(ភ្នំពេញ)៖ ខណៈដែលកាកបាទក្រហមកម្ពុជា បានរៀបចំប្រារព្ធ ខួបទី១៥៤ ទិវាពិភពលោកកាកបាទក្រហម អឌ្ឍចន្ទក្រហម០៨ឧសភា ២០១៧ នៅព្រឹកថ្ងៃទី០៨ ខែឧសភា ឆ្នាំ២០១៧នេះ ក្រោមប្រធានបទ «កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា» ដើម្បីប្រមូលថវិកា សម្រាប់ជួយប្រជាពលរដ្ឋរងគ្រោះនានា ទូទាំងប្រទេសនោះ បុរី ប៉េង ហួត បានចូលរួមចំណែកជាថវិកា ជូនដល់កាកបាទក្រហមកម្ពុជា ចំនួន១០ម៉ឺនដុល្លារ សហរដ្ឋអាមេរិក ដើម្បីយកទៅប្រើប្រាស់ ក្នុងការបន្តបេសកកម្មការងារមនុស្សធម៌របស់ខ្លួន។
ការចូលរួមចំណែកជាថវិកាចំនួន១០ម៉ឺនដុល្លារ សហរដ្ឋអាមេរិក ជូនដល់កាកបាទក្រហមកម្ពុជានៅពេលនេះ គឺដើម្បីយកទៅប្រើប្រាស់ ក្នុងការបន្តបេសកកម្មមនុស្សធម៌ ដ៏ឧត្តុង្គឧត្តម និងធ្វើប្រតិបត្តិការ ជួយសម្រាលទុក្ខលំបាករបស់បងប្អូន ប្រជាពលរដ្ឋរងគ្រោះបំផុត ដែលរួមមាន អ្នករងគ្រោះដោយមហន្តរាយផ្សេងៗ ដូចជា ជនពិការ ចាស់ជរាឥតទីពឹង កុមារកំព្រា ស្ត្រីមេម៉ាយ អ្នកផ្ទុកមេរោគអេដស៍ ជំងឺអេដស៍។ល។ នៅតាមសហគមន៍ ជនបទនានា ឲ្យបានឆាប់រហ័ស និងទាន់ពេលវេលា ដោយពុំមានការរើសអើង បែងចែកពូជសាសន៍ ជំនឿសាសនា និន្នាការនយោបាយអ្វីឡើយ។
កន្លងមក បុរី ប៉េង ហួត តែងតែបានចួលរួមសកម្មភាពសង្គម និងមនុស្សធម៌នានាជាច្រើន។ ជាក់ស្ដែងនាពេលថ្មីៗកន្លងមកនេះ បុរី ប៉េង ហួត បានចែករំលែកអំណោយ ជូនប្រជាពលរដ្ឋ សាងសង់ផ្លូវថ្នល់ ព្រះវិហារ សាលារៀន ចូលរួមវិភាគទានជូនដល់មន្ទីរពេទ្យ «គន្ធបុប្ផា» និងផ្ទះទេវតា តាមរយៈមូលនិធិបាយ័ន ព្រមទាំងបានផ្តល់ជូនអាហារូបករណ៍ ដល់និស្សិតមកពីបណ្ដា ខេត្តនានាជាង១០០កន្លែង នៅសាកលវិទ្យាល័យកម្ពុជា ផងដែរ។
ស្តែងចេញពីសកម្មភាពទាំងនេះ បុរី ប៉េង ហួត នឹងបន្តសកម្មភាពដ៏ប្រពៃនេះបន្តទៀត ក្នុងការចូលរួមចំណែកជាមួយរដ្ឋាភិបាល ក្នុងកាត់បន្ថយភាពក្រីក្រ និងអភិវឌ្ឍសង្គមជាតិ៕
