(ភ្នំពេញ)៖ ក្នុងន័យចង់បណ្តុះពុទ្ធិដល់ប្រជាពលរដ្ឋខ្មែរ ពិសេសយុវជនឲ្យស្រឡាញ់សន្តិភាព និងចូលរួមជាមួយរាជរដ្ឋាភិបាលកម្ពុជា ក្នុងអភិវឌ្ឍន៍ប្រទេសជាតិ ឲ្យជឿនលឿនកាន់តែខ្លាំងក្លានោះ លោក ហេង រតនា អគ្គនាយកមជ្ឈមណ្ឌលកម្ចាត់មីនកម្ពុជា បានសរសេរនូវទស្សនៈរបស់ខ្លួន ដោយលើកយកនូវគំរូដឹកនាំប្រទេស របស់គណបក្សកាន់អំណាចយូរឆ្នាំ នៃប្រទេសសិង្ហបុរី ម៉ាឡេស៉ី និងជប៉ុន ដែលបានធ្វើឲ្យប្រទេសទាំងនេះ ក្លាយជាប្រទេសអភិវឌ្ឍន៍ខ្លាំង និងមានសេដ្ឋកិច្ចលូតលាស់ខ្លាំងដូចបច្ចុប្បន្ន។
លោក ហេង រតនា បានលើកឡើងថា «គណបក្សតែមួយកាន់អំណាចយូរឆ្នាំ គ្មានមូលដ្ឋានណាថានាំប្រទេស និងជាតិសាសន៍ខ្លួន ដើរទៅរកឋាននរក និងសោកនាដកម្មនោះទេ។ ផ្ទុយទៅវិញបានដឹកនាំប្រទេស និងប្រជាជន នាំមកនូវការរីកចំរើន និងអភិវឌ្ឍន៍ដ៍អស្ចារ្យ សំរាប់សង្គមជាតិរបស់ខ្លួន»។
អគ្គនាយកស៉ីម៉ាក់រូបនេះបានសរសេរយ៉ាងដូច្នេះថា៖
តើគណបក្សតែមួយកាន់អំណាចយូរឆ្នាំ តាមគោលការណ៍ប្រជាធិបតេយ្យ ជាការបង្កើតរបបផ្តាច់ការ នឹងធ្វើឲ្យប្រទេសនិងប្រជាជនកាន់តែក្រទៅៗ បាត់បង់យុតិ្តធម៌សង្គម បំផ្លាញភាពរុងរឿង និងបង្កើតតែភាពសោកនាដកម្មសំរាប់ជាតិ និងប្រជាជនមែនឬ?
ខាងក្រោមនេះ ខ្ញុំសូមលើកយកជាឧទាហរណ៍ ជាក់សែ្តងសំរាប់ប្រទេសអាស៉ីចំនួន៣ ដែលអនុវត្តន៍លទិ្ធប្រជាធិបតេយ្យ យ៉ាងចំណាស់រួមមានប្រទេសជប៉ុន សិង្ហបុរី និងប្រទេសម៉ាឡេស៊ី ក្រោយពីបានបញ្ចប់សង្គ្រាម ប្រទេសទាំងនេះខិតខំរៀបចំ លទិ្ធប្រជាធិបតេយ្យ តាមវប្បធម៌ ប្រពៃណី សាសនា និងមូលដ្ឋានសង្គម និងប្រជាជនជាក់ស្តែងរបស់ខ្លួន។ ប្រទេសទាំង៣នេះ មានគណបក្សតែមួយ កាន់អំណាចជាប់ៗគ្នាអស់រយៈពេលជាង៥៥ ទៅជាង៦០ឆ្នាំ ចាប់តាំងទសវត្ស៥០មក។
១៖ ប្រទេស Singapore គណបក្សសកម្មភាពប្រជាជន (People Action Party = PAP) គណបក្ស PAP នេះ បានដឹកនាំប្រទេសសិង្ហបុរីជាង៦២ឆ្នាំជាប់ៗគ្នា ហើយបាននាំប្រទេស និងជាតិសាសន៍នេះជោគជ័យ និងល្បីល្បាញខាងសេដ្ឋកិច្ច អប់រំ សុខាភិបាល និងគុណភាពច្បាប់យុតិ្តធម៌ សង្គមយ៉ាងល្អប្រសើរ លើផែនដីយើងនេះ។
