(ភ្នំពេញ)៖ ទីផ្សារកម្ពុជានាពេលបច្ចុប្បន្ន កំពុងមានសន្ទុះយ៉ាងខ្លាំងក្លា នូវតម្រូវការបចេ្ចកវិទ្យានៃ Telephony Solutions សម្រាប់ផ្គត់ផ្គង់ ​ដល់ស្ថាប័នទាំង ខ្នាតតូច និងខ្នាតធំ​ដើម្បីឆ្លើយតប តម្រូវការ និងផ្គត់ផ្គង់នូវសេវាកម្មប្រភេទនេះ ក្រុមហ៊ុន​​ NEC Corporation (Thailand) Ltd​​​ ​សហការជាមួយក្រុមហ៊ុន Campura Triangulum Corporation នៅ​​ថ្ងៃទី​​១២ ខែ​​ឧសភា ឆ្នាំ២០១៧ រៀបចំសិក្ខាសិលាមួយ ដោយស្តីអំពី​ «NEC Telephony Solutions Event»។​

​លោក​ ប៊ុន សុខលាភ ​​​ប្រធានផ្នែក Pre-Sales ​​របស់​​ក្រុមហ៊ុន​​​ Campura​​ បានសម្ដែងការស្វាគមន៍យ៉ាងកក់ក្តៅ ទៅកាន់សំណាក់អតិថិជនទាំងអស់ ដែលបានចំណាយពេលវេលា ចូលរួមសិក្ខាសាលានាពេលព្រឹកនេះ​​ ហើយលោកបាន ថ្លែងអំណរគុណចំពោះក្រុមហ៊ុន​​​ NEC Corporation (Thailand) Ltd ដែលបានសហការ បង្កើតកម្មវិធីនេះឡើង​ ក្នុងគោលបំណង ដើម្បី​ឲ្យអតិថិជនបានយល់ដឹងអំពីអត្ថប្រយោជន៍ របស់ផលិតផល NEC Telephony Solutions​។

លោក Hirose Jun ​ដែលជា Senior Manager Greater China /APAC (NW), Global Platform Division តំណាងក្រុមហ៊ុន NEC Corporation បានបង្ហាញថា ក្រុមហ៊ុន NEC Corporation បានខិតខំក្នុងការរក្សាស្តង់ដារវិជ្ជាជីវៈខ្ពស់ ចំពោះការបង្កើតផលិតផល សេវាកម្មដែលផ្តល់តម្លៃដល់អតិថិជន និងក្លាយទៅជាក្រុមហ៊ុនដែលបានជ្រើសរើស ដោយការជឿទុកចិត្តពីភាគីពាក់ព័ន្ធទាំងអស់របស់ខ្លួន រួមទាំងអតិថិជន ដោយឈរលើចក្ខុវិស័យ «ផលិតផលល្អ សេវាកាន់តែប្រសើរ»។

ទន្ទឹមនេះ លោក​ស្រី Lalit Trongprakob ដែលជា​ Senior Sales Manager តំណាងក្រុមហ៊ុន NEC Corporation ក៏បានបង្ហាញបន្ថែម ក្នុងសិក្ខាសាលានេះថា ក្រុមហ៊ុន NEC Corporation បច្ចុប្បន្នកំពុងផ្តោតលើការបង្កើនភាពខ្លាំងរបស់ខ្លួន នៅក្នុងបច្ចេកវិទ្យាព័ត៌មាន និងគមនាគមន៍ ដើម្បីផ្តល់ជូននូវដំណោះស្រាយសម្រាប់ប្រព័ន្ធហេដ្ឋារចនាសម្ព័ន្ធ និងសេវាដែលមិនអាចខ្វះបានក្នុងសង្គម។

តាមរយៈសកម្មភាពអាជីវកម្មទាំងនេះ ក្រុមហ៊ុន NEC Corporation នៅតែមានការប្តេជ្ញាចិត្ត ក្នុងការសហការយ៉ាងជិតស្និទ្ធ ជាមួយភាគីពាក់ព័ន្ធរបស់ខ្លួនក្នុងការបង្កើត ​ផលិតផលថ្មីៗ  ដោយផ្អែកលើតម្លៃ ដែលអាចជួយធានាបាននូវ សុវត្ថិភាព សន្តិសុខ ប្រសិទ្ធិភាព។

លើសពីនេះទៀត គេក៏ឃើញមានការរៀបចំដាក់បង្ហាញនូវផលិតផល NEC IP Telephone យ៉ាងច្រើនប្រភេទ ជូនដល់អតិថិជនដើម្បីទស្សនា  ក៏ដូចជាធ្វើការសាកល្បងប្រើប្រាស់ នៅក្នុងសិក្ខាសាលានេះផងដែរ៕