(ភ្នំពេញ)៖ កាកបាទក្រហមកម្ពុជា ដែល មានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន បានចូលរួមរំលែកទុក្ខយ៉ាងក្រៀមក្រំ​ ក្នុងពិធីបុណ្យ៧ថ្ងៃ​ សព ឧត្តមសេនីយ៍ត្រី​ សួង​ វិសាល​ នាយការិយាល័យបទល្មើសគ្រឿងញៀន នៃកងរាជអាវុធហត្ថលើផ្ទៃប្រទេស​ ដែលបានទទួលមរណភាព កាលពី វេលាម៉ោង​ ២១ម៉​ ៥១​នាទី​ ថ្ងៃទី​ ១៣​ ខែមេសា​ ឆ្នាំ២០១៧ ដោយរោគាពាធ​ ក្នុងជន្មាយុ​ ៦០ឆ្នាំ​ មានអាសយដ្ឋានស្ថិតនៅផ្ទះលេខ​ ២៧B ផ្លូវ​ ៩៣​ ភូមិផ្សារតូច​ សង្កាត់ទួលសង្កែ​ ខណ្ឌឬស្សីកែវ​ រាជធានីភ្នំពេញ។

នៅក្នុងពិធីចូលរួមបុណ្យសព ៧ថ្ងៃនោះ លោក វេជ្ជ.​ អ៊ុយ​ សំអាត​ នាយក នាយកដ្ឋានគ្រប់គ្រងគ្រោះមហន្តរាយ​ នៃកាកបាទក្រហមកម្ពុជា​ បាន ពាំនាំនូវការចូលរួមរំលែកទុក្ខយ៉ាងក្រៀមក្រំ ពីសំណាក់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាមួយក្រុមគ្រួសារសព​ ឧត្តមសេនីយ៍ត្រី​ សួង​ វិសាល​ ដែលបានបាត់បង់​ ស្វាមី​ ឪពុក​ ជីតា ប្រកបដោយព្រហ្មវិហារធម៌​ ដែល មានស្នាដៃជាច្រើនក្នុងការចូលរួមបម្រើជាតិ មាតុភូមិនារយៈពេលកន្លងមក ហើយក៏សូមឧទ្ទិសបួងសួងដល់វិញ្ញាណក្ខន្ធនៃសព បានទៅកាន់សុគតិភពកុំបីឃ្លៀងឃ្លាតឡើយ។

ជាក់ស្តែង កាកបាទក្រហមកម្ពុជា​ នៅរសៀលថ្ងៃទី ១៩​ ខែមេសា ឆ្នាំ២០១៧ ម្សិលមិញនេះ បានចូលបុណ្យសព ៖​  អង្ករ ១០០គីឡូក្រាម មី ៥កេស ត្រីខ​ ៥០កំប៉ុង ទឹកក្រូច ៥ កេស និងបច្ច័យចំនួន​ ៥ លានរៀល៕