(បន្ទាយមានជ័យ)៖ លោកឧបនាយករដ្ឋមន្ត្រី កែ គឹមយ៉ាន សមាជិកអចិន្ត្រៃយ៍គណៈកម្មាធិការកណ្ដាល និងជាប្រធានក្រុមការងារគណៈកម្មាធិការកណ្ដាល ចុះជួយខេត្តបន្ទាយមានជ័យ នៅថ្ងៃទី១៤ ខែឧសភា ឆ្នាំ២០១៧នេះ បានចុះជួបសំណេះសំណាល និងសួរសុខទុក្ខជាមួយ សមាជិក-សមាជិកា គណបក្សប្រជាជនកម្ពុជាជិត៤ពាន់នាក់ នៅក្នុងស្រុកចំនួន២នៃខេត្តបន្ទាយមានជ័យ រួមមានស្រុកមង្គលបូរី និងសេរីសោភ័ណ ដើម្បីណែនាំពីការងារពង្រឹងបក្ស និងការងារឆ្ពោះទៅកាន់ ការបោះឆ្នោតជ្រើសរើសក្រុមប្រឹក្សាឃុំ-សង្កាត់ នាព្រឹកថ្ងៃទី ០៤ ខែមិថុនា ឆ្នាំ ២០១៧ខាងមុខនេះ ។
ឧបនាយករដ្ឋមន្ត្រី កែ គឹមយ៉ាន បានពាំនាំនូវប្រសាសន៍ផ្ដាំផ្ញើសួរសុខទុក្ខពីសំណាក់ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា និង សម្ដេចចក្រី ហេង សំរិន សម្ដេចក្រឡាហោម ស ខេង សម្ដេចវិបុលសេនាភក្ដី សាយ ឈុំ និងថ្នាក់ដឹកនាំគណបក្សប្រជាជនកម្ពុជាដទៃផ្សេងទៀត ដែលតែងតែគិតគូរចំពោះសុខទុក្ខ និងការរស់នៅរបស់សមាជិក-សមាជិកាគណបក្សប្រជាជនកម្ពុជារបស់យើង។
គណបក្សប្រជាជនកម្ពុជា កើតពីប្រជាជន បម្រើប្រជាជន ហើយដែលកំពុងដឹកនាំប្រទេស និងជាអ្នកនាំយកសន្តិភាព និងស្ថេរភាពជូនប្រជាជនទូទៅ ជាពិសេសគឺបានថែរក្សាសន្តិភាព ស្ថេរភាព និងការអភិវឌ្ឍគ្រប់វិស័យ ក្នុងប្រទេសរហូតដល់បច្ចប្បន្ន និងទៅថ្ងៃអនាគត។
ថ្លែងក្នុងឱកាសនោះ ឧបនាយករដ្ឋមន្ត្រី បានស្នើឲ្យអង្គពិធីយើងទាំងមូលក្រោកឈរ ស្មឹងស្មាត ចូលរួមរំលែកទុក្ខ និងគោពរវិញ្ញណក្ខន្ធ ដល់យុទ្ធជនដែលបានពលីជីវិត ក្នុងបេសកម្មអង្គការសហប្រជាជាតិ នៅអាហ្រ្វិកកណ្ដាលនាពេលថ្មីៗនេះ ។
ក្នុងនោះដែរ ឧបនាយករដ្ឋមន្ត្រី បានក្រើនរម្លឹកដល់ប្រជាពលរដ្ឋទាំងអស់ សូមចូលរួមប្រយុទ្ធប្រឆាំងគ្រឿងញៀន ត្រូវតែជៀសឱ្យឆ្ងាយពីគ្រឿងញៀន និងឆ្លើយថាទេចំពោះគ្រឿងញៀនគ្រប់ប្រភេទ ដោយកុំសាកគ្រឿងញៀនសូម្បីតែម្តង ព្រោះការប្រើគ្រឿងញៀនគឺបំផ្លាញអនាគតខ្លួនឯង គ្រួសារ និងសង្គមជាតិ និងសូមជួយអប់រំផ្សព្វផ្សាយ បន្តដល់មនុស្សជាទីស្រលាញ់ ឱ្យធ្វើជាពលរដ្ឋល្អដោយមិនជួញដូរ មិនរក្សាទុក មិនចរាចរនូវគ្រឿងញៀនគ្រប់ប្រភេទ ។
ឧបនាយករដ្ឋមន្ត្រី កែ គឹមយ៉ាន ក៍បានឧបត្ថម្ភ សមាជិក-សមាជិកាក្នុងម្នាក់ៗទទួលបាន សារ៉ុង១ គណបក្សទាំង៤ឃុំ-សង្កាត់ ក្នុងមួយឃុំសង្កាត់ទទួលបានថវិកា១លានរៀល និងអង្ករ២តោន, អនុវិទ្យាល័យស្រះរាំងថវិកា៥០ម៉ឺនរៀល និងថវិកាកសាងឧបត្ថម្ភបន្ថែម ដល់អនុវិទ្យាល័យស្រះរាំងចំនួន១ម៉ឹនដុល្លារអាមេរិក៕
