(ភ្នំពេញ)៖ ក្រោយពីបញ្ចប់ប្រតិបត្តិការ ចុះត្រួតពិនិត្យទំនិញនៅក្នុងផ្សារទំនប់ រួចមកនោះ មន្ត្រីកាំកុងត្រូលផែស្ងួតចុងទីភ្នំពេញ បានអំពាវនាវយ៉ាងទទូចដល់បងប្អូនអាជីវករទាំងអស់ នៅក្នុងរាជធានីភ្នំពេញ មុននឹងទទួលទំនិញផ្សេងៗ (គ្រឿងបរិភោគ) មកលក់បន្តជូនបងប្អូនប្រជាពលរដ្ឋ យកទៅពិសារនោះ ត្រូវធ្វើការពិនិត្យឲ្យបានច្បាស់ពីស្លាកសញ្ញា នឹងពេលវេលាកំណត់របស់ទំនិញនីមួយៗ ជាពិសេសអាជីវករដែលទិញលក់ បន្លែ ត្រីសាច់ ត្រូវស្គាល់ពីអាស្រ័យដ្ឋាននឹងយីហោម្ចាស់ទំនិញ ដើម្បីងាយស្រួលពេលមន្ត្រីជំនាញចុះពិនិត្យឃើញ មានសារធាតុគីមី អាចបង្ក្រាបនឹងទប់ស្កាត់ទាន់ពេលវេលា។
គួរបញ្ជាក់ថា នៅព្រឹកថ្ងៃទី១២ ខែឧសភា ឆ្នាំ២០១៧ ដោយមានការណែនាំបន្ថែមពីលោក ពេញ ធារម្យ ប្រធានសាខាកាំកុងត្រូលផែស្ងួតចុងទីភ្នំពេញ បានបញ្ជាឲ្យមន្ត្រីសាខាផែស្ងួតចុងទីភ្នំពេញ សហការជាមួយជាមន្រ្តីមន្ទីរ ពាណិជ្ជកម្មរាជធានីភ្នំពេញ និងអាជ្ញាធរដែនដី បានចុះត្រូតពិនិត្យទំនិញម្ហូបអាហារនៅផ្សារទំនប់ និងតាមបណ្តាហាងស្តាម៉ាតស្ថិតក្នុងខ័ណ្ឋឬស្សីកែវ ដើម្បីស្វែងរកនូវសារធាតុគីមីហាមឃាត់ ដែលអាជីវករមួយចំនួនតូចបានប្រើប្រាស់ ដែលជាកង្វល់របស់បងប្អូនប្រជាពលរដ្ឋ ចំពោះសុវត្ថិភាពម្ហូបអារហារ។
លោក គង់ វុទ្ធី អនុប្រធានសាខាកាំកុងត្រូលផែស្ងួតចុងទីភ្នំពេញ បានដឹកនាំមន្ត្រីកាំកុងត្រូលបានធ្វើការណែនាំក្រុមអាជីវករ ដាក់តាំងលក់ផលិតផលឲ្យ ត្រូវតាមលក្ខណៈបច្ចេកទេស ដោយញែកចេញពីគ្នារវាងគ្រឿងប្រើប្រាស់ ដែលមានផ្ទុកសារធាតុពុល និងម្ហូបអាហារ ហាមការដាក់តាំងផលិតផលភេសជ្ជៈត្រូវកំដៅថ្ងៃ និងការដាក់លក់ផលិតផលហួសកាលបរិច្ឆេទជាដើម។
លោកបញ្ជាក់បន្ថែមថា ក្នុងប្រតិបត្តិការចុះពិនិត្យទំនិញនេះ មិនមានការដកហូតទំនិញអ្វីឡើយ ដោយសារការធ្វើពិនិត្យទៅលើ បង្គាស្រស់ មឹក ត្រីងៀត បន្លែ គុយទាវក្រៀម មីស្រល់ នឹងត្រីសាច់ផ្សេងៗគ្មានការផ្ទុកនៅសារធាតុគីមី ហើយក្នុងប្រតិបត្តិ ការនោះក្រុមការងារបានបើករថយន្តពិសោធន៍ ចុះទៅដល់ទីតាំងផ្សារទំនប់ដើម្បីពិសោធន៍ទំនិញភ្លាមៗតែម្តង ដើម្បីងាយស្រួលពេលពិនិត្យឃើញមានសារធាតុគីមី គឺក្រុមការងារនឹងចុះដកហូតទប់ស្កាត់មិនអោយចែកចាយបន្ត៕
