(ស្វាយរៀង)៖ នាយឧត្តមសេនីយ៍ ម៉ឹង សំផន រដ្ឋលេខាធិការក្រសួងការពារជាតិ អនុប្រធានក្រុមការងារថ្នាក់ជាតិចុះជួយខេត្តស្វាយរៀង និងជាប្រធានក្រុមការងារថ្នាក់ជាតិចុះជួយមូលដ្ឋានស្រុកចន្ទ្រា និងក្រុងបាវិត ខេត្តស្វាយរៀង កុំចាញ់បោកការឃោសនានយោបាយ របស់គណបក្សផ្សេង ឬអ្នកនយោបាយមួយចំនួន ដែលតែងតែដើរបំផុសបំផុលបោកប្រាស់ ខុសការពិតតាមរូបភាពផ្សេងៗ។
ការអំពាវនាវរបស់នាយឧត្តមសេនីយ៍បែបនេះ ក្នុងឱកាសជួបសំណេះសំណាលជាមួយមន្ត្រីរាជការ គ្រូបង្រៀន កងកម្លាំងប្រដាប់អាវុធទាំង៣ប្រភេទ អតីតយុទ្ធជន និវត្តជន មន្ត្រីថ្នាក់សង្កាត់ភូមិ ព្រមទាំងក្រុមយុវជនគណបក្សប្រជាជនកម្ពុជា ស្រុកចន្ទ្រា ជិត១ពាន់នាក់ នាព្រឹកថ្ងៃទី០៧ ខែឧសភា ឆ្នាំ២០១៧នេះ។
លោកនាយឧត្តមសេនីយ៍ ម៉ឹង សំផន បានរំកឡើងវិញពីប្រវត្តិសាស្ត្រមួយចំនួន ដែលកម្ពុជាធ្លាប់ឆ្លងកាត់ ពីប្រទេសដែលពោលពេញដោយភ្លើងសង្គ្រាម ទុក្ខវេទនា នាពេលកន្លងមក ប៉ុន្តែក្រោយថ្ងៃរំដោះ ៧មករា ១៩៧៩ កម្ពុជាបានផ្លាស់ប្តូរមុខមាត់ថ្មី ទាំងអស់នោះ គឺបានដោយសារការខិតខំប្រឹងប្រែងរបស់ថ្នាក់ដឹកនាំគណបក្សប្រជាជនកម្ពុជា។
លោកនាយឧត្តមសេនីយ៍បានបន្តថា ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានធ្វើឲ្យប្រទេសជាតិដែលសេសសល់ពីបាទដៃទទេរ ប្រែមុខមាត់ថ្មី មានការរីកចម្រើន និងអភិវឌ្ឍឥតឈប់ឈរលើគ្រប់វិស័យ ដែលធ្វើឲ្យឆាកអន្តរជាតិទទួលស្គាល់។
នាយឧត្តមសេនីយ៍ ម៉ឹង សំផន ក៏បានធ្វើការអំពាវនាវឲ្យប្រជាពលរដ្ឋ មន្ត្រីរាជការ និងកងកម្លាំងប្រដាប់អាវុធទាំងអស់ ត្រូវជឿជាក់លើគណបក្សប្រជាជនកម្ពុជា ហើយសូមបោះឆ្នោតជូនគណបក្ស ព្រោះថាមានតែមេឃុំ-ចៅសង្កាត់គណបក្សប្រជាជនកម្ពុជាដឹងពីសុខទុក្ខរបស់ប្រជាពលរដ្ឋមូលដ្ឋាន ហើយក៏សូមឲ្យបងប្អូនប្រជាពលរដ្ឋទាំងអស់ កុំចាញ់បោកការឃោសនានយោបាយរបស់គណបក្សផ្សេង ឬអ្នកនយោបាយមួយចំនួន ដែលតែងតែដើរបំផុសបំផុល បោកប្រាស់តាមរូបភាពផ្សេងៗ។
លោកនាយឧត្តមសេនីយ៍ ក៏បានសំណូមពរឲ្យបងប្អូនប្រជាពលរដ្ឋទាំងអស់ ត្រូវរួមគ្នាថែក្សាសន្តិភាព ដែលគណបក្សប្រជាជនកម្ពុជាបានខិតខំ កន្លងមក ដើម្បីឲ្យបានស្ថិតស្ថិរយូរអង្វែង សម្រាប់ប្រទេសជាតិ និងកូនចៅជំនាន់ក្រោយ ហើយចូលរួមបោះឆ្នោតទាំងអស់គ្នា នាពេលខាងមុខ ដើម្បីបន្តគាំទ្រគណបក្សប្រជាជនកម្ពុជា ដឹកនាំជាតិមាតុភូមិតទៅមុខទៀត៕
