(ប៉ារីស)៖ ប្រជាជនបារាំង នៅថ្ងៃអាទិត្យនេះ នឹងធ្វើការសម្រេចចិត្តជ្រើសរើសជាលើកចុងក្រោយ រវាងបេក្ខជន ប្រធានាធិបតីទំាងពីរ គឺលោក Emmanuel Macron និងលោកស្រី Marine Le Pen ដែលនឹងដឹកនាំបារាំងនារយៈ ពេល០៥ឆ្នាំបន្ទាប់ ក្រោយពីពួកគេបានទទួលជ័យជម្នះ កាលពី ក្នុង ការបោះឆ្នោតជ្រើសរើសប្រធានាធិបតីបារាំង ជុំទី០១។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters​ នៅថ្ងៃអាទិត្យ ទី០៧ ខែឧសភា ឆ្នាំ២០១៧។

នៅក្នុងការបោះឆ្នោតជុំទី០១ កាលពីថ្ងៃទី២៣ ខែមេសា លោក Macron និង លោកស្រី Le Pen ​គឺជាបេក្ខជនតែពីរនាក់គត់ ដែលបានឈានចូល បន្តការបោះឆ្នោតជុំទី០២។ អ្នកទំាងពីរ បានបង្កើតប្រវត្តិសាស្ត្រថ្មី សម្រាប់នយោបាយបារាំងនោះគឺ បិទបញ្ចប់ការដឹកនាំរបស់បេក្ខជនមកពី គណបក្សសង្គមនិយម និងគណបក្សសាធារណរដ្ឋ ដែលតែងតែផ្លាស់វេនគ្នាដឹកនាំប្រទេសបារាំង អស់រយៈពេលរាប់សិបទសវត្សរ៍មកនេះ។

គួរបញ្ជាក់ថា កាលពីនៅការបោះឆ្នោតជុំទី០១ លោក Macron ​បាននាំមុខលោកស្រី Le Pen ដោយទទួលបានសំឡេងគាំទ្រ​ ២៣.៧ភាគរយ ទល់នឹង២១.៧ភាគរយ។ ជាងនេះទៅទៀត ការស្ទង់មតិជាច្រើន ក៏នៅតែបង្ហាញដដែលថាលោក Macron មានលទ្ធភាពខ្ពស់ថាអាចនឹងឈ្នះ ក្នុងការបោះឆ្នោតជុំទី០២នេះ ដោយប្រជាជនបារាំង ៦២ភាគរយ នឹងបោះឆ្នោតគាំទ្ររូបលោក រីឯ៣៧ភាគរយ គាំទ្រលោកស្រី Le Pen៕