(ឧត្ដរមានជ័យ)៖ រថយន្តដឹកឈើគ្រញូងមួយគ្រឿង បម្រុងលោតឆ័ត្រចូលមកក្នុងទឹកដីខ្មែរ តែត្រូវសមត្ថកិច្ចប្រទេសថៃ​ចាប់បាន នៅរសៀលថ្ងៃទី៥ ខែមីនា ឆ្នាំ២០១៧នេះ ស្ថិតក្នុងទឹកដីថៃ មាត់ច្រកទ្វារអន្តរជាតិជាំសាង៉ាំ ។

សមត្ថកិច្ចបានឲ្យដឹងថា រថយន្តដឹកឈើគ្រញូងដែលសមត្ថកិច្ចប្រទេសថៃ ចាប់បានខាងលើនេះ ម៉ាកម៉ុងតេរ៉ូពាក់ស្លាកលេខ ភ្នំពេញ2P-4230 ដឹកឈើគ្រញូងចំនួន៣ដុំ​ ដែលមានមុខកាត់៣តឹក និងបណ្តោយ១.៥ម៉ែត្រ។ ដោយឡែកតៃកុងរថយន្ត បានរត់គេចខ្លួនចូលក្នុងទឹកដីខ្មែរបាត់ស្រមោល។

សមត្ថកិច្ចដដែលបានបន្ថែមទៀតថា ក្នុងហេតុការណ៍ចាប់ឈើគ្រញូងនេះ​ សមត្ថកិច្ចខ្មែរ នៅច្រកអន្តរជាតិជាំសាង៉ាំ បានត្រឹមតែឈរមើលទេ ​ព្រោះមិនមែនស្ថិតក្នុងទឹកដីកម្ពុជា៕