(ភ្នំពេញ)៖ គិតមកត្រឹមព្រឹកថ្ងៃទី៣០ ខែមេសា ឆ្នាំ២០១៧នេះ តុលាការមិនទាន់សម្រេចឃុំខ្លួន ជនជាតិអ៊ីស្រាអែល ដែលស៊ីដាច់លុយ ធនាគារ «អេស៊ីលីដា» ជាង១.៣លានដុល្លារនោះទេ ខណៈលេចឮដំណឹងថា មានគេកំពុងរត់ការ ដើម្បីអន្ដរាគមន៍កុំឲ្យឃុំខ្លួនជនបរទេសរូបនេះ។

ពាក់ព័ន្ធករណីស៉ីដាច់លុយជាង១លានដុល្លារនេះ មេធាវីការពារក្តីរបស់​ធនាគារ ​«អេស៊ីលីដា» សំណូមពរឲ្យស្ថាប័នតុលាការឃុំខ្លួនជនត្រូវចោទ។

សូមរំលឹកថា បុរសជនជាតិអ៊ីស្រាអែលម្នាក់ ក្រោយស៊ីដាច់លុយធនាគារ «អេស៊ីលីដា» អស់ជាង១លាន៣០ម៉ឺនដុល្លារ ត្រូវព្រះរាជអាជ្ញារង លោក សៀង សុខ បញ្ជាឲ្យចូលខ្លួន នៅនាយកដ្ឋាននគរបាលព្រហ្មទណ្ឌ នៃក្រសួងមហាផ្ទៃ រហូតត្រូវបានឃាត់ខ្លួន នៅព្រឹកថ្ងៃទី២៩ ខែមេសា ឆ្នាំ២០១៧។

យោងតាមពាក្យបណ្ដឹងរបស់ធនាគារ «អេស៊ីលីដា» បញ្ជាក់ថា ជនជាតិអ៊ីស្រាអែល ត្រូវកម្លាំងនគរបាលឃាត់ខ្លួននេះ ឈ្មោះ DAN GOLDSHTIEN អាយុ៥៩ឆ្នាំ កាន់លិខិតឆ្លងដែនលេខ ២០៧៥៤៧១៤​ ស្នាក់នៅផ្ទះលេខ៣០១E ផ្លូវជាតិលេខ៦A ភូមិកៀនឃ្លាំង សង្កាត់ជ្រោយចង្វា ខណ្ឌជ្រោយចង្វា។

ភាគីដើមបណ្ដឹង ក៏បានប្ដឹងទាមទារសំណងជំងឺចិត្ត១០ម៉ឺនដុល្លារផងដែរ​៕​