(ភ្នំពេញ)៖ ប្រមុខរដ្ឋស្តីទី នៃព្រះរាជាណាចក្រកម្ពុជា សម្តេចវិបុលសេនាភក្តី សាយ ឈុំ បានថ្លែងសូមអំពាវនាវឲ្យសាសនិកឥស្លាមទាំងអស់ ដែលមានឈ្មោះក្នុងបញ្ជីបោះឆ្នោតហើយ អញ្ជើញទៅបោះឆ្នោតឲ្យបានគ្រប់ៗគ្នា ដើម្បីជ្រើសរើសអ្នកដឹកនាំសង្កាត់អាណត្តិថ្មី ដែលមានសមត្ថភាព គុណភាព បទពិសោធន៍ការងារ ត្រូវបានប្រជាជនស្រឡាញ់រាប់អាន ជឿទុកចិត្ត និងគាំទ្រ។

ការថ្លែងអំពាវនាវខាងលើនេះ បានធ្វើឡើងព្រឹកថ្ងៃទី៦ ខែមេសា ឆ្នាំ២០១៧នេះ ខណៈសម្តេច សាយ ឈុំ បានជួបសំណេះសំណាលជាមួយ គណៈចលនាសាសនិកឥស្លាមកម្ពុជា។ នៅក្នុងពិធីសំណេះសំណាលនេះ សម្តេចប្រមុខរដ្ឋស្តីទី បានថ្លែងអំណរគុណចំពោះលោក អូស្មាន ហាសាន់ ប្រធានគណៈចលនាសាសនិកឥស្លាមកម្ពុជា ដែលបានរៀបចំឲ្យមានពិធីជួបជុំនេះឡើង។

ជាមួយគ្នានេះសម្តេច បានថ្លែងសរសើរដោយស្មោះចំពោះលោក អូស្មាន ហាសាន់ ដែលបានដឹកនាំគណៈចលនាសាសនិកឥស្លាមកម្ពុជា ដំណើរការទៅយ៉ាងរលូន មានប្រសិទ្ធភាព និងទទួលខុសត្រូវ។

សម្តេចក៏បានថ្លែងអំណរសរសើរ ចំពោះសាសនិកឥស្លាមកម្ពុជាទាំងអស់ ដែលបានគោរពប្រតិបត្តិយ៉ាងខ្ជាប់ខ្ជួន នូវធម៌វិន័យរបស់ព្រះអាឡាហ៍ រួមចំណែកដល់ការកសាងសុខដុមនីយកម្មជាមួយព្រះពុទ្ធសាសនា ដែលជាសាសនារបស់រដ្ឋ និងជំនឿ សាសនាផ្សេងៗទៀត ដែលមានវត្តមាននៅកម្ពុជា ដោយគ្មានការរើសអើង និងគ្មានជម្លោះសាសនា។

សម្តេចបានកោតសរសើរថា «សាសនិកឥស្លាមទាំងអស់ ដែលបានចូលរួមអនុវត្តនូវកម្មវិធីនយោបាយ របស់រាជរដ្ឋាភិបាលដែលមានយុទ្ធសាស្រ្ត ចតុកោណដំណាក់កាលទី៣ ជាឧបករណ៍ទ្រទ្រង់ នូវការអនុវត្តន៍កម្មវិធីនយោបាយនោះ សម្រេចបានលទ្ធផលល្អគួរជាទីមោទនៈ ធ្វើឲ្យកម្ពុជាយើង បានប្រែមុខប្រែមាត់ថ្មី ពី១ឆ្នាំ ទៅ១ឆ្នាំ»។

នៅក្នុងឱកាសនោះ សម្តេច សាយ ឈុំ បានអំពាវនាវឲ្យសាសនិកឥស្លាមទាំងអស់ ចូលរួមជាមួយអាជ្ញាធរ ភូមិ-សង្កាត់ ដើម្បីថែរក្សាសុខសន្តិភាព សន្តិសុខសណ្តាប់ធ្នាប់សាធារណៈ សំដៅបង្កលក្ខណៈសម្បត្តិឲ្យ គ.ជ.ប រៀបចំការបោះឆ្នោត នៅថ្ងៃទី៤ ខែមិថុនា ឆ្នាំ២០១៧ ប្រព្រឹត្តទៅក្នុងបរិយាកាសសន្តិភាព គ្មានអំពើហិង្សា មានលក្ខណៈ សេរី និងយុត្តិធម៌ ដែលទាំងអស់គ្នាអាចទទួលយកបាន៕