(រតនគិរី)៖ ប្រជាពលរដ្ឋរងគ្រោះដោយខ្យល់កន្ត្រាក់ចំនួន០៩គ្រួសារ នៅស្រុកលំផាត់ នាព្រឹកថ្ងៃទី២៨ ខែមេសា ឆ្នាំ២០១៧នេះ ទទួលបានអំណោយសប្បុរសធម៌ ពីសាខាកាកបាទក្រហមកម្ពុជាខេត្តរតនគិរី ដឹកនាំដោយលោក ថង សាវុន ប្រធានគណៈកម្មាធិការ សាខាកាកបាទក្រហមខេត្ត។
ពលរដ្ឋដែលទទួលបានការយកចិត្តទុកដាក់ នាឱកាសនេះ បានគោរពថ្លែងអំណរគុណយ៉ាងជ្រាលជ្រៅបំផុត ដល់សាខាកាកបាទ ក្រហមកម្ពុជា ជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលបានផ្តល់ជាអំណោយ សប្បុរសធម៌ ចែកជូនពួកគាត់ ក្នុងគ្រាដែលពួកគាត់ជួបប្រទះទុក្ខលំបាក។
ជាមួយគ្នានោះ លោក ថង សាវុន ផ្តាំផ្ញើដល់ប្រជាពលរដ្ឋដែលរងគ្រោះ ត្រូវមានការប្រុងប្រយ័ត្នចំពោះបាតុភូតធម្មជាតិ និងខិតខំបង្កបង្កើនផល ជួសជុលលំនៅដ្ឋានដែលខូចខាតឡើងវិញ ជាពិសេសអាជ្ញាធរមូលដ្ឋាន ត្រូវយកចិត្តទុកដាក់ ចុះជួយអន្តរាគមន៍ និងរាយការណ៍ភ្លាមៗ ចំពោះព្រឹត្តិការណ៍ ហេតុការណ៍ណា ដែលមានការប៉ះពាល់ដល់ជីវភាពរស់នៅ របស់ប្រជាពលរដ្ឋ។
សូមបញ្ជាក់ថា សម្ភារៈដែលផ្តល់ជូនក្នុងមួយគ្រួសាររួមមាន៖ អង្ករ៣០គីឡូក្រាម, មី១កេស, ត្រីខ១យួរ, ឃីត (មុង ភួយ សារ៉ុង ក្រមា)១កញ្ចប់, ទឹកសុទ្ធអង្គរពូរ៉ូ២កេស និងថវិកាមួយចំនួនតាមស្ថានភាពធ្ងន់ស្រាល៕
