(ភ្នំពេញ)៖ ម្ចាស់ផលិតផលគ្រឿងសំអាងម៉ាក MoMo By Sreymom របស់ក្រុមហ៊ុន អេសអ៊ឹម ហ្គូដ (ខេមបូឌា) SM Good (Cambodia) Co.,LTD បានធ្វើការព្រមានធ្ងន់ៗ ដល់ម្ចាស់ Page និង​គេហទំព័រ United News International ដែលបានផ្សាយ ធ្វើឲ្យប៉ះពាល់ធ្ងន់ធ្ងរ ដល់ផលិផល MoMo របស់ខ្លួន បង្កឲ្យមានការភ័ន្តច្រឡំ ពីសំណាក់សា​ធារណជន ជាពិសេសអតិថិជន​ ដែលកំពុងតែមានការគាំទ្រ និងបានស្នើឲ្យ ​មានការកែតម្រូវការផ្សាយរបស់ខ្លួន ជាបន្ទាន់។

ម្ចាស់ផលិតផលគ្រឿង​សំអាង MoMo លោក គឹម សីហា ជាតារាសម្ដែង និង អ្នកនាង គង់ ច័ន្ទស្រីមុំ ជាតារាសម្ដែង​ដ៏មាន​ប្រជាប្រិយ​ភាពដូចគ្នា បានថ្លែងប្រាប់បណ្ដាញ​​សារព័ត៌មាន​ក្នុងស្រុកថា ក្រុមហ៊ុនបានរៀបចំមេធាវី និងរៀបចំពាក្យបណ្ដឹង​រួចរាល់ហើយ ដើម្បីត្រៀមធ្វើការប្ដឹង​ដល់​ម្ចាស់ Page និង​គេហទំព័រ United News International ដែលបានផ្សាយ កាលពីថ្ងៃទី០២ ខែឧសភា ឆ្នាំ២០១៧កន្លងមកនេះ ធ្វើឲ្យប៉ះពាល់ធ្ងន់ធ្ងរ ដល់ផលិផល MoMo ដែលកំពុងតែចរាចរណ៍លក់ នៅលើទីផ្សារ​ក្នុងប្រទេសកម្ពុជា។

លោក គឹម សីហា បានបន្តឲ្យដឹងថា ផលិតផល ម៉ូម៉ូ (Mo Mo By Srey mom) របស់ក្រុមហ៊ុន អេសអ៊ឹម ហ្គូដ (ខេមបូឌា) SM Good (Cambodia) Co.,LTD មិនមានពាក់ព័ន្ធទៅនឹង ផលិតផលក្លែងក្លាយ និងផលិតផលខុសច្បាប់ ហាមឃាត់ដែលគណៈកម្មាធិកាប្រយុទ្ធ ប្រឆាំងផលិតផលក្លែងក្លាយ បានធ្វើការហាមឃាត់ និងរឹបអូសនោះទេ ហើយការដែលម្ចាស់ Page និង​គេហទំព័រ United News International ធ្វើការបង្ហោះវីដេអូ អំពីការរឹបអូស​ផលិតផលក្លែងក្លាយ និងផលិផល​ហាមឃាត់ របស់អាជ្ញាធរប្រឆាំង​ផលិតផលក្លែងក្លាយ និងបង្ហោះភ្ជាប់រូបភាព​ផលិតផលម៉ាក ម៉ូម៉ូ (Mo Mo By Srey mom) ដែលបានទាញយកពីអ៊ីធ័រណិត គឺធ្វើឲ្យសាធារណជន មានការភ័ន្តច្រឡំ ផលិតផលម៉ាក Mo Mo By Srey mom ទៅនឹងផលិតផលក្លែងក្លាយ ដែលអាជ្ញាធរកំពុងធ្វើការ រឹបអូស។

តារាសម្ដែង លោក គឹម សីហា បានបន្តទៀតថា ទង្វើរបស់ម្ចាស់ Page និង​គេហទំព័រ United News International បានធ្វើឲ្យប៉ះពាល់យ៉ាងធ្ងន់ធ្ងរ ទៅលើកេរ្តិ៍ឈ្មោះ និងអតិថិជន​របស់ក្រុមហ៊ុន អេសអ៊ឹម ហ្គូដ (ខេមបូឌា) SM Good (Cambodia) Co.,LTD។ ដូច្នេះក្រុមហ៊ុនស្នើ​​ឲ្យគេហទំព័រខាងលើ កែប្រែព័ត៌មានសារឡើងវិញ ឲ្យបានមុនថ្ងៃទី០៥ ខែឧសភា ឆ្នាំ២០១៧នេះ ដើម្បីកុំឲ្យសាធារណជន មានការភ័ន្តច្រឡំ​លើផលិតផលម៉ាក Mo Mo By Srey mom ទៅនឹងផលិតផលក្លែងក្លាយ​ដទៃទៀត​។ បើមិនដូច្នោះទេ ក្រុមហ៊ុន​ អេសអ៊ឹម ហ្គូដ (ខេមបូឌា) SM Good (Cambodia) Co.,LTD នឹងចាត់វិធានការតាមផ្លូវច្បាប់ និងទាមទារសំណង សងការខូចខាត​ដែល​បានកើតឡើង។

លោក គឹម សីហា បានសង្កត់ធ្ងន់ថា ផលិតផលម៉ាក ម៉ូម៉ូ (Mo Mo By Srey mom) គឺនាំចូលមកពីប្រទេសជប៉ុន ដោយមានការវេចខ្ចប់ត្រឹមត្រូវ នៅក្នុងប្រទេសថៃ ហើយផលិតផល មានច្បាប់អនុញ្ញាតនាំចូលត្រឹមត្រូវ មានការចុះបញ្ជីត្រឹមត្រូវ និងបង់ពន្ធតាមច្បាប់ដែលបានកំណត់ ពីក្រសួងពាក់ព័ន្ធទាំងអស់ ដោយក្រុមហ៊ុនធានាបាននូវគុណភាព ប្រសិទ្ធិភាព ដល់អ្នកប្រើប្រាស់ និងបានសុំសិទ្ធិត្រឹមត្រូវ ក្នុងការដាក់ឈ្មោះអ្នកនាង គង់ ច័ន្ទស្រីមុំ ដើម្បីសម្គាល់ម៉ាកផលិតផល​​របស់ខ្លួន នៅក្នុងប្រទេសកម្ពុជា៕