(ភ្នំពេញ)៖ ឧបនាយករដ្ឋមន្ដ្រី ម៉ែន សំអន រដ្ឋមន្ត្រីក្រសួងទំនាក់ទំនងរដ្ឋសភាព្រឹទ្ធសភា និងអធិការកិច្ច តំណាងសម្ដេចកិតិ្ដព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា បានបញ្ជាក់ថា ព្រះពុទ្ធសាសនាជាសាសនារបស់រដ្ឋ និងជាកម្លាំងដឹកនាំចរិយាធម៌សង្គម ឲ្យមនុស្សគ្រប់រូប ដើរតាមផ្លូវល្អ មិនតែប៉ុណ្ណោះ ព្រះពុទ្ធសាសនា ក៏ត្រូវចូលរួមបំពេញកុសលទាំងឡាយ ដើម្បីជាគុណប្រយោជន៍ ដល់ការថែរក្សាការពារ សេចក្តីសុខសន្តិភាព ស្ថេរភាព សាមគ្គីភាព ក្តីសង្ឃឹម លើកស្ទួយ ការកសាងជាតិឆ្ពោះទៅរកសេចក្តីថ្កុំថ្កើង រុងរឿង សម្បូរ សប្បាយ។
ថ្លែងបញ្ជាក់បែបនេះ ធ្វើឡើងក្នុងឱកាស លោកស្រីឧបនាយករដ្ឋមន្ដ្រី ចូលរួមបញ្ចុះបឋមសិលាកសាងចូឡាមណីចេតិយ៏ សម្រាប់តំកម្កល់ព្រះបរមសារីរិកធាតុ ឧទ្យានជាតិគិរីរម្យ នៅថ្ងៃទី០៥ ឧសភា ឆ្នាំ២០១៧។
ឧបនាយករដ្ឋមន្ដ្រី ម៉ែន សំអន បានបញ្ជាក់ថា ដើម្បីរក្សាបាននូវភាពបរិសុទ្ធ ថ្លៃថ្នូរយូរអង្វែងលើវិស័យព្រះពុទ្ធសាសានានោះ ពុទ្ធសាសនិកជន អ្នកកាន់ព្រះពុទ្ធសាសនាទាំងអស់ ត្រូវប្រកាន់ឲ្យបានភ្ជាប់នូវការគោរពប្រតិបត្តិសាសនាឲ្យបានល្អ ព្រោះជាសាសនារបស់រដ្ឋ។
ជាក់ស្តែង នាពេលនេះបងប្អូន និងអស់លោកទាំងអស់ មានសប្បុរសជន ទាំងអ្នកក្នុងស្រុក និងនៅក្រៅប្រទេសបានរួបរួមកម្លាំងសាមគ្គីគ្នា ប្រមូលបច្ច័យនាំមកសាងចូឡាមណីចេតិយ ដែលគ្រោងនឹងបញ្ចប់នាពេលដ៏ខ្លីខាងមុខនេះ នៅត្រង់ចំណុចបេះដូង និងជាផ្នែកមួយដ៏សំខាន់បំផុត របស់មជ្ឈមណ្ឌលវប្បធម៌ព្រះពុទ្ធសាសានា និងក្លាយទៅជាសមិទ្ធិផលថ្មីមួយទៀត នៅលើទឹកដីខេត្តកំពង់ស្ពឺ។
ម្យ៉ាងទៀតដែលជាផ្នែកមួយ ដ៏សំខាន់បានរួមចំណែកសម្រាប់ទាក់ទាញពុទ្ធសាសនិក និងទេសចរណ៍ឲ្យចូលមកទស្សនាបាន ឃើញគោរពប្រតិបត្តិ ក៏ដូចជំរុញលើវិស័យទេសចរណ៍ធម្មជាតិ និងទេសចរណ៍សាសនា វប្បធម៌ ជាតិខ្មែរ កាន់តែល្បីនៅក្នុងប្រទេសកម្ពុជា ពិសេសនៅខេត្តកំពង់ស្ពឺ ឲ្យបានកាន់តែល្បី និងរីកចម្រើនបានថែមមួយកម្រិតទៀត។
ឧបនាយករដ្ឋមន្ត្រី ក្នុងនាមសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហម និងរាជរដ្ឋាភិបាល ពិតជាមានសេចក្តីសោមនស្សរីករាយ ដោយបានចូលរួមជាមួយ លោក លោកស្រី អ្នកនាងកញ្ញា លោកយាយ លោកតា និងបងប្អូនប្រជាពលរដ្ឋ នៅក្នុងពិធីបញ្ចុះបឋមសិសាចូឡាមណីចេតិយ សម្រាប់តម្កល់ព្រះបរមសារីរិកធាតុ នៅក្នុងសួនជាតិគិរីរម្យខេត្តកំពង់ស្ពឺ នាពេលនេះ។
ដូច្នេះព្រឹត្តិការណ៍នេះ ពិតបានឆ្លុះបញ្ចាំងឲ្យឃើញមហាសាមគ្គីភាព ក្នុងសង្គមកម្ពុជាទាំងមូល ដែលជួបជុំគ្នា សម្ដែងសេចក្តីស្រឡាញ់ទៅវិញទៅមក តាមមាគ៌ាព្រះពុទ្ធសាសានា រួមចំណែកកាត់បន្ថយ និងលប់បំបាត់អំពើអកុសល អំហឹង្សាផងទាំងពួងក្នុងសង្គម និងឈោងចាប់យកសុខសន្តិភាព ដ៏ពេញលេញជាមួយសុខមាលភាពផ្លូវកាយ ផ្លូវចិត្ត ដែលធ្វើឲ្យសង្គមជាតិកាន់តែអភិវឌ្ឍន៏ ប្រកបដោយសេចក្តីសុខក្សេមក្សាន្ត។ ដូច្នេះ ពិធីសាសនាសំខាន់មួយនេះ នឹងបានចូលរួមលើស្ទួយវិស័យព្រះពុទ្ធសាសនា ឲ្យកាន់តែរីកចម្រើនទូលំទូលាយឡើង ដើម្បីបុព្វហេតុសន្តិភាព សុខដមរមនាក្នុងសង្គម និងការអភិវឌ្ឍនសង្គម សេដ្ឋកិច្ចប្រកបដោយចីរភាព។
ជាមួយគ្នានោះ ឧបនាយករដ្ឋមន្ដ្រី បានផ្តាំផ្ញើដល់បងប្អូនប្រជាពលរដ្ឋ លោកយាយ លោកតា កម្មករ កម្មការិនីទាំងអស់ សូមកំភ្លេចនាំគ្នាអញ្ជើញទៅបោះឆ្នោតជ្រើសរើសឃុំ-សង្កាត់ ឲ្យបានគ្រប់ៗគ្នា នៅថ្ងៃទី០៤ មិថុនា ឆ្នាំ២០១៧នេះ កុំបីខកខានឡើយ៕
