(ភ្នំពេញ)៖ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានប្រកាសថា សម្ដេចមិនអនុញ្ញាតិឲ្យ មន្ទីរពេទ្យគន្ធបុប្ផាដួលរលំជាដាច់ខាត បើទោះបីជាអវត្តមាន លោកវេជ្ជបណ្ឌិត Beat Richner ដែលជាស្ថាបនិក និងជាប្រធានមន្ទីរពេទ្យនេះក៏ដោយ។
ការបញ្ជាក់យ៉ាងដូច្នេះ របស់សម្ដេចតេជោ ត្រូវបានធ្វើឡើង នៅព្រឹកថ្ងៃទី០៨ ខែឧសភា ឆ្នាំ២០១៧នេះ ក្នុងឱកាសអញ្ជើញជាអធិបតី ក្នុងទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា។
ប្រមុខរាជរដ្ឋាភិបាលកម្ពុជារូបនេះ ថ្លែងយ៉ាងដូច្នេះថា «បើទោះបីជា លោកវេជ្ជបណ្ឌិត Beat Richner ដែលជាអ្នករៀបចំនូវ មន្ទីរពេទ្យនេះ កំពុងស្ថិតក្នុងស្ថានភាពមានជំងឺ តែយើងមិនត្រូវទុកឲ្យមន្ទីរពេទ្យមួយនេះដួលរលំ ដោយសារអវត្តមានរបស់វេជ្ជបណ្ឌិត Richner នោះទេ»។
សូមជម្រាបថា កាកបាទក្រហមកម្ពុជាដោយគិតចាប់តាំងពីឆ្នាំ២០១២មក បានបរិច្ចាកថវិកា ១លានដុល្លារជារៀងរាល់ឆ្នាំ ដល់មន្ទីរពេទ្យគន្ធបុប្ផាដើម្បីផ្គត់ផ្គង់ទៅលើការចំណាយផ្សេងៗ។ ជាក់ស្ដែងនៅក្នុងទិវាពិភពលោកកាកបាទក្រហម អឌ្ឍចន្ទក្រហម ៨ ឧសភា នាព្រឹកមិញនេះ កាកបាទក្រហមកម្ពុជា បានបន្ដឧបត្ថម្ភថវិកា១លានដុល្លារ ដល់មន្ទីរពេទ្យនេះផងដែរ។
ជាមួយនឹងការផ្ដល់ថវិកានេះ សម្ដេចតេជោ ហ៊ុន សែន បានសម្ដែងនូវការរីករាយ អំពីការបន្ដផ្ដល់ថវិកាមួយលានដុល្លារសហរដ្ឋអាមេរិក ដែលបានចូលមកពីការចូលរួមវិភាគទាននៅថ្ងៃនេះ ដល់មន្ទីរពេទ្យគន្ធបុប្ផា។ បន្ថែមពីនេះសម្ដេចតេជោ ក៏បានធ្វើការអំពាវនាវឲ្យសប្បុរសជនទាំងអស់ បន្ដសកម្មភាពមនុស្សធម៌ទាំងនេះទៀត ដើម្បីបង្កលក្ខណៈឲ្យមន្ទីរពេទ្យមួយនេះ បានបន្ដការងារសង្គ្រោះកុមារកម្ពុជាថែមទៀតផងដែរ។
សូមរំលឹកថា នៅថ្ងៃទី២៨ ខែមីនា ឆ្នាំ២០១៧កន្លងទៅ ស្ថាបនិក និងប្រធាន មន្ទីរពេទ្យមនុស្សធម៌ដ៏ធំនៅកម្ពុជាគន្ធបុប្ផា លោកវេជ្ជបណ្ឌិត Beat Richner បានទទួលរងនូវជំងឺជាទំងន់ ហើយទៅសម្រាកព្យាបាលនៅប្រទេសស្វីស ហើយលោកក៏បានលាលែងពីតំណែង ដោយត្រូវប្រគល់តួនាទីជូន លោកវេជ្ជបណ្ឌិត Peter Studer ដែលជាអនុប្រធានមន្ទីរពេទ្យគន្ធបុប្ផា។
លោកវេជ្ជបណ្ឌិត Richner បានចាប់ផ្តើមបើកដំណើរការមន្ទីរពេទ្យ មនុស្សធម៌គន្ធបុប្ផាជួយព្យាបាលកុមារកម្ពុជា ដោយឥតគិតថ្លៃតាំងពីឆ្នាំ១៩៩២មកម្ល៉េះ។ គិតមកដល់ត្រឹមឆ្នាំ២០១៦ មន្ទីរពេទ្យគន្ធបុប្ផាបានចំណាយថវិការជាង ៥០០លានដុល្លារ សម្រាប់ការព្យាបាល ក្នុងនោះប្រមាណ ៤០០លានដុល្លារ បានមកពីសប្បុរសជននៅប្រទេសស្វីស និងប្រមាណ ៧ភាគរយជាការចូលរួមរបស់រាជរដ្ឋាភិបាលកម្ពុជា ៨.៨% ជាការចូលរួមរបស់រដ្ឋាភិបាលស្វីស (រដ្ឋាភិបាលស្វីស បានផ្តល់ជំនួយដល់មន្ទីរពេទ្យគន្ធបុប្ផា៤លានដុល្លារ ជារៀងរាល់ឆ្នាំ) ក្រៅពីនោះជាការចូលរួម របស់សប្បុរសជនក្នុង និងក្រៅស្រុកដទៃទៀតផងដែរ៕
សូមស្តាប់ប្រសាសន៍សម្តេចតេជោ ហ៊ុន សែន៖
