(ត្បូងឃ្មុំ)៖ អគារដ្ឋបាល អគារស្នាក់នៅ និងប្រព័ន្ធហេដ្ឋារចនាសម្ព័ន្ធមួយចំនួននៅក្នុងខេត្តត្បូងឃ្មុំ ដែលជាខេត្តថ្មីមួយរបស់កម្ពុជានោះ ត្រូវបានសម្ពោធដាក់ឲ្យប្រើប្រាស់ជាផ្លូវការហើយនៅព្រឹកថ្ងៃទី០៩ ខែឧសភា ឆ្នាំ២០១៧នេះ។ ប្រជាពលរដ្ឋបានសម្តែងក្តីរីករាយ និងសាទរចំពោះវត្តមានទីរួមខេត្តថ្មី ហើយរំពឹងថា ទីរួមខេត្តដែលជាអតីតព្រៃម៉ៃសាក់នេះ នឹងធ្វើឲ្យជីវភាពរបស់ពួកគាត់ប្រែប្រែលល្អប្រសើរ ជាងពេលបច្ចុប្បន្នផងដែរ។

បន្ទាប់ពីចំណាយពេលសាងសង់អស់រយៈពេលប្រមាណជាពីរឆ្នាំ អគារសាលាខេត្ត អគារដ្ឋាបាល អគារស្នាក់នៅរបស់មន្រ្តី និងប្រព័ន្ធហេដ្ឋរចនា​សម្ព័ន្ធមួយចំនួនទៀត របស់សាលាខេត្តត្បូងឃ្មុំ ត្រូវបានសម្ពោធដាក់ឲ្យប្រើប្រាស់ជាផ្លូវការហើយនៅព្រឹកថ្ងៃទី០៩ ខែឧសភា ឆ្នាំ២០១៧នេះ ក្រោមអធិបតីភាពសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា។

ថ្លែងសំណេះសំណាលជាមួយមន្រ្តីរាជការ កងកម្លាំងប្រដាប់អាវុធ និងប្រជាពលរដ្ឋរាប់ពាន់នាក់ក្នុងពិធីសម្ពោធសមិទ្ធផលថ្មីនៃខេត្តត្បូងឃ្មុំនេះ សម្តេច​តេជោ ហ៊ុន សែន បានថ្លែងរំលឹកថា សម្តេចមានប្រវត្តិជាច្រើននៅលើទឹកដីត្បូងឃ្មុំនេះ ក្នុងអំឡុងពេលប្រទេសមានសង្រ្គាម ដែលសម្តេច​បានចូល​ធ្វើជាកងទ័ព តស៊ូតាំងពីអាយុ ១៨ឆ្នាំ ដើម្បីប្រយុទ្ធជាមួយកងទ័ពចក្រពត្តិអាមេរិក និងកងទ័ពវៀតណាមខាងត្បូង ដែលចូលមកឈ្លានពានប្រទេស​កម្ពុជា។ សម្តេចបន្តថា ប្រជាពលរដ្ឋខេត្តត្បូងឃ្មុំ បានចូលរួមជួយយកអាសារសម្តេចនៅអំឡុងពេលតស៊ូនោះ។

សម្តេចតេជោ ហ៊ុន សែន បានថ្លែងទៀតថា សមិទ្ធផលរបស់ប្រទេសជាតិ រួមទាំងសាលាខេត្តត្បូងឃ្មុំនេះផងដែរ បានកើតចេញពីប្រទេសជាតិ​មាន​សុខសន្តិភាព​ បន្ទាប់ពីភ្លើងសង្រ្គាមបានបិទបញ្ចប់ តាមរយៈការចរចាស្វែងរកសន្តិភាពជាមួយអ្នកនយោបាយគ្រប់ភាគី ជាពិសេសការដាក់​ចេញយុទ្ធ​សាស្រ្តឈ្នះឈ្នះនាំយកទាហានខ្មែរក្រហមពីក្នុងព្រៃ ធ្វើឲ្យកម្ពុជាមានស្ថេរភាព និងបិទបញ្ចប់ភ្លើងសង្រ្គាមទាំងស្រុង។ សម្តេចតេជោ ហ៊ុន សែន បានទទូចឲ្យប្រជាពលរដ្ឋរួមគ្នាថែរក្សាសុខសន្តិភាព ដែលកំពុងមាននាពេលបច្ចុប្បន្ន ដើម្បីផ្តល់ឱកាសឲ្យប្រទេសជាតិ​មានការអភិវឌ្ឍ​ជាបន្តទៅទៀត។

