(ភ្នំពេញ)៖ ថ្ងៃចូលឆ្នាំថ្មីប្រពៃណីជាតិខ្មែរ ឆ្នាំរកា នព្វស័កព.ស២៥៦១ ជិតចូលមកដល់ហើយ។ រយៈពេលជិត៤០ឆ្នាំដែលកម្ពុជាបានបោះជំហ៊ាន ធ្វើដំណើរទៅមុខឥតឈប់ឈរ ហើយប្រទេសជាតិ មានការអភិវឌ្ឍន៍រីកចម្រើនគ្រប់វិស័យក្រោម «មរតកសន្តិភាព» ដែលសម្តេចតេជោ ហ៊ុន សែន គឺជា «ស្ថាបនិក»។
«សន្តិភាព» គឺមានតម្លៃជាប្រវត្តិសាស្ត្រ សម្រាប់កម្ពុជា។ សន្តិភាព គឺមានតម្លៃណាស់សម្រាប់បច្ចុប្បន្ន និងតទៅអនាគតរបស់កម្ពុជា។ សន្តិភាពពេញលេញជិត២០ឆ្នាំមក គឺជារយៈពេលដ៏អស្ចារ្យក្នុងប្រវត្តិសាស្ត្រកម្ពុជា ដែលកន្លងមកយើងធ្លាក់ក្នុងសង្គ្រាមឥតឈប់ឈរ។ ផ្តើមចេញពីគ្រឹះសន្តិភាពនេះ កម្ពុជា នឹងបន្តរក្សាបាននូវសមិទ្ធផលអស្ចារ្យ ជាច្រើនរួមមាន៖ ការឯកភាពទឹកដី, ការទប់ស្កាត់បានការប៉ុនប៉ងបំបែកបំបាក់ស្មារតីជាតិ, ការទប់ស្កាត់បានការប៉ុនប៉ងធ្វើបដិវត្តន៍ពណ៌, ការរក្សាបាននូវរបបរាជានិយម អាស្រ័យរដ្ឋធម្មនុញ្ញ, ការពង្រឹងបាននយោបាយប្រជាធិបតេយ្យសេរីពហុបក្ស, ការបន្តពង្រឹងតួនាទីកម្ពុជា ក្នុងអាស៊ាន និងក្នុងអង្គការពាណិជកម្មពិភពលោក ជាពិសេសការបន្តពង្រឹងពង្រីកកិច្ចសហប្រតិបត្តិការមិត្តភាពស៊ីជម្រៅ និងគ្រប់ជ្រុងជ្រោយរបស់កម្ពុជា ជាមួយមិត្តភក្តិជុំវិញពិភពលោក។
«មរតកសន្តិភាព» ២ទសវត្សរ៍នេះ គឺប្រជាជនកម្ពុជាពិតជាអាចប្រកាសប្រាប់ពិភពលោក ដោយមោទនភាពថា៖ កម្ពុជា មានវត្ថុដ៏អស្ចារ្យគឺប្រាសាទអង្គរវត្ត! កម្ពុជា មានសេចក្តីសុខដ៏មានតម្លៃ គឺសន្តិភាព! កម្ពុជា មានភាពស្រស់ស្អាតដ៏អស្ចារ្យ គឺស្នាមញញឹមរបស់នារីខ្មែរនិងប្រជាជនទាំងអស់! កម្ពុជាមានប្រពៃណីការជួបជុំ ដ៏សប្បាយរីករាយ គឺព្រឹត្តិការណ៍អង្គរសង្ក្រាន្ត! ហើយកម្ពុជា ក៏មានចង្វាក់រាំប្លែកៗដូចជា៖ បទរាំញីកែងជើង, ឆ្កែរត់បុកធុង និងបទ អញ្ចេកៗ ជាដើម!
កម្ពុជា៖ យើងត្រូវរួមគ្នារក្សាការពារសមិទ្ធផលនិងមរតកសន្តិភាពនេះឲ្យបាន និងយកឱកាសខិតខំកសាងប្រទេសជាតិយើងបន្ថែមទៀត។ ទោះបីតិចឬច្រើន យឺតឬលឿន គឺកម្ពុជា ត្រូវតែបន្តទៅមុខទៀត! កុំឈប់! ហើយក៏កុំឲ្យរអិលថយក្រោយ ឬធ្លាក់ក្នុងសង្គ្រាមឲ្យសោះ។ សមិទ្ធផលទាំងអស់នេះ យើងសូមចងចាំថា គឺកើតឡើងពីទស្សនៈវិស័យ ដ៏ត្រឹមត្រូវរបស់ សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ដែលដឹកនាំរាជរដ្ឋាភិបាលកម្ពុជាបច្ចុប្បន្ន និងដោយមានការចូលរួមគាំទ្រ ពីមន្ត្រីរាជការកងកម្លាំងគ្រប់ជាន់ថ្នាក់ ប្រជាជនទាំងឡាយ ជាពិសេសគឺ អង្គព្រះមហាក្សត្រជាទីគោរពសក្ការៈ ព្រះសង្ឃ និងសាសនិកនានាផងដែរ។
ស្ថានភាពកម្ពុជាបច្ចុប្បន្នពិតជាល្អណាស់! ជាពិសេសបានបង្កើតឱកាសឲ្យយុវជនចូលរួមគ្រប់វិស័យសំខាន់ៗរបស់ជាតិ ដែលរួមមានទាំងការងារសង្គម សិល្បៈ កីឡា វប្បធម៌ និងការរៀបចំពិធីប្រពៃណីជាតិ អង្គរសង្ក្រាន្ត និងសង្ក្រាន្តនានាតាមបណ្តាស្រុក ខេត្តជាច្រើនទៀត ដើម្បីផ្សព្វផ្សាយអត្តសញ្ញាណជាតិ បង្កើតការកម្សាន្តសប្បាយ រីករាយរឹតចំណងសាមគ្គីភាពប្រជាជន និងដើម្បីទាក់ទាញទេសចរ។
