(កំពង់ចាម)៖ កាលពីពេលថ្មីនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានផ្តល់អំណោយនូវអគារសាលាបឋមសិក្សា កោះកុក ចំនួន២ខ្នង ស្មើនឹង ១០បន្ទប់ ជូនដល់ប្រជាពលរដ្ឋ និងសិស្សានុសិស្ស នៅភូមិកោះប្រាក់ ឃុំកោះទន្ទឹម ស្រុកកំពង់សៀម ខេត្តកំពង់ចាម ដើម្បីឆ្លើយតបទៅនឹងតម្រូវជាក់ស្តែង នៃវិស័យអប់រំនៅមូលដ្ឋាន។
អគារសិក្សានេះ ត្រូវបានសាងសង់រួចរាល់ និងបានដាក់សម្ពោធឲ្យប្រើប្រាស់ជាផ្លូវការ នៅថ្ងៃទី១៣ ខែឧសភា ឆ្នាំ២០១៧នេះ ក្រោមអធិបតីភាព លោក លន់ លឹមថៃ អភិបាលខេត្តកំពង់ចាម និងមន្ដ្រីពាក់ព័ន្ធ ប្រជាពលរដ្ឋប្រមាណជាង១,០០០នាក់។
អភិបាលខេត្ត បានផ្តាំផ្ញើសេចក្តីនឹកពី សម្តេចតេជោ ហ៊ុន សែន នាយករដ្ឋមន្ត្រី ជូនបងប្អូនប្រជាពលរដ្ឋ និងបានលើកទឹកចិត្ត ដល់ប្រជាពលរដ្ឋឲ្យបញ្ជូនកូន ទៅសាលារៀនឲ្យបានគ្រប់ៗគ្នា ដើម្បីលើកកម្ពស់សមត្ថភាព និងធនធានមនុស្ស នៅមូលដ្ឋាន។
សូមជម្រាបថា កាលពីមុនឆ្នាំ២០១៦ អគារសិក្សានេះ ស្ថិតនៅភូមិកោះកុក ឃុំកោះទន្ទឹម ស្រុកកំពង់សៀម ហើយប្រឈមខ្លាំងនឹងការបាក់ច្រាំងទន្លេ ដោយពិនិត្យឃើញនូវបញ្ហានេះ សម្តេចតេជោ បានសម្រេចផ្តល់អំណោយជាអគារសិក្សាថ្មី នៅក្នុងភូមិកោះប្រាក់ ឃុំកោះទន្ទឹម ស្រុកកំពង់សៀម មានចំងាយប្រមាណ១គីឡូម៉ែត្រ ពីទីតាំងចាស់។
ឃុំកោះទន្ទឹម គឺជាឃុំមួយ ក្នុងចំណោមឃុំទាំង១៥ នៅស្រុកកំពង់សៀម ដើម្បីទៅដល់ឃុំនេះ យើងត្រូវចំណាយពេលមិនលើសពី ១៥នាទីឡើយ ប្រសិនបើយើងធ្វើដំណើរតាមរថយន្ត ឬទោចក្រយានយន្ត ដោយធ្វើដំណើរលើផ្លូវកៅស៊ូ និងផ្លូវបេតុង ខុសពី២ឆ្នាំមុន ដែលយើងត្រូវចំណាយពេលមិនតិចជាង ៤០នាទីនោះទេ៕
