(សៀមរាប)៖ ក្រោមការណែនាំផ្ទាល់ពី លោក ម៉ក់ ពេជ្ជរិទ្ធ ប្រតិភូរាជរដ្ឋាភិបាល ទទួលបន្ទុកអគ្គនាយកដ្ឋានកាំកុងត្រូល នៅព្រឹកថ្ងៃទី០១ ខែមេសា ឆ្នាំ២០១៧នេះ សាខាកាំកុងត្រូលខេត្តសៀមរាប និងអាកាសយានដ្ឋានអន្តរជាតិសៀមរាប សហការជាមួយមន្ទីរពាណិជ្ជកម្ម បានបន្តចុះពិនិត្យ និងផ្សព្វផ្សាយ អំពីគុណភាព និងសុវត្ថិភាពម្ហូបអាហារ នៅតាមផ្ទះ ស្ថិតតាមបណ្តោយកំណាត់ផ្លូវរាជនី ក្នុងភូមិដកពោធិ សង្កាត់ស្លក្រាម ក្រុងសៀមរាប។
លទ្ធផលពិនិត្យ នៃការត្រួតពិនិត្យ គឺឃើញមានផលិតផលមួយចំនួនប្រែប្រួលខូចគុណភាព ហួសកាលបរិច្ឆេទប្រើប្រាស់ ហើយត្រូវបានសាខាកាំកុងត្រូលខេត្ត សៀមរាប ធ្វើកំណត់ហេតុដកហូតយកមករក្សាទុក ដើម្បីស្នើសុំគោលការណ៍កម្ទេចចោលនៅពេលក្រោយ។
មន្ដ្រីកាំកុងត្រូលដែលចូលរួមប្រតិបត្តិការណ៍នេះ បានឲ្យដឹងថា ទំនិញខូចគុណភាពដែលបានដកហូតរួមមាន ១១មុខ ដូចជា ទឹកក្រូចដបជ័រ, ទឹកភេសជ្ជៈOlatte, ទឹកភេសជ្ជៈSting, ភេសជ្ជៈAquarius, ស្រាបៀរអង្គរខ្មៅ, មីកញ្ចប់, ទឹកម្ទេស, ទឹកប្រេងខ្យង, ទឹកខ្មេះ, ទឹកស៊ីអ៊ីវ, ទឹកត្រី និងទឹកប្រេងខ្យង សរុប៦២.៨១គីឡូក្រាម។
ឆ្លៀតឱកាសនោះដែរ ក្រុមការងារក៏បានអប់រំ ចែកផ្សាយនូវរូបភាព Poster និងផ្សព្វផ្សាយដល់អាជីវករ អ្នកលក់ដូរ អ្នកប្រើប្រាស់ ឲ្យបានយល់ដឹងអំពីផលប៉ះពាល់ដល់សុខភាព ដែលបណ្តាលមកពីបរិភោគអាហារ ហួសកាលបរិច្ឆេទប្រើប្រាស់ផងដែរ៕
