(កំពង់ស្ពឺ)៖ លោកឧត្តមសេនីយ៍ត្រី សោម សាម៉ុន មេបញ្ជាការរង តំណាងមេបញ្ជាការកងរាជអាវុធហត្ថខេត្តកំពង់ស្ពឺ នៅថ្ងៃទី០៨ ខែឧសភា ឆ្នាំ២០១៧នេះ បានរៀបចំពិធី អប់រំចិត្តសាស្ដ្រ ដល់នាយទាហាន នាយទាហានរង មកពីមន្ទីរទាំង៥ ក្រុង-ស្រុកស្នាក់ការសន្តិសុខ កងអនុសេនាធំចល័តលេខ២៣ សរុប១៧១នាក់។
លោកឧត្តមសេនីយ៍ត្រី សោម សាម៉ុន បានលើកឡើង ចំពោះការងារអប់រំចិត្តសាស្ត្រ អំពីគោលបំណងការអប់រំចិត្តសាស្ត្រថា ជាការពង្រឹងគោលជំហរសតិអារម្មណ៍ ស្មារតី ចំពោះនាយទាហាន នាយទាហានរង និងពលទាហាន នៃកងរាជអាវុធហត្ថគ្រប់រូប ក្តាប់ជាប់នូវការវិវត្តន៍ថ្មីៗ នៃសភាពការណ៍នយោបាយ និងសន្តិសុខសង្គមជាប្រចាំ។
ក្នុងនោះលោក បានបញ្ជាក់ឲ្យនាយទាហាន នាយទាហានរង និងពលអាវុធហត្ថយល់ជ្រួតជ្រាបនៅតួនាទី ភារកិច្ច និងបេសកម្មរបស់កងរាជអាវុធហត្ថ ក្នុងការបម្រើជាតិមាតុភូមិ និងប្រជាពលរដ្ឋ ប្រកបដោយមនសិការស្នេហាជាតិ មានឆន្ទៈមោះមុត ស្មោះត្រង់ដាច់ខាតចំពេះ ជាតិ សាសនា ព្រះមហាក្សត្រ និងរាជរដ្ឋាភិបាល ស្របច្បាប់។
លោកឧត្តមសេនីយ៍ត្រី និងជាគ្រូឧទ្ទេសផ្នែកអប់រំចិត្តសាស្ត្រ បានរំលឹក «ក្នុងនាមយើជាកងកម្លាំងដាច់ខាតត្រូវពង្រឹងសមត្ថភាព ចំណេះដឹង ជំនាញ ចំណេះដឹងទូទៅ ចំណេះដឹងផ្នែកច្បាប់ បទបញ្ជារួមទាំងវិន័យ ក្រមសីលធម៌ វិជ្ជាជីវៈជាយោធាច្បាប់ និងកម្មវិធីគោលនយោបាយរបស់រាជរដ្ឋាភិបាល»។
លោកមេបញ្ជការរងបានបន្តថា ត្រូវជំរុញគ្រប់បណ្តាអង្គភាពនានា និងសមាសភាពដែលមានការពាក់ព័ន្ធ ត្រូវម្ចាស់ទទួលខុសត្រូវ រៀបចំចាត់ចែងចូលរួមអនុវត្ត ដើម្បីសម្រេចបានផែនការអប់រំចិត្តសាស្ត្រ បន្តពីគ្រូបង្គោលឲ្យបានគ្រប់ៗគ្នា ហើយគ្រប់ផ្នែកក្នុងការអប់រំចិត្តសាស្ត្រ ត្រូវធានាឲ្យបានទាំងបរិមាណ និងគុណភាព ហើយក្តាប់ជាប់នូវទស្សនៈ គោលជំហរ និងការវិវត្តប្រែប្រួលសតិអារម្មណ៍ របស់អាវុធហត្ថគ្រប់រូប នៅគ្រប់កាលៈទេសៈ និងតាមដំណាក់កាលរបស់ប្រទេសជាតិ ខិតជិតមកដល់ នៃការបោះឆ្នោតក្រុមប្រឹក្សាឃុំ-សង្កាត់ នាពេលខាងមុខ ត្រូវមានវិធានការចាំបាច់ ដោះស្រាយជូនដល់កងកម្លាំងឲ្យទាន់ពេលវេលា៕
