(ភ្នំពេញ)៖ វណ្ណកម្មដឹកនាំសម្ដែងរឿង ជាលើកដំបូង របស់តារាកំប្លែង នាយ គ្រឿន មានចំណងជើងថា «ជួបស៊យ» នៅក្នុងផលិតកម្ម LD Picture បានបើកសម្ពោធយ៉ាងអធិកអធម នាល្ងាចថ្ងៃទី១០ ខែមេសា ឆ្នាំ២០១៧នេះ នៅរោងភាពយន្ត Legend ផ្សារស្ទឹងមានជ័យថ្មី ដោយមានវត្តមានតារាសម្ដែងចាស់ថ្មី និងតារាចម្រៀង ព្រមទាំងទស្សនិកជន យ៉ាងច្រើនកុះករចួលរួម។ ពិធីសម្ពោធនេះ គឺដើម្បីដាក់បញ្ចាំង ឲ្យស្របក្នុងឱកាសបុណ្យចូលឆ្នាំថ្មី ប្រពៃណីខ្មែរ ឲ្យបងប្អូនបានទស្សនាកម្សាន្ត សប្បាយរីករាយ។
លោក លៀក លីដា ជាផលិតករ និងជាចាងហ្វាងផលិតកម្ម LD បានថ្លែងឲ្យអ្នកសារព័ត៌មានដឹងថា ភាពយន្តខ្នាតធំរឿង «ជួបស៊យ» ជាស្នាដៃដឹកនាំសម្ដែងលើកដំបូង របស់នាយគ្រឿន ដែលជាប្រភេទរឿងកំប្លែង សើចសប្បាយ ហើយបានចំណាយទុនថត ប្រមាណជាង៦ម៉ឺនដុល្លារ ព្រោះតែរឿងនេះ មានការចូលរួមសម្ដែង ពីសំណាក់តារាល្បីៗ និងត្រូវបានសម្រិតសម្រាំងឡើងយ៉ាងពិសេស សម្រាប់អ្នកទស្សនា នៅក្នុងឱកាសពិធីបុណ្យចូលឆ្នាំថ្មី ប្រពៃណីខ្មែរនេះ។
ចាងហ្វាងផលិតកម្មរូបនេះ បានថ្លែងបន្តថា ទោះបីជារឿង «ជួបស៊យ» ជាស្នាដៃដឹកនាំសម្តែងលើកទី១ របស់នាយ គ្រឿន ប៉ុន្តែលោកបានបង្ហាញក្ដីរំពឹងខ្ពស់ថា នឹងទទួលបានជោគជ័យ ព្រោះទស្សនិកជន បានដឹង និងស្គាល់រួមមកហើយ ពីគុណភាពរឿងរបស់ផលិតកម្ម LD Picture ថាមានកម្រិតស្ដង់ដារបែបណា ខណៈដែលភាពយន្តខ្នាតធំរបស់ផលិតកម្ម LD Picture ជាច្រើនរឿងមកហើយ សុទ្ធតែទទួលបានជោគជ័យ ក្រោយពេលដាក់បញ្ចាំងរួច។
ដោយឡែកតារាកំប្លែង នាយ គ្រឿន ដែលជាអ្នកដឹកនាំសម្ដែង និងជាតួឯកក្នុងរឿងនេះ បានបញ្ជាក់ថា មូលហេតុដែលលោកដាក់ចំណងថា «ជួបស៊យ» គឺចង់បង្ហាញថា មនុស្សយើងម្នាក់ៗតែងតែមានថ្ងៃស៊យ និងថ្ងៃហេង ពោលគឺមានថ្ងៃនាំសំណាង និងថ្ងៃដែលគ្មានសំណាង ក្នុងនោះក៏មានពូជពង្សជាមនុស្សស៊យ គឺស៊យតាំងពីឪពុកមកដល់កូន។ ប៉ុន្តែក្នុងរឿងនេះ គឺរូបលោកសម្ដែងជាតួឯក ដែលនៅពេលនរណាបានជួប គឺស៊យគ្រប់ជំហានតែម្ដង រហូតដល់ថ្នាក់គេខ្លាចរអា លែងហ៊ានជួប។
យ៉ាងណាមិញ នាយ គ្រឿន ក៏បានបង្ហាញអត្ថន័យនៃសាច់រឿងទាំងមូលនេះថា គ្រាន់តែចង់ឲ្យបងប្អូនសើចសប្បាយរីករាយ បាត់អស់ទុក្ខកង្វល់ពេលទស្សនារឿងនេះ តែប៉ុណ្ណោះ ព្រោះជារឿងបែបកំប្លុកកំប្លែង និងចង់វាស់ស្ទង់កម្រិតស្នាដៃដំបូងរបស់ខ្លួនផងដែរ។ បើរឿងមានការគាំទ្រច្រើន ដូចអ្វីដែលលោករំពឹងទុក នោះស្នាដៃទី២ និងស្នាដៃបន្តបន្ទាប់ទៀត នឹងកើតមានជាក់ជាមិនខាន។
សូមបញ្ជាក់ថា រឿង«ជួបស៊យ» មានការចូលរួមសម្ដែង ដោយតារាសម្ដែងល្បីៗមានដូចជា នាយ គ្រឿន, នាយ ពែកមី , លោក ទេព រិនដារ៉ូ, អ្នកនាង ប៉ែន សុផានី , លោក ងួន សុបិន, កញ្ញា សាឡាត់ ស្រីឡាង, កញ្ញា គៀត សុវណ្ណាឡាង, លោក ជា សុវណ្ណារាហ៍ និងតារាសម្ដែងប្រុសស្រីជាច្រើនរូបទៀត៕