២៖ ប្រទេសម៉ាឡេស៉ី (Malaysia) មានគណបក្សសហពន្ធ័ជាតិម៉ាឡេ (United Malay National Organization = UMNO) គណបក្ស UMNO នេះបានដឹកនាំប្រទេស និងប្រជាជនម៉ាឡេស៉ីជាង៦៣ឆ្នាំជាប់ៗគ្នា និងនៅតែបន្តដឹកនាំប្រទេសអាស៊ានមួយនេះ ឲ្យក្លាយជាខ្លាសេដ្ឋកិច្ច និងប្រជាធិបតេយ្យយ៉ាងរឹងមាំ និងខ្លាំងក្លាបំផុត។
៣៖ ប្រទេសជប៉ុន៖ មានគណបក្សប្រជាធិបតេយ្យសេរី (Democratic Liberal Party = DLP) គណបក្ស DLP នេះបានដឹកនាំប្រទេសជប៉ុនជាង៥៤ឆ្នាំជាប់គ្នា គណបក្សប្រឆាំង មានឱកាសដឹកនាំរយៈពេលខ្លីៗ បានត្រឹមតែនាំសេដ្ឋកិច្ចជប៉ុន ធ្លាក់ចុះយ៉ាងគំហក់ និងពិបាកជួសជុលប៉ុណ្ណោះ។
ផ្អែកតាមតថភាពជាក់សែ្តង នៃប្រទេសលទិ្ធប្រជាធិបតេយ្យ នៅអាស៉ីខាងកើត និងអាស៊ាននេះ មានន័យថា គណបក្សតែមួយកាន់អំណាចយូរឆ្នាំ គ្មានមូលដ្ឋានណាថានាំប្រទេស និងជាតិសាសន៍ខ្លួន ដើរទៅរកឋាននរក និងសោកនាដកម្មនោះទេ។ ផ្ទុយទៅវិញបានដឹកនាំប្រទេស និងប្រជាជន នាំមកនូវការរីកចំរើន និងអភិវឌ្ឍន៍ដ៍អស្ចារ្យ សំរាប់សង្គមជាតិរបស់ខ្លួន។ ប្រទេសទាំងនេះ មានមេដឹកនាំគណបក្សតែមួយ ដឹកនាំអំណាចរយៈពេលវែងផងដែរ ដើម្បីធានាបាននិរន្តភាពសន្តិសុខ សណ្តាប់ធ្នាប់ និងការអភិវឌ្ឍន៍សង្គមជាតិរបស់ខ្លួន។
តួរយ៉ាងប្រទេស សិង្ហបុរី អតីតៈនាយករដ្ឋមន្ត្រី លី ខ្វាន់យូ (Lee Kuan Yew) បានដឹកនាំប្រទេសជិត៥៦ឆ្នាំ ក្នុងនោះធ្វើជានាយករដ្ឋមន្ត្រីជិត៣២ឆ្នាំ (៣ មិថុនា ១៩៥៩ ដល់ ថ្ងៃទី២៨ វិចិ្ឆកា ១៩៩០) និងបន្តធ្វើគ្រូឲ្យនាយករដ្ឋមន្ត្រី (minister mentor) រហូតដល់ឆ្នាំ២០១១។ បច្ចុប្បន្នលោកនាយករដ្ឋមន្ត្រី លី ស៊ាងឡុង (Lee Hsieng Long) ដែលជាកូនប្រុសច្បងរបស់លោក លី ខ្វាន់យូ កំពុងបន្តដឹកនាំប្រទេសសិង្ហបុរី ជានាយករដ្ឋមន្ត្រីជិត១៤ឆ្នាំហើយ (ចាប់ពីឆ្នាំ២០០៤ មកដល់បច្ចុប្បន្ន)។
តើកម្ពុជាមិនអាចដើរស្រប នឹងគន្លងនិងគំរូរប្រទេសទាំង៣នេះបានទេឬ? សំខាន់មានគោលនយោបាយត្រឹមត្រូវ និងមានការដឹកនាំ និងការអនុវត្តន៍គោលនយោបាយ ប្រកបដោយឆន្ទះស្មោះត្រង់ និងត្រឹមត្រូវ។ មាគ៌ានេះបាននិងកំពុងយកចិត្តទុកដាក់ខ្ពស់ ដោយរាជរដ្ឋាភិបាល ដូចនេះក្តីសង្ឃឹមប្រកបដោយការជឿជាក់ ជាមួយភាពរីកចំរើនរុងរឿង នៃព្រះរាជាណាចក្រនេះ បានទទួលជាបណ្តើរៗហើយ ដូចបានឃើញនឹងភ្នែកស្រាប់ហើយ៕