ជាមួយគ្នានេះ យើងក៏ត្រូវទទួលស្គាល់ចំណុចខ្វះខាតខ្លះដែលយើងមិនទាន់មានលទ្ធភាពបំពេញបាន ទាំងក្នុងបំណងផ្ទាល់ខ្លួន បំណងប្រាថ្នាក្នុងគ្រួសារ និងតម្រូវការនានាក្នុងសហគមន៍យើង។ ក៏ប៉ុន្តែ យើងមិនត្រូវឲ្យសេចក្តីត្រូវការនេះ បំផ្លាញសុភមង្គលគ្រួសារ តម្លៃសីលធម៌សង្គម តម្លៃគុណធម៌ប្រជាជាតិ និងបំផ្លាញកិត្យានុភាពយើងជាដាច់ខាត។ យើងត្រូវប្រើឱកាសក្នុងសន្តិភាពនេះ រួមគ្នាកសាងសមិទ្ធផលនិងអំពើល្អឲ្យបានច្រើនថែមទៀត។
ជាការកត់សំគាល់ នៅជ្រុងម្ខាងទៀត នៃការរីកចម្រើនរបស់មាតុភូមិកម្ពុជាយើង គឺពួកអ្នកនយោបាយទាំងថ្មី ទាំងចាស់ ជាពិសេសអ្នកធ្លាប់ចាញ់រាប់ភ្លេច គឺកំពុងរកគ្រប់វិធីដណ្តើមយកសមិទ្ធផលនេះ និងបានកំពុងខិតខំគ្រប់វិធីដណ្តើមយកអំណាចការដឹកនាំតាមគ្រប់រូបភាព ទាំងខុសច្បាប់ តាមបែបប្រជាភិថុត និងតាមបែបអាណាធិបតេយ្យ ដោយមិនចេះខ្មាស់អៀន។ ក៏ប៉ុន្តែ ព្រហ្មលិខិតបានកំណត់រួចហើយ ជាតិនេះ ពួកគេគ្មានវាសនាទេ ពីព្រោះពួកគេត្រូវបណ្តាសាររួចហើយថា ជាអ្នកនយោបាយគ្មានសីលធម៌ និងគ្មានគុណធម៌។
នៅពេលដែលប្រជាជនទូទាំងប្រទេស សប្បាយរីករាយក្នុងឱកាសបុណ្យចូលឆ្នាំថ្មីនេះ ហេតុអ្វីបានជាគេរត់ចេញទៅក្រៅប្រទេស? ចម្លើយគឺពីព្រោះគេខ្មាស់៖
ទី១៖ ពួកគេមិនហ៊ាននៅជួបមុខប្រជាជនទេ ពីព្រោះគេខ្មាស់ពាក្យសម្តីខ្លួនឯង។ ពាក្យគេម្តងណាគឺ៖ វេនាណាស់ ឈឺចាប់ណាស់ ការពិតគេឈឺចិត្តដោយសារចាញ់ឆ្នោតសោះ... ដល់តែឮប្រជាជនស្រែហ៊ោសប្បាយរីករាយ គឺវាផ្ទុយនឹងភាសារបស់គេ។ ដូច្នេះ គេមិនហ៊ាននៅឃើញការពិតទេ។
ទី២៖ ធាតុពិត គេខ្មាស់ភាពរីកចម្រើន និងការសំបូរសប្បាយរបស់ប្រទេសជាតិ ពីព្រោះគេគ្មានចំណែកអ្វីបន្តិចសោះ កសាងប្រទេសនេះទេ។ ពួកគេមានតែបោកប្រាស់យកលុយពីប្រជាជន ដើម្បីចិញ្ចឹមនយោបាយពិសពុលរបស់គេ។ ខណៈនេះ គេក៏កំពុងនៅក្រៅប្រទេសស្មូមលុយខ្មែរនៅទីនោះ ដើម្បីបម្រើមហិច្ឆតានយោបាយបរទេសដែរ។
ទី៣៖ ឆ្នាំមុនគេព្យាយាមបំផ្លាញកម្មវិធីអង្គរសង្ក្រាន្តរបស់ជាតិយើង ទាំងមូលតាមរយៈយកខ្លោងទ្វារ ជាមូលដ្ឋានអុជអាល ប៉ុន្តែគេបរាជ័យ។ ឆ្នាំនេះគេមិនអាចរកអ្វីមកធ្វើជា ឧបករណ៍ បំផ្លាញកម្មវិធីនេះបានទេ។ មកដល់ថ្ងៃនេះ គេមិនហ៊ានចេញសារជូនពរទេ ពីព្រោះ ពួកគេស្មោកគ្រោកខាងសីលធម៌ ហើយពួកគេមានសារជាតិជាពួកញុះញ៉ុង អុជអាលបំបែកបំបាក់ជាតិប៉ុណ្ណោះ។
សន្តិភាព គឺពិតជាមានតម្លៃខ្លាំងណាស់ សម្រាប់អនាគតដ៏ប្រសើរបស់កម្ពុជា។ សូមទេវតាឆ្នាំថ្មី បន្តថែរក្សាការពារប្រជាជនកម្ពុជា ឲ្យបានរីករាយសំបូរសប្បាយ តទៅទៀតក្រោមម្លប់សន្តិភាពដ៏ត្រជាក់ត្រជុំ។ តោះ!យើងនាំគ្នារាំបទ អញ្ចេកៗ!
ដោយ៖ សេនាជាតិ
