(ភ្នំពេញ)៖ លោក ហែម អាន ប្រធានក្រុមប្រឹក្សាខណ្ឌដូនពេញ និងលោក សុខ ពេញវុធ អភិបាលខណ្ឌ ព្រមទាំងលោក លោកស្រីជា សមាជិក សមាជិកាក្រុមប្រឹក្សាខណ្ឌ អធិការនគរបាលខណ្ឌ កងរាជអាវុធហត្ថខណ្ឌ និងមន្ត្រីរាជការថ្នាក់ខណ្ឌ សង្កាត់ ទូទាំងខណ្ឌដូនពេញ បានអញ្ញើញចូលរួមក្នុងពិធីក្រុងពាលីបើកការដ្ឋានសាងសង់ អគាររដ្ឋបាលថ្មីសាលាខណ្ឌដូនពេញ នៅទីតាំងសាលាខណ្ឌដូនពេញចាស់ ស្ថិតនៅក្នុងសង្កាត់វត្តភ្នំ នៅល្ងាចថ្ងៃទី៨ ខែឧសាភា ឆ្នាំ២០១៧នេះ។
អគារសាលាខណ្ឌដូនពេញ ដែលចាប់ផ្តើមសាងសង់ឡើងវិញនេះ ស្ថិតនៅទីតាំងផ្លូវលេខ៦១ កែងផ្លូវលេខ៩០ សង្កាត់ស្រះចក ខណ្ឌដូនពេញ មានកម្ពស់៥ជាន់ ស្មើរនិងដី៦៨៦ការ៉េ។
គួររំលឹកថា បុគ្គលិក និងមន្ត្រីរាជការ នៃសាលាខណ្ឌដូនពេញ បានរើសទីតាំងធ្វើការនៅអតីតសាលាន័រតុន ដែលស្ថិតនៅកែងផ្លូវលេខ១១៨ និង១៩ សង្កាត់ផ្សារចាស់ ខណ្ឌដូនពេញ។ ក្រោយពីមានការឯកភាព ពីសាលារាជធានីភ្នំពេញ ដែលបានប្រគល់ដីនោះទៅឲ្យទៅក្រុមហ៊ុន ហ្វុល អហ្វ អាស៊ីសអ៊ិនវេសមិនឌឺវេឡុបមិន ដើម្បីសាងសង់អគារថ្មី។
សាលារាជធានីភ្នំពេញ បានសម្រេចឲ្យសាលាខណ្ឌដូនពេញ រុះរ៉ើការិយាល័យរបស់ខ្លួន ទៅធ្វើការបណ្តោះអាសន្ននៅទីតាំងផ្សេងនោះ គឺដើម្បីប្រគល់ដីទៅឲ្យក្រុមហ៊ុន ហ្វុល អហ្វ អាស៊ីសអ៊ិនវេសមិនឌឺវេឡុបមិន ធ្វើការសាងសង់អគារថ្មីកម្ពស់៨ជាន់ ជូនសាលាខណ្ឌដូនពេញវិញ ជាថ្នូរនឹងការកាត់យកដីនៅផ្លូវកាច់ជ្រុង អស់ប្រមាណជាពីរភាគបីនៃផ្ទៃដីទំហំជាង២.០០០ម៉ែត្រការ៉េ របស់សាលាខណ្ឌដូនពេញទាំងមូល ព្រោះទីតាំងសាលាខណ្ឌដូនពេញនាបច្ចុប្បន្នដែលស្ថិតនៅ កែងផ្លូវលេខ៦១ និងផ្លូវលេខ៩០ មានទំហំជាង២.០០០ម៉ែត្រការ៉េ ជាប់ជាមួយនឹងអគារគណបក្សប្រជាជនកម្ពុជាខណ្ឌ ដែលទើបតែសង់រួចនាពេលថ្មីៗនេះផងដែរ៕
