(ភ្នំពេញ)៖ ទេសរដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងបញ្ជាក់ថា កម្ពុជានៅតែមានលទ្ធភាពក្នុងការទទួលបានឥណទាន ដែលមានកម្រិតសម្បទានខ្ពស់ ពីដៃគូអភិវឌ្ឍន៍នានានៅឡើយ។

ការបញ្ជាក់របស់លោករដ្ឋមន្ត្រី ក្រសួងសេដ្ឋកិច្ច ធ្វើឡើងក្នុងឱកាស ដែលលោកជួបពិភាក្សា ការងារជាមួយលោក លី គុនជីន ប្រធានធនាគារវិនិយោគ ហេដ្ឋារចនាសម្ព័ន្ធអាស៊ី (AIIB) នាពេលថ្មីៗនេះ។

សេចក្តីប្រកាសព័ត៌មាន របស់ក្រសួងសេដ្ឋកិច្ច បានដកស្រង់សដីរបស់លោក អូន ព័ន្ធមុនីរ័ត្ន ថា «កម្ពុជានៅមានលទ្ធភាព ក្នុងាការទទួលបានឥណនទាន ដែលមានកម្រិតសម្បទានខ្ពស់ ពីដៃគូអភិវឌ្ឍនានានៅឡើយ ដូច្នេះកម្ពុជានៅមិនទាន់មាន គោលនយោបាយខ្ចីពីធនាគារ AIIB ដែលមានលក្ខខណ្ឌឥណទាន សម្បទានកម្រិតទាបទេ»។

ជាមួយគ្នានេះ លោក លី គុនជីន ប្រធាន AIIB បានទទួលស្គាល់ថា ជាមួយអត្ថប្រយោជន៍ដែលកម្ពុជា កំពុងក្រេបជញ្ចក់ពីឥណទានសម្បទានកម្រិតខ្ពស់ ព្រមជាមួយយុទ្ធសាស្ត្រគ្រប់គ្រង បំណុលសាធារណៈដ៏រឹងមាំ និងច្បាស់លាស់នេះ កម្ពុជាប្រាកដជាមិនទាន់មានភាពចាំបាច់ក្នុងការខ្ចីឥណទានពី AIIB ទេ។

លោកបញ្ជាក់ថា «AIIB ពិតជាមានសុឆន្ទះខ្ពស់ ក្នុងការចូលរួមសហការ ជាមួយរាជដ្ឋាភិបាល ដោយនឹងមិនផ្តោតតែលើការ កាត់បន្ថយភាពក្រីក្រប៉ុណ្ណោះទេ គឺត្រូវផ្តោតលើវិស័យហេដ្ឋារចនាសម្ព័ន្ធ និងវិស័យបង្កើនផលិតភាព ដែលគាំទ្រចរិភាព នៃកំណើនសេដ្ឋកិច្ច ការលើកតម្កើនជីវភាពរស់នៅ និងវិបុលភាពរបស់​ប្រជាជនកម្ពុជាផងដែរ»៕