្ពុជា ដឹកនាំដោយសម្តេចតេជោតែមួយគត់។

បន្ថែមពីនេះ លោករំលឹកថា ​សូមបងប្អូនកុំជឿការឃោសនាបោកប្រាស់ សន្យាខ្យល់ គ្មានការពិត របស់គណបក្សសង្រ្គោះជាតិ ឲ្យសោះ បើសិនជាគ្មានគណបក្សប្រជាជនដឹកនាំ ដោយសម្តេចតេជោ នាយករដ្ឋមន្រ្តីដឹកនាំ រំដោះប្រទេសជាតិពីរបបឃោឃៅ ប៉ុល ពត ទេក៏គ្មានសន្តិភាព និងការរីកចម្រើនមានអ្វីៗគ្រប់យ៉ាងដូចសព្វថ្ងៃ​ដែរ ហើយក៏គ្មានគណបក្សសង្រ្គោះ និងតំណាងរាស្រ្តមកឈរជាបេក្ខជន​បោះឆ្នោតនៅពេលបច្ចុប្បន្ននេះដែរ​៕