(តាកែវ)៖ លោក ឡាយ វណ្ណៈ អភិបាលខេត្តតាកែវ បានអំពាវនាវឲ្យ នាយទាហាន, ពលទាហាន និងក្រុមគ្រូសារទាហាន ទៅបោះឆ្នោតឲ្យ បានគ្រប់គ្នា ដោយបោះឆ្នោតគាំទ្រCPP ដើម្បីថែរក្សាសន្តិភាព និងមានការអភិវឌ្ឍន៏ប្រទេសតទៅទៀត។
ការលើកឡើងរបស់ លោក ឡាយ វណ្ណៈ បានធ្វើឡើងខណៈលោកអញ្ជើញជួបសំណេះសំណាលជាមួយ ទាហាន នាយទាហានរង ពលទាហាន និងគ្រួសារកងទ័ពចំនួន ២២០នាក់ ព្រមទាំងសម្ភោធសមិទ្ធផលនានា ក្នុងកងវរសេនាតូច ១១៣ ស្ថិតនៅ ក្នុងភូមិព្រៃក្តួច ឃុំត្រពាំងក្រញូង ស្រុកត្រាំកក់ ខេត្តតាកែវ នាថ្ងៃទី២៤ ខែមេសា ឆ្នាំ២០១៧។
ក្នុងឱកាសនោះ អភិបាលខេត្តតាកែវ បានថ្លែងអំណរគុណ ដល់នាយទាហាន នាយទាហានរង និងពលទាហានទាំងអស់ ដែលដែលជាវីរជនដ៏ពិតប្រាកដ ដែលបានលះបង់សាច់ស្រស់ ឈាមស្រស់ចូលរួមរំដោះទឹកដី ពីរបបប្រល័យ ពូជសាសន៍ និងបានចូលរួមជាមួយរាជរដ្ឋាភិបាលការពារនូវការវិលត្រឡប់មកវិញនូវរបបដ៏យង់ឃ្នងនេះ ព្រមទាំងថែរក្សាសុខសន្តិភាព ស្ថេរភាពនយោបាយ សណ្តាប់ធ្នាប់សង្គម រហូតមានការអភិវឌ្ឍន៍ ដល់សព្វថ្ងៃ។
លោក ឡាយ វណ្ណៈ បានបន្តថា ជាធម្មតាមន្ត្រីរាជការ ធ្វើពិធីសំណេះសំណាលនេះ នៅមុនពិធីបុណ្យចូលឆ្នាំខ្មែរ ប្រពៃណី ជាតិ ប៉ុន្តែកងកម្លាំងប្រដាប់អាវុធ របស់យើង តែងតែធ្វើក្រោយពិធីបុណ្យចូលឆ្នាំ ពីព្រោះថានៅអំឡុងពេល ដែលគេត្រៀម អបអរសាទពិធីបុណ្យចូលឆ្នាំនោះ កងកម្លាំងយើង ក៏ត្រូវត្រៀមរៀបចំ ថែរក្សាសន្តិសុខ សុវត្ថិភាព សណ្តាប់ធ្នាប់សង្គមជូន បងប្អូនប្រជាពលរដ្ឋយើង។
នៅក្នុងពិធីនោះ លោក ឡាយ វណ្ណៈ ក៏បានឧបត្ថម្ភដល់យោធិន ចូលនិវត្តន៍ចំនួន១០រូប នូវថវិកាម្នាក់២០ម៉ឺនរៀលផងដែរ៕