ជាមួយការសម្ពោធដាក់ឲ្យសមិទ្ធផល និងប្រព័ន្ធហេដ្ឋារចនាសម្ព័ន្ធនៅទីរួមខេត្តត្បូងឃ្មុំនេះ សម្តេចប្រមុខរាជរដ្ឋាភិបាលកម្ពុជា បានអំពាវនាវឲ្យប្រជា​ពលរដ្ឋអញ្ជើញមកទស្សនាទីរួមខេត្តថ្មីនេះ ព្រមទាំងអំពាវនាវឲ្យមានការសាងសង់ផ្ទះលក់ដោយបង់រំលោះក្នុងតម្លៃទាបជូនមន្រ្តីរាជការ និងប្រជា​ពលរដ្ឋ និងអំពាវនាវឲ្យមានការសាងសង់សណ្ឋាគារនៅទីរួមខេត្តនេះផងដែរ ដើម្បីបម្រើដល់វិស័យទេសចរណ៍ ត្បិតខេត្តនេះតំបន់ប្រវត្តិសាសន៍ គឺអតីតរាជធានីក្នុងរជ្ជកាលព្រះស្តេចកន។

ការបង្កើតឲ្យមានទីប្រជុំជនខេត្តត្បូងឃ្មុំលើទឹកដីអតីតសមរភូមិ និងដីព្រៃម៉ៃសាក់នេះ បានធ្វើឲ្យប្រជាពលរដ្ឋបង្ហាញការសាទរ និងរីករាយខ្លាំង​ចំពោះ​គោលនយោបាយអភិវឌ្ឍន៍របស់រាជរដ្ឋាភិបាលកម្ពុជា។ ពួកគេរំពឹងថា ដែនដីដែលធ្លាប់ស្ងាត់ជ្រងុំនេះ នឹងក្លាយទៅជាអ៊ូអរ ហើយក៏នឹងជួយឲ្យ​ជីវភាពល្អប្រសើរ​ផងដែរ។

សមិទ្ធផលដែលសម្ពោធដាក់ឲ្យប្រើប្រាស់នាព្រឹកមិញនេះ រួមមាន៖ អគាររដ្ឋបាលប្រមូលផ្តុំ និងអគារស្នាក់នៅរបស់មន្រ្តីរាជការ, ប្រព័ន្ធផ្លូវដោយ​មានការរៀបចំបណ្តាញលូទឹកភ្លៀង ទឹកកខ្វក់ និងផ្លូវជាច្រើនខ្សែ ព្រមទាំងអាងស្តុកទឹកប្រើប្រាស់ ដែលអាចស្តុកទឹកបានប្រមាណបីលានម៉ែត្រគូប និង ស្ថានីយផលិតទឹកស្អាត ដែលមានសមត្ថភាពផលិតទឹកស្អាត ២០៨ម៉ែត្រគូបក្នុងមួយម៉ោង។

សម្តេចតេជោ ហ៊ុន សែន បានគូសបញ្ជាក់ថា សមិទ្ធផលដែលសម្ពោធដាក់ឲ្យប្រើប្រាស់នាព្រឹកមិញនេះ គ្រាន់តែជាសមិទ្ធផលក្នុងដំណាក់​កាលដំបូង​ប៉ុណ្ណោះ ហើយនៅមានសមិទ្ធផលជាច្រើន នឹងត្រូវសាងសង់ឡើងជាបន្តបន្ទាប់ទៀត។ ឆ្លើយតបសំណូមពរមន្រ្តីសាលាខេត្តត្បូងឃ្មុំ ដែលធ្វើឡើង​តាមទំព័រ Facebook នោះ សម្តេចតេជោ ក៏បានរៀបចំឲ្យការសាងសង់សាលាពីកម្រិតបឋម ដល់វិទ្យាល័យ ព្រមទាំងអគារស្នាក់នៅរបស់គ្រូ និងសិស្សនៅទីប្រជុំជនខេត្តត្បូងឃ្មុំនេះផងដែរ ដើម្បីសម្រួលការលំបាករបស់កូនចៅប្រជាពលរដ្ឋ។

