(ភ្នំពេញ)៖ នៅព្រឹកថ្ងៃទី៩ ខែឧសភា ឆ្នាំ២០១៧ នេះ កាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានចាត់ឲ្យប្រតិភូកាកបាទក្រហមកម្ពុជាចូលរួមគោរពវិញ្ញាណក្ខន្ធ លោកឧត្តមសេនីយ៍ឯក មាស ក្រូច អតីត អនុរដ្ឋមន្ត្រី ក្រសួងការពារជាតិ និងជាទីប្រឹក្សារាជរដ្ឋាភិបាលកម្ពុជា ដែលបាន ទទួលមរណភាពកាលពីថ្ងៃទី៨ ខែឧសភា ឆ្នាំ២០១៧ វេលាម៉ោង៥ម៉២៥នាទីព្រឹក ក្នុងជន្មាយុ ៨៥ឆ្នាំ ដោយរោគាពាធ។ ជាមួយគ្នានោះ កាកបាទក្រហមកម្ពុជា បាននាំយកគ្រឿងឧបភោគបរិភោគ និងថវិកាមួយចំនួនទៅចូលបុណ្យផងដែរ។
នៅក្នុងពិធីចូលគោរពវិញ្ញាណក្ខន្ធនោះ លោកវេជ្ជ. អ៊ុយ សំអាត នាយក នាយកដ្ឋានគ្រប់គ្រងគ្រោះមហន្តរាយ កាកបាទក្រហមកម្ពុជា បានផ្ដាំផ្ញើនូវការរំលែកទុក្ខយ៉ាងក្រៀមក្រំពីសំណាក់ សម្ដេចកិត្តិព្រឹទ្ធបណ្ឌិតប្រធាន ជូនចំពោះក្រុមគ្រួសារសព ដែលបានបាត់បង់ ស្វាមី លោកឪពុក និងជីតា ជាទីស្រឡាញ់ ប្រកបដោយព្រហ្មវិហារធម៌ និងជាវីរជនខ្មែរដ៏អង់អាចក្លាហាន ក្នុងការស្វែងរកសន្តិភាពជូនជាតិមាតុភូមិ និងសូមឧទ្ទិសដល់វិញ្ញាណក្ខន្ធសព សូមបានទៅកាន់សុគតិភព កុំបីឃ្លៀងឃ្លាតឡើយ ៕
