(កំពង់ស្ពឺ)៖ លោក នរ រតនៈវឌ្ឍនោ រដ្ឋលេខាធិការក្រសួងធម្មការ និងសាសនា និងជាប្រធានក្រុមការងារគណបក្សប្រជាជនចុះជួយឃុំវល្ល័ស ស្រុកសំរោងទង ខេត្តកំពង់ស្ពឺ នៅព្រឹកថ្ងៃទី៩ ខែឧសភា ឆ្នាំ២០១៧នេះ បានដឹកនាំប្រជាពលរដ្ឋជាច្រើននាក់ រស់នៅឃុំវល្លស លើកទំនប់ការពារទឹក ដោយមានចប បង្គី ដើម្បីទៅជួយជុសជុល ខ្នងប្រឡាយសម្រាប់ទប់ទឹក ធ្វើស្រែប្រាំងក្នុងភូមិព្រៃកោះ និងភូមិវល្លិស ប្រវែងជាង២០ម៉ែត្រ ដែលបានដាច់ ដោយសារតែការបាក់ដីកន្លងទៅ។
លោក នរ រតនៈវឌ្ឍនោ បានឲ្យដឹងថា ដោយសារតែស្ថានភាពផ្លូវ ដែលបានធ្វើឲ្យពលរដ្ឋ ជួបការលំបាកឆ្លងកាត់ ជាពិសេសជាងនេះ ការធ្វើដំណើររបស់អ្នកភូមិ២ខាងលើ មកធ្វើការរោងចក្រ និងប្រកបការងាររកស៊ីគ្រប់មុខ។
លោកបន្តទៀតថា ដោយមើលឃើញស្ថានភាពបែបនេះ ក្រុមការងារបានស្នើ ដើម្បីជួយជួសជុលជាបន្ទាន់ តែមិនអាចឲ្យឡានដឹកដី ចូលចាក់បាន ទើបលោកបាននាំកម្លាំង បងប្អូនប្រជាពលរដ្ឋចុះជួយតែម្តង៕