សម្តេចនាយករដ្ឋមន្រ្តី ក៏បានឲ្យដឹងដែរថា នៅក្នុងពេលខាងមុខ រដ្ឋាភិបាលចិន នឹងសាងសង់មន្ទីរពេទ្យបង្អែកដ៏ធំមួយនៅក្នុងទីរួមខេត្តត្បូងឃ្មុំ ដើម្បីផ្តល់សេវាសុខាភិបាលឲ្យកាន់តែល្អប្រសើរជូនប្រជាពលរដ្ឋនៅតំបន់នេះ។

បើទោះបីជាយ៉ាងណាមុននិងបញ្ចប់កិច្ចសំណេះសំណាលសម្តេចតេជោ ហ៊ុន សែន មិនភ្លេចនោះទេក្នុងការជំរុញឲ្យមន្រ្តីរាជការក្នុងខេត្តត្បូងឃ្មុំ ប្រឹងប្រែងផ្តល់សេវាជូនប្រជាពលរដ្ឋឲ្យបានល្អប្រសើរ ពោលមិនមែនមានអគារល្អ និងងាយស្រួលធ្វើការតែការផ្តល់​សេវាជូនប្រជាពលរដ្ឋគ្មាន​ប្រសិទ្ធភាពនោះទេ។

សូមបញ្ជាក់ថា ខេត្តត្បូងឃ្មុំ គឺជាខេត្តថ្មីមួយរបស់កម្ពុជា ដែលបានបំបែកចេញពីខេត្តកំពង់ចាម មានផ្ទៃដីសរុប ៥,២៥០.៥១គីឡូម៉ែត្រក្រឡា មានព្រំប្រទល់ខាងលិចជាប់នឹងខេត្តកំពង់ចាម ខាងត្បូងជាប់នឹងខេត្តព្រៃវែង ខាងជើងជាប់នឹងខេត្តក្រចេះ ខាងកើតជាប់ប្រទេសវៀតណាម ចែកចេញជា ៦ស្រុក ០១ក្រុង ៦២ឃុំ ០២សង្កាត់ ៨៧៣ភូមិ មានប្រជាពលរដ្ឋសរុប ១៨៤,០០០គ្រួសារ ស្មើនិង ៨៤៤,០០០នាក់។

ខេត្តត្បូងឃ្មុំ ត្រូវបានប្រកាសដាក់ឲ្យដំណើរការជាផ្លូវការនៅថ្ងៃទី០២ ខែមិថុនា ឆ្នាំ២០១៤ ក្រោមអធិបតីភាព​សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ។ បន្ទាប់ពីខេត្តត្បូងឃ្មុំត្រូវបាន​ប្រកាសដាក់​ឲ្យដំណើរការជាផ្លូវការ រាជរដ្ឋាភិបាលបាន​សម្រេច​កំណត់​ប្លង់គោល កសាងទីក្រុងនៃទីរួមខេត្តលើផ្ទៃដី​ទំហំប្រមាណពីរពាន់​ហិកតា ក្នុងនោះមានដីរបស់​រដ្ឋស្ថិតក្នុងចំការព្រៃម៉ៃសាក់​ចំនួន៣២២​ហិកតា ហើយហេដ្ឋារចនាសម្ព័ន្ធ និងគម្រោងអាទិភាព​ទីក្រុង​នៃទីរួមខេត្តត្បូងឃ្មុំ ត្រូវបានបើកដ្ឋានសាងសង់កាលពីថ្ងៃទី០៥ ខែមករា ឆ្នាំ២០១៥ ក្រោមអធិបតីភាព​សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា។

បច្ចុប្បន្នខេត្តត្បូងឃ្មុំ មានសាកលវិទ្យាល័យចំនួនមួយ វិទ្យាល័យចំនួន ២៣កន្លែង អនុវិទ្យាល័យ៥៤ និងបឋមសិក្សាចំនួន ៣៩៥កន្លែង៕

សូមស្តាប់ប្រសាសន៍សម្តេចតេជោ ហ៊ុន សែន៖