(ព្រះសីហនុ)៖ ដើម្បីចូលរួមកាត់បន្ថយគ្រោះថ្នាក់ចរាចរណ៍ នៅលើដងផ្លូវនោះ នៅថ្ងៃទី៧ ខែមេសា ឆ្នាំ២០១៧នេះ កម្លាំងនគរបាល សហការជាមួយកម្លាំងអាវុធហត្ថ បានឆ្មក់ចូលទៅក្នុងកំពង់ផែស្វយ័តខេត្តព្រះសីហនុ ដើម្បីធ្វើតេស្តទឹកនោមរកសារធាតុញៀន របស់អ្នកបើករថយន្តកុងតឺន័រ ដែលជាចំណុចដើមទី។

ស្នងការនគរបាលខេត្តព្រះសីហនុ លោកឧត្តមសេនីយ៍ទោ ជួន ណារិន្ទ បានប្រាប់អង្គភាព Fresh News ថា «ថ្ងៃនេះស្នងការ​រងទទួលផែន ប្រឆាំងបទល្មើស បានដឹកនាំការិយាល័យនគរបាលប្រឆាំងគ្រឿងញៀន សហការជាមួយ​កងរាជអាវុធ​ហត្ថខេត្ត ដោយមានការសម្របសម្រួលពី លោកស្រីព្រះរាជអាជ្ញា បានចុះធ្វើតេស្តស្វែងរកសារធាតុញៀន​នៅលើតៃកុង​បើកបររថយន្តកុងតឺន័រ នៅកំពង់ផែស្វយ័តខេត្ត ដែលជាផ្នែកមួយ នៃការចូលរួម​កាត់បន្ថយអាត្រា​គ្រោះថ្នាក់ចរាចរណ៍ នៅតាមដងផ្លូវ»។

លោកឧត្តមសេនីយ៍ស្នងការ បានបញ្ជាក់ទៀតថា បន្ទាប់ពីការចុះត្រួតពិនិត្យទៅកម្លាំងសមត្ថកិច្ច រកមិនឃើញអ្នកមាន​សារធាតុញៀនោះឡើយ នេះដោសារតែពួកគេខ្លះដឹងខ្លួន បានគេចទៅបាត់ពេលកម្លាំងចូលទៅដល់ ដោយឃើញតែ​រថយន្តប៉ុណ្ណោះ។

លោកឧត្តមសេនីយ៍បានបញ្ជាក់យ៉ាងដូច្នេះថា «នេះជំហ៊ានទី១ របស់កម្លាំងជំនាញ តែរកមិនឃើញនោះទេ អ្នកដែលមានខ្លួន បានគេចខ្លួនបាត់ នៅសល់តែរថយន្ត តែក្រៅពីពិនិត្យនៅចំណុចដើមទីនេះ យើងនឹងបន្តពិនិត្យ​នៅតាមដងផ្លូវ (ចល័ត)បន្តទៀត ចឹងពួកគេដែលមានសារធាតុញៀន នឹងមិនអាចគេចនោះទេ»។

សូមបញ្ជាក់ថា គ្រោះថ្នាក់ចរាចរណ៍នៅតាមដងផ្លូវ ត្រូវបានមន្រ្តីជំនាញលើកឡើងថា គ្រោះថ្នាក់ខ្លះបណ្តាល​មកពីអ្នកបើករថយន្តមាន​សារធាតុញៀន ក្នុងខ្លួន រហូតកម្លាំងសមត្ថកិច្ច​រកឃើញប្រដាប់ជក់​គ្រឿងញៀន នៅក្នុងកន្លែងបើកទៀតផង ពេលជួបគ្រោះថ្នាក់ម្តងៗ៕