(ប៉េកាំង)៖ នៅរាត្រីថ្ងៃទី១៤ ឧសភា សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានអញ្ជើញចូលរួមពិធីលាងសាយភោជន៍ ជាមួយបណ្តាមេដឹកនាំ និងប្រមុខរដ្ឋាភិបាល ជាច្រើនរូបទៀត ដែលរៀបចំដោយ លោកប្រធានាធិបតីចិន ស៊ី ជិនពីង នៅមហាវិមានប្រជាជនចិន។

ថ្លែងសុន្ទរកថាទៅកាន់បណ្តាមេដឹកនាំទាំងអស់ ដែលមានវត្តមានអញ្ជើញចូលរួម វេទិកាខ្សែក្រវ៉ាត់និងផ្លូវសម្រាប់កិច្ចសហប្រតិបត្តិការអន្តរជាតិ លោកប្រធានាធិបតីចិន ស៊ី ជិនពីង បានមានប្រសាសន៍ស្វាគមន៍ដោយស្មោះ ចំពោះបណ្តាប្រមុខរដ្ឋ ប្រមុខរដ្ឋាភិបាល និងគណៈប្រតិភូនៃបណ្តាប្រទេសក្នុងទ្វីបអាស៊ី អឺរ៉ុប និងអាហ្រ្វិក ដែលបានចំណាយពេលវេលា ដ៏មានតម្លៃបំផុត អញ្ជើញចូលរួមវេទិកាខ្សែក្រវ៉ាត់ និងផ្លូវសម្រាប់កិច្ចសហប្រតិបត្តិការអន្តរជាតិ នៅទីក្រុងប៉េកាំង ប្រទេសចិន។

វត្តមានបណ្តាមេដឹកនាំទាំងអស់ គឺបានបង្ហាញពីការយកចិត្តទុកដាក់ខ្ពស់ក្នុងការផ្លាស់ប្តូរទស្សនះគ្នាទៅវិញទៅ មកលើបញ្ហាតំបន់ និងអន្តរជាតិធំៗ ពិសេសដើម្បីកំណត់ទិសដៅ សម្រាប់អនុវត្តនូវគំនិតផ្តួចផ្តើម ស្តីពីការបង្កើតខ្សែក្រវ៉ាត់ និងផ្លូវឲ្យកាន់តែទទួលបាននូវភាពជោគជ័យខ្ពស់ថែមទៀត។

ទន្ទឹមនឹងនេះដែរ លោកប្រធានាធិបតីចិន បានសង្កត់ធ្ងន់ពីសារសំខាន់នៃការតភ្ជាប់សម្រាប់បណ្តាប្រទេសទាំងអស់ក្នុងតំបន់ និងក្រៅតំបន់ ក៏ដូចជាសម្រាប់ពិភពលោកទាំងមូល។
នៅក្នុងឱកាសនោះដែរ លោកប្រធានាធិបតីចិន ស៊ី ជិនពីង បានជូនពរចំពោះប្រមុខរដ្ឋ ប្រមុខរដ្ឋាភិបាល និងប្រទេសក្នុងទ្វីបអាស៊ី អឺរ៉ុប និងអាហ្រ្វិកទាំងអស់ សូមមានសុខភាពល្អ កម្លាំងពលំមាំមួន ដើម្បីបន្តនូវកិច្ចសន្ទនា និងការផ្លាស់ប្តូរមតិយោបល់ និងទស្សនៈល្អៗ ពីគ្នាទៅវិញទៅមក ដើម្បីជានិម្មិតរូបនៃភាពរីកចម្រើន និងការរស់នៅប្រកបដោយសុខសន្តិភាព ជាមួយនឹងការចេះចែករំលែកជួយគ្នាទៅវិញទៅមក ដើម្បីជីវភាពរស់នៅរបស់ប្រជាពលរដ្ឋកាន់តែប្រសើឡើងប្រកបដោយភាពសុខដុមរមនា។

សូមបញ្ជាក់ នឹងអញ្ជើញចូលរួមពិធីលាងសាយភោជន៍សម្តចតេជោ ហ៊ុន  សែន បានជួបពិភាក្សាជាមួយក្រុមហ៊ុន Zhongke Zhaoshang នៅប៉េកាំង និងជួបពិភាក្សាមួយទៀត គឺក្រុមហ៊ុន Dingyi Group Investment Ltd នៅប៉េកាំង។ (ទស្សនាវិដេអូ)៖