(វ៉ាស៊ីនតោន)៖ ខណៈដែល​ប្រធានាធិបតី​អាមេរិកលោក ដូណាល់ ត្រាំ បានថ្លែងព្រមានធ្ងន់ៗ​កាលពីសប្តាហ៍​មុនថា រូបលោក​បាន​បញ្ជូន​កង​នាវាចម្បាំងដ៏មានអនុភាពភាព ដើម្បីឲ្យទៅកំញើញប្រទេស​កូរ៉េខាងជើងនោះ ក្រុមនាវាដែលដឹកនាំដោយនាវាផ្ទុកយន្តហោះចម្បាំង​ដើរ​ដោយថាមពលនុយក្លេអ៊ែរនេះ បែរជាស្ថិតនៅយ៉ាងឆ្ងាយពី ឧបទ្វីបកូរ៉េទៅវិញ ដោយនៅពេលនេះបានធ្វើដំណើរ​ឆ្ពោះទៅកាន់​ប្រទេសអូស្រ្តាលីឯណោះវិញ ជាទីដែលអនុប្រធានាធិបតីអាមេរិកលោក Mike Pence នឹងទៅបំពេញទស្សនកិច្ចចុងក្រោយគេ ក្នុងដំណើរទស្សនកិច្ចនៅតំបន់អាស៊ី។ នេះបើតាមការ​ចេញផ្សាយ​ ដោយទីភ្នាក់ងារព័ត៌មាន Reuters នៅមុននេះបន្តិចនា​ព្រឹក​ថ្ងៃ​ពុធ ទី១៩ ខែមេសា ឆ្នាំ២០១៧៕

ជុំវិញបញ្ហានេះ​ទីបញ្ជាការយោធា​អាមេរិក​ប្រចាំនៅតំបន់​ប៉ាស៊ីហ្វិក បានពន្យល់​បកស្រា​យនាថ្ងៃពុធនេះ ក្រុមនាវាចម្បាំងឥឡូវនេះ​កំពុងតែរៀបចំ​ដំណើរការបន្ត​ឆ្ពោះ​ទៅកាន់​តំបន់ប៉ាស៊ីហ្វិក​ខាងលិច​តាមការបញ្ជាហើយ។

គួរបញ្ជាក់កាលពីសប្តាហ៍មុន ទីក្រុងវ៉ាស៊ីនតោនបានអះអាងថា ក្រុមនាវាដឹកនាំ​ដោយនាវាចម្បាំង-នុយក្លេអ៊ែរ USS Carl Vinson ត្រូវបាន​បញ្ជាឲ្យដកខ្លួនចេញ​ពីការធ្វើសមយុទ្ធ​នានា ហើយបញ្ជូនទៅកាន់​ឧបទ្វីបកូរ៉េភ្លាមៗ​តែម្តង ដើម្បីទប់ទល់នឹងការបង្កហេតុណាមួយរបស់​កូរ៉េខាងជើង ស្របពេលដែលស្ថានការណ៍មានការតានតឹងបំផុតមិនធ្លាប់មាន ប៉ុន្តែពេលនេះគេនៅមិនដឹងថា តើនេះជាយុទ្ធសាស្ត្រថ្មីរបស់អាមេរិក ឬមួយក៏យ៉ាងណានោះឡើយ៕