(ភ្នំពេញ)៖ ដើម្បីបង្កើននូវភាពស្និទ្ធស្នាល លោក ពេជ្រ កែវមុនី អភិបាលខណ្ឌមានជ័យ បានចុះសួរសុខទុក្ខ និងសំណេះសំណាល ព្រមជាមួយអាហារសាមគ្គី ជាមួយអ្នករត់ម៉ូតូកង់បីប្រមាណជាង១០០នាក់ ស្ថិតនៅផ្សារ ឯករាជ្យ៣ សង្កាត់ស្ទឹងមានជ័យ ខណ្ឌមានជ័យរាជធានីភ្នំពេញ នារសៀលថ្ងៃទី០៦ ខែមេសា ឆ្នាំ២០១៧ កន្លងមកនេះ ។
ក្នុងពិធីសំណេះសំណាលនេះ អភិបាលខណ្ឌមានជ័យ លោក ពេជ្រ កែវមុនី បានថ្លែងថា នេះជាលើកទី១មួយ ដែលលោកបានសហការ ជាមួយសមាគមន៍ សេដ្ឋកិច្ចក្រៅប្រព័ន្ធ (ក្រុមអ្នករត់កង់បី) រៀបចំពិធីសំណេះសំណាលនេះឡើង ដើម្បីអបអរពិធីបុណ្យចូលឆ្នាំថ្មី និងដើម្បីបង្កើនភាពស្និទ្ធស្នាល រួមជាមួយផ្សព្វផ្សាយពីគោលនយោបាយ របស់រាជរដ្ឋាភិបាល អាណត្តិទី៥នេះ។
លោក ពេជ្រ កែវមុនី បានបញ្ជាក់បន្ថែមទៀតថា ក្រៅពីនេះលោកក៏មានគម្រោង រៀបចំកម្មវិធីជួបជុំនេះ ជាបន្តបន្ទាប់ទៀត ពោលគឺធ្វើឡើងទាំង៧សង្កាត់ ស្ថិតនៅខណ្ឌមានជ័យ។ ម្យ៉ាងទៀតឆាប់ៗនេះលោកមានគម្រោង ធ្វើនៅសង្កាត់ចាក់អង្រែលើ ដើម្បីជាការជួបជុំបន្ថែមទៀត ផងដែរ៕
