(ព្រះវិហារ)៖ អាជ្ញាធរ និងសមត្ថកិច្ចចម្រុះស្រុកជាំក្សាន្ត ខេត្តព្រះវិហារ នៅថ្ងៃទី៨ ខែឧសភា ឆ្នាំ២០១៧នេះ បានចុះល្បាតតាមភូមិសាស្ត្រក្នុងព្រៃ តាមបណ្តោយខ្នងភ្នំដងរែក ត្រង់ចំណុចភូមិអានសេះ ឃុំឈើទាលគង ស្រុកជាំក្សាន្ត ក្នុងគោលបំណងទប់ស្កាត់ការឆ្លងដែនខុសច្បាប់ ចូលកាប់ឈើគ្រញូង ក្នុងទឹកដីថៃ ដែលកន្លងមកបានបង្កគ្រោះថ្នាក់ ដោយសារជាន់មីនបណ្តាលឲ្យស្លាប់ និងរបួសជាហូរហែរ។
អភិបាលស្រុកជាំក្សាន្ត លោក ជា គឹមសេង បានថ្លែងថា ប្រតិបត្តិការនេះបានធ្វើឡើង តាមបទបញ្ជារបស់លោក អ៊ុន ចាន់ដា អភិបាលខេត្តព្រះវិហារ និងជាប្រធានគណៈបញ្ជាការឯកភាពខេត្ត ដែលបានបញ្ជាឲ្យមន្រ្តីក្រោមឱវាទ រួមគ្នាទប់ស្កាត់ការឆ្លងដែនខុសច្បាប់ របស់ប្រជាពលរដ្ឋខ្មែរ ចូលក្នុងទេកដីថៃ រកការងារធ្វើ ពិសេសប្រជាពលរដ្ឋខ្មែរឆ្លងដែនចូលកាប់ឈើគ្រញូង ដែលកន្លងមកតែងប្រឈមគ្រោះថ្នាក់ផ្សេងៗ ក្នុងនោះមានទាំងការជាន់មីន បណ្តាលឲ្យស្លាប់ និងរបួសផងដែរ។
លោកថា នៅថ្ងៃនេះលោកបានដឹកនាំកងកម្លាំងសមត្ថកិច្ចទាំង៣របស់ស្រុក ប្រមាណ២៥នាក់ ចុះល្បាតនៅចំណុចពងចាប និងចំណុចក្របីងាប់ ក្នុងភូមិអានសេះ ឃុំឈើទាលគង ស្រុកជាំក្សាន្ត ហើយក៏បានប្រទះឃើញប្រជាពលរដ្ឋខ្មែរ ស្ពាយឈើគ្រញូង និងបានឃាត់ខ្លួន ជាបន្តបន្ទាប់បាន៣នាក់ រីឯមួយចំនួនទៀតបានរត់គេចខ្លួន។
លោកអភិបាលស្រុក បានបន្តថា កន្លងមកអាជ្ញាធរបានផ្សព្វផ្សាយអប់រំប្រជាពលរដ្ឋ ស្តីពីគ្រោះថ្នាក់ផ្សេងៗ ដែលកើតឡើងដោយការឆ្លងដែនខុសច្បាប់ ពិសេសគ្រោះថ្នាក់ដោយសារឆ្លងដែន ចូលកាប់ឈើគ្រញូង តែប្រជាពលរដ្ឋហាក់មិនភយ័ខ្លាចនោះទេ ដែលករណីនេះ អាចបណ្តាលមកពីមានការ បញ្ចុះបញ្ចូលពីមេខ្យល់។
ជាមួយគ្នានេះ លោកអភិបាលស្រុក ក៏សំណូមពរឲ្យសមត្ថកិច្ចប្រចាំការ នៅតាមចំណុចព្រំដែនផ្សេងៗ ត្រូវចូលរួមសហការ ទប់ស្កាត់ករណីនេះ ទើបយើងធ្វើបានជោគជ័យ។ ក្រោយការឃាត់ខ្លួនជនទាំង៣នាក់រួមនិងឈើគ្រញូងបានប្រគល់ជូនអធិការនគរបាលស្រុកជាំក្សាន្ត ចាត់ការបន្ត។
លោកវរសេនីយ៍ រួន យ៉េត អធិកសរនគរបាលស្រុកជាំក្សាន្ត បានថ្លែងនៅល្ងាចថ្ងៃនេះថា ជនទាំង៣នាក់ ដែលសមត្ថកិច្ចឃាត់ខ្លួន រស់នៅភូមិរលំថ្ម ឃុំរំដោះស្រែ ស្រុកជាំក្សាន្ត ដកហូតឈើគ្រញូងបាន៤១ដុំ ស្មើនិង៣២១គីឡូក្រាម។ លោកបន្តថា ជនទាំង៣នាក់ល រួមនិងវត្ថុតាងត្រូវបានប្រគល់ជូនជំនាញរដ្ឋបាលព្រឈើចាត់ការបន្ត៕
