(ព្រះសីហនុ)៖ យប់រំលងអធ្រាត្រឈានថ្ងៃទី១៩ ខែមេសា ឆ្នាំ២០១៧ ម៉ោង១២៖៣០នាទី លើវិថីឯករាជ្យ មុខផ្សារទំនើបអូររ៉េន ភូមិ២ សង្កាត់លេខ៤ ក្រុងព្រះសីហនុ មានគ្រោះថ្នាក់ចរាចរណ៍មួយកើតឡើង បង្កដោយ រថយន្ត១គ្រឿងម៉ាក TOYOTA ពណ៌ខ្មៅ ពាក់ស្លលេកខភ្នំពេញ2BB-5858 បើកបរដោយជនជាតិចិន ជិះគ្នា២នាក់ មានទិសដៅពីតោពីរមកផ្សារលើ លុះដល់ចំណុចខាងលើ បានជ្រុលចង្កូតបុកបង្គោលភ្លើងបំភ្លឺផ្លូវ បណ្ដាលឲ្យក្រឡាប់តែម្ដង។
នគរបាលខេត្តព្រះសីហនុបានបញ្ជាក់ថា គ្រោះថ្នាក់នេះ បណ្ដាលឲ្យស្លាប់ជនជាតិចិន១នាក់ និងរងរបួសធ្ងន់១នាក់ បានបញ្ជូនទៅសង្គ្រោះនៅគ្លីនិកឯកជន ចាក់អង្រែ ក្រុងព្រះសីហនុ។ ចំណែកឯមធ្យោបាយ រថយន្ត១គ្រឿង សមត្ថកិច្ចនគរបាល បានស្ទូចយកមករក្សាទុកនៅការិយាល័យនគរបាលចរាចរណ៍ផ្លូវគោក៕
