(ភ្នំពេញ)៖ ធនាគារជាតិនៃកម្ពុជា នាព្រឹកថ្ងៃទី០៩ ខែឧសភា ឆ្នាំ២០១៧នេះ បានសហការជាមួយធនាគារអភិវឌ្ឍអាស៊ី (ADB) បានរៀបចំវេទិកា ស្ដីពី «បច្ចេកវិទ្យាហិរញ្ញវត្ថុ (Fintech)» ដើម្បីផ្សព្វផ្សាយប្រព័ន្ធនេះ ឲ្យកាន់តែទូលំទូលាយ និងងាយស្រួល​ក្នុង​ការ​ប្រើប្រាស់ដល់អតិថិជន ខណៈដែលប្រព័ន្ធ Fintech បាននិងកំពុងតែមានសារសំខាន់បំផុតនៅកម្ពុជា។

ការរៀបចំវេទិកាស្ដីពី បច្ចេកវិទ្យាហិរញ្ញវត្ថុនេះធ្វើឡើង ដោយមានការចូលរួមពីសំណាក់លោកស្រី នាវ ច័ន្ធថាណា ទេសាភិបាល​រង​ធនាគារជាតិនៃកម្ពុជា រួមទាំងមានការចូលរួមពីអាជ្ញាធរត្រួតពិនិត្យ គ្រឹះស្ថានធនាគារ និងហិរញ្ញវត្ថុ សហគមន៍ Fin Tech និងភាគី​ពាក់ព័ន្ធជាច្រើនសរុបជាង២៥០នាក់ផងដែរ។

វេទិកាបច្ចេកវិទ្យាហិរញ្ញវត្ថុនេះ ធ្វើឡើងក្នុងគោលបំណង ដើម្បីស្វែងយល់ឲ្យកាន់តែច្បាស់អំពីផ្នែកពាក់ព័ន្ធ​ផ្សេង​ៗ នៃបច្ចេកវិទ្យាហិរញ្ញវត្ថុ រួមមាន៖ ហានិភ័យ បញ្ហាប្រឈម និងកាលានុវត្តភាពនៃបច្ចេកវិទ្យាហិរញ្ញវត្ថុ ដែលជាឧបករណ៍មួយសម្រាប់​ជំរុញឲ្យមានភាពរឹងមាំ វឌ្ឍនភាព និងបរិយាប័ន្តហិរញ្ញវត្ថុក្នុងប្រទេសកម្ពុជា។

លោកស្រី នាវ ច័ន្ធថាណា បានថ្លែងឲ្យដឹងថា ការរីកចម្រើន នៃបច្ចេកវិទ្យានាពេលបច្ចុប្បន្ន ជាពិសេសបច្ចេកវិទ្យាហិរញ្ញវត្ថុ បានផ្លាស់ប្ដូររបៀប នៃការធើ្វពាណិជ្ជកម្ម និងប្រតិបត្តិការហិរញ្ញវត្ថុ ហើយស្របពេលជាមួយគ្នា​នោះ តម្រូវការរបស់អតិថិជន ក៏មាននិន្នាការប្រែប្រួល ឆ្ពោះទៅរកសេវាដែលងាយស្រួល និងរហ័ស ហើយនេះគឺជាឱកាសដល់ក្រុម​ហ៊ុន​បច្ចេកវិទ្យាធំៗ និងគ្រឹះស្ថានមិនមែនធនាគារ ក្លាយជាតួអង្គសំខាន់មួយក្នុងការផ្ដល់សេវាហិរញ្ញវត្ថុ។

លោកស្រីបន្ដថា ដើម្បីឆ្លើយតបទៅនឹងតម្រូវការទីផ្សារ ការប្រកួតប្រជែង និងរីកចម្រើនបច្ចេវិទ្យាគ្រឹះស្ថានធនាគារ និងហិរញ្ញវត្ថុបាន​នឹង​កំពុងចាប់យកបច្ចេកវិទ្យាមកប្រើប្រាស់ ដើម្បីផ្ដល់សេវាដល់អតិថិជនរបស់ខ្លួនឲ្យកាន់តែមានប្រសិទ្ធភាព។ ទន្ទឹមនឹងនេះ ហានិភ័យ​ ជាពិសេសហានិភ័យប្រតិបត្តិការ ការសម្អាតប្រាក់ ការការពារអតិថិជន ក៏បានក្លាយជាបញ្ហាចម្បងដែលអាជ្ញាធរក្នុងនាមបញ្ញត្តិករ និងអ្នកអនុវត្តការងារជំនាញ ព្រមទាំងភាគីពាក់ព័ន្ធមានការព្រួយបារម្ភ និងយកចិត្តទុកដាក់យ៉ាងខ្លាំង។

លោកស្រី ជា សេរី អគ្គនាយកបច្ចេកទេសបានថ្លែងឲ្យដឹងថា «គោលបំណងថ្ងៃនេះគឺចង់ផ្សព្វផ្សាយ អំពីប្រព័ន្ធ Fintech ឲ្យកាន់​តែទូលំទូលាយ ពីព្រោះពាក្យថា Fintech នេះសម្បីតែខ្ញុំផ្ទាល់ក៏យល់ន័យនៅមានកម្រិតនៅឡើយ ហើយនៅពេលដែលយើង​បានជួយជាមួយអ្នកដែលមានបទពិសោធន៍ ទើបយើងយល់ច្បាស់ពីពាក្យថា Fintech នេះ»។

លោកស្រីថា ពាក្យ Fintech នេះគឺគ្រប់ដណ្ដប់លើសេវាជាច្រើន ហើយនេះជាលើទី១ ដែលយើងបានរៀបចំកម្មវិធីវេទិកានេះឡើង
ដើម្បីផ្សព្វផ្សាយឲ្យអាជ្ញាធរ ពាក់ព័ន្ធវិស័យធនាគារទាំងសមាគម Fintech នៅកម្ពុជាឲ្យយល់កាន់តែច្បាស់ពីវេទិការនេះ។

លោកស្រីបានបញ្ជាក់ទៀតថា ប្រព័ន្ធ Fintech មានសារសំខាន់ណាស់ ដោយធ្វើឲ្យសេវាហិរញ្ញវត្ថុមានការធូរថ្លៃជាងមុន ពីព្រោះមិនបាច់ធ្វើដំណើរឆ្ញាយ ទៅរកអតិថិជន, ងាយស្រួលក្នុងការគ្រប់គ្រង់សាច់ប្រាក់ជាងមុន ដោយមិនចាំបាច់ស្ពាយលុយ​យក​ទៅចែកចាយ ព្រោះឥឡូវការផ្ទេរ គឺផ្ទេរទៅតាមប្រព័ន្ធអេឡិចត្រូតនិចទាំងអស់ ដែលតម្រូវឲ្យអតិថិជនអាចជ្រើសរើសបាន ហើយរឹត​តែមានសារៈសំខាន់ចំពោះប្រទេសកម្ពុជាទាំងមូល ហើយក៏ជំរុញឲ្យមានតម្លាភាពចំពោះសេដ្ឋកិច្ចផងដែរ៕