(ភ្នំពេញ)៖ នាយឧត្តមសេនីយ៍ កែ គឹមយ៉ាន ឧបនាយករដ្ឋមន្រ្តី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានថ្លែងថា ឆ្នាំនេះជាខួបទី២៥ នៃការងារប្រយុទ្ធប្រឆាំងគ្រឿងញៀននេះ ហើយយន្តការនេះ កំពុងតែសកម្មដែលកម្ពុជាទទួលបាននូវការគាំទ្រជាច្រើន ទាំងស្មារតី បច្ចេកទេស និងសម្ភារសំដៅធ្វើឲ្យកម្ពុជាពង្រឹង បាននូវសមត្ថភាពប្រយុទ្ធ ប្រឆាំងគ្រឿងញៀនទាំងក្នុង ក្របខណ្ឌកម្ពុជា ខ្លួនឯងផ្ទាល់ ក៏ដូចជាការចូលរួមក្នុងយន្តការតំបន់។
ជាមួយគ្នានេះនាយឧត្តមសេនីយ៍ កែ គឹមយ៉ាន បានស្នើឱ្យកិច្ចប្រជុំធ្វើការពិនិត្យបន្ថែម ហ្មតចត់ចំពោះសេចក្តីព្រាងផែនការសកម្មភាព អនុតំបន់ទី១០ ដែលយើងត្រូវធ្វើការអនុមត័ដាក់ឲ្យអនុវត្តន៍ក្នុងរយៈពេល២ឆ្នាំបន្ត ដែលផែនការឆ្លើយតបពហុវិស័យផ្តោតទៅលើ ផ្នែកសុខភាព និងវិធានការច្បាប់ ផ្អែកទៅលើសសរស្តម្ភសំខាន់៤រួមមាន៖ ១.គ្រឿងញៀន និងសុខភាព ២.កិច្ចសហការអនុវត្តច្បាប់ ៣.កិច្ចសហការផ្នែកច្បាប់ និងយុត្តាធិការ ៤.ការអភិវឌ្ឍកែប្រែតំបន់ដាំគ្រឿងញៀន។
ការថ្លែងរបស់ នាយឧត្តមសេនីយ៍ កែ គឹមយ៉ាន បានធ្វើឡើងនៅក្នុង កិច្ចប្រជុំថ្នាក់រដ្ឋមន្រ្តីស្តីពីការងារត្រួតពិនិត្យគ្រឿងញៀន នៃប្រទេស មហាអនុតំបន់ទន្លេមគង្គ កម្ពុជា ចិន ឡាវ ថៃ វៀតណាម និងមីយ៉ានម៉ា និងអង្គការសហប្រជាជាតិUNODC នាថ្ងៃ១០ ខែឧសភា ឆ្នាំ២០១៧។
កិច្ចប្រជុំនេះ ត្រូវបានបើកក្រោម អធិបតីភាព នាយឧត្តមសេនីយ៍កែ គឹមយ៉ាន ឧបនាយករដ្ឋមន្រ្តី ប្រធានអាជ្ញាធរជាតិ ប្រយុទ្ធប្រឆាំង គ្រឿងញៀន ដោយមានការ អញ្ជើញចូលរួមពីបណ្តាប្រតិភូ មកពីប្រទេសជាហត្ថលេខី និងក្រសួង អង្គភាពពាក់ព័ន្ធ ជាច្រើនរូបទៀត។
បន្ថែមពីលើនេះ នាយឧត្តមសេនីយ៍ កែ គឹមយ៉ាន បានអំពាវនាវសហគមន៍អន្តរជាតិ UNODC និងបណ្តាប្រទេសដែគូអភិវឌ្ឍន៍ ព្រមទាំងប្រទេស ពាក់ព័ន្ធទាំងអស់ បន្តផ្តល់ការចូលរួម និងគាំទ្រដល់ដំណើរការអនុវត្តផែនការសកម្មភាព អនុតំបន់ទី១០ ឲ្យដំណើរការ ទៅទទួល បានជោគជ័យ។
ក្នុងឱកាសនោះ លោក កៅ ខុនដារ៉ា អនុប្រធានអាជ្ញាធរជាតិ ប្រយុទ្ធប្រឆាំងគ្រឿងញៀន បានថ្លែងស្វាគមន៍ ដល់ប្រតិភូ នៃបណ្តាប្រទេស និងអ្នកចូលរួម ដែលជាសមាជិកនៃអង្គពិធីទាំងអស់ ដោយលោកបានថ្លែងប្រាប់ពីគោលបំណង នៃកិច្ចប្រជុំថា គឺដើម្បី ពង្រឹង និងពង្រីកទំនាក់ទំនងមិត្តភាព និងកិច្ចសហប្រតិបតិ្តការល្អ ក្នុងការងារប្រយុទ្ធប្រឆាំងគ្រឿងញៀនឆ្លងកាត់ព្រំដែន ដែលកំពុង បន្គំរាម កំហែងដល់សុខមាលភាពប្រជាជន សន្តិសុខ សណ្តាប់ធ្នាប់ និងការអភិវឌ្ឍសង្គមជាតិ នៃបណ្តាប្រទេសទាំងនៅក្នុង និង ក្រៅតំបន់ ក្នុងនោះរួមទាំងប្រទេសយើងផង។
លោកអាល់ដូ ឡាឡេ ដេម៉ូ នាយករងប្រតិបត្តិអង្គការ UNODC បានលើកឡើងថា អង្គការសហប្រជាជាតិ UNODC គាំទ្រផែនការ សកម្មភាពទី១០ ស្តីពីការប្រយុទ្ធប្រឆាំងគ្រឿងញៀន នៃប្រទេសមហាអនុតំបន់ទន្លេមេគង្គ ដោយគៀគរថវិកា សម្ភារៈ បច្ចេកទេស ដើម្បីសហការអនុវត្តន៍ ឱ្យទទួលបានជោគជ័យ៕
