(ព្រៃវែង)៖ ពិតជាគួរឲ្យរន្ធត់ ដោយអ្នកកាសែត២នាក់ ម្នាក់នៅអង្គភាព Cambodia Post និងម្នាក់ទៀតនៅអង្គភាពទូរទស្សន៍នាគព័ន្ធ (NTV) បានបើករថយន្ដម៉ាកទីកូ ទៅបុករថយន្ដកុងតឺន័រ ចំពីមុខពេញទំហឹង បណ្ដាលឲ្យម្នាក់ស្លាប់ និងម្នាក់ទៀតរងរបួសធ្ងន់។ ហេតុការណ៍គ្រោះថ្នាក់ ចរាចរណ៍នេះ កើតឡើងនៅយប់ថ្ងៃទី០៤ ខែឧសភា ឆ្នាំ២០១៧ ​លើផ្លូវជាតិលេខ១ ចំណុច​ភូមិកំពង់ត្របែក ឃុំកំពង់ត្របែក ស្រុកកំពង់ត្របែក។

នៅរសៀលថ្ងៃទី៥ ខែឧសភា ឆ្នាំ២០១៧នេះ លោកឧត្តមសេនីយ៍ទោ ស្រេង ជា ស្នងការនគរបាលខេត្តព្រៃវែង បានឲ្យដឹងថា ករណីនេះ​បង្ក​ឡើងដោយ រថយន្តម៉ាកទីកូ ពណ៌ឈាមជ្រូក ស្លាកលេខភ្នំពេញ 2I-4693 បើកបរដោយឈ្មោះ ធូ ធី ​អាយុ២៥ឆ្នាំ នៅភូមិគោខ្ចក ឃុំគោខ្ចក ស្រុកកំពង់ត្របែក ដោយបើកក្នុងទិសដៅពីលិចទៅកើត លុះដល់ចំណុចខាងលើ បានរេចង្កូតមកឆ្វង ​បុកចំពីមុខ​​រថយន្តកុងតឺន័រ ម៉ាក FUSO ពណ៌ឈាមជ្រូក ស្លាកលេខភ្នំពេញ 4A-0905 ​អ្នកបើកប​ររថយន្តបង្ក រងរបួសធ្ងន់ និងរួមដំណើរឈ្មោះ ​គង់ ​ហ៊ីម អាយុ៣៥ឆ្នាំ រស់នៅភូមិចំរ៉េះ ឃុំគោខ្ចក ស្រុកកំពង់ត្របែក ស្លាប់នៅកន្លែង។ ដោយឡែកភាគីរថយន្ដកុងតឺន័រ បានរត់គេចខ្លួនបាត់ស្រមោល។

ក្រោយសមត្ថកិច្ចជំនាញ បានចុះទៅដល់កន្លែងកើតហេតុភ្លាមៗ​ ដើម្បីបញ្ជូនជនរងគ្រោះទៅសង្គ្រោះ នៅគ្លីនិកឯកជន ចំណែករថយន្ត ត្រូវបានយកទៅរក្សាទុកនៅអធិការដ្ឋានស្រុក ដើម្បីដោះស្រាយតាមច្បាប់។

បើតាមសមត្ថកិច្ចមូលដ្ឋាន ជនរងគ្រោះទាំង២នាក់ កំពុងធ្វើដំណើរចេញពីកន្លែងជប់លាងមួយ ហើយសង្ស័យមានអការៈស្រវឹងផងដែរ៕