(ពោធិ៍សាត់)៖ លោកស្រី ឯម ប៉ុណ្ណា សមាជិការដ្ឋសភា និងជាសមាជិកាអចិន្ត្រៃយ៍ សមាគមនារីកម្ពុជា ដើម្បីសន្តិភាព និងអភិវឌ្ឍន៍ នារសៀលថ្ងៃទី៣០ ខែមីនា ឆ្នាំ២០១៧នេះ បានជម្រុញឲ្យបណ្តាញ សមាគមនារីថ្នាក់ស្រុក ឃុំ និងភូមិ ត្រូវតែបង្កើនសមត្ថភាព ចូលរួមអភិវឌ្ឍន៍សង្គមជាតិ ពីព្រោះនារីគឺជាឆ្អឹងខ្នង សេដ្ឋកិច្ចសង្គម ដ៏សំខាន់មិនអាចខ្វះបាន ដោយហេតុថានារីជាកម្លាំងចលករ ឆ្ពោះទៅរកការអភិវឌ្ឍសេដ្ឋកិច្ច វប្បធម៌ ពាណិជ្ជកម្ម ឧស្សាហកម្ម កសិកម្ម និងទេសចរណ៍។

ការជម្រុញរបស់លោកស្រី ឯម ប៉ុណ្ណា ធ្វើឡើងក្នុងឱកាសអញ្ជើញជាអធិបតី ក្នុងពិធីប្រកាស និងទទួលស្គាល់ សមាសភាព បណ្តាញសមាគមនារីកម្ពុជា ដើម្បីសន្តិភាព និងអភិវឌ្ឍន៍ ២ស្រុកផ្សេងគ្នា ដែលក្នុងនោះថ្នាក់ភូមិ ៣១៥នាក់ មកពី១១ឃុំ ក្នុងស្រុកក្រគរ និងថ្នាក់ភូមិ ៤៥០នាក់ មកពី១០ឃុំ ក្នុងស្រុកបាកាន ដោយបានការអញ្ជើញចូលរួមពី លោកស្រី ហ៊ុន ចាន់ធី ម៉ៅ ធនិន ប្រធានកិត្តិយសសាខាសមាគមនារីខេត្ត លោក អេង គន្ធា អគ្គនាយករងអគ្គសនីកម្ពុជា និងជាអនុប្រធានក្រុមការងារចុះជួយស្រុកក្រគរ។

លោកស្រី ឯម ប៉ុណ្ណា បានបញ្ជាក់ថា ក្រោមការដឹកនាំប្រកបដោយគតិបណ្ឌិត របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានចាត់ទុកស្រ្តី គឺជាឆ្អឹងខ្នងសេដ្ឋកិច្ច របស់ប្រទេសជាតិ ព្រមទាំងបានគាំទ្រជួយជា ជំនួយទាំងសម្ភារៈ ស្មារតី ក្នុងន័យលើកកម្ពស់ តួនាទីស្រ្តី ឲ្យកាន់តែមានតម្លៃ។ លោកស្រីបានលើកទៀតថា ដោយយល់ឃើញថា ស្រ្តីជាត្បូងពេជ្រដ៏មានតម្លៃ និងកំពុងត្រូវបានចូលរួមចំណែកក្នុងការអភិវឌ្ឍន៍ សេដ្ឋកិច្ច សង្គមជាតិនេះហើយ បានជាកន្លងមកសម្តេចនាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកិត្តិយស សមាគមនារីកម្ពុជា ដើម្បីសន្តិភាព និងអភិវឌ្ឍន៍ តែងតែផ្តល់នូវកម្លាំង ស្មារតី និងសម្ភារៈដល់ក្រុមប្រឹក្សាជាតិកម្ពុជា ដើម្បីស្រ្តី ក្នុងការលើកកម្ពស់សីលធម៌សង្គម  តម្លៃស្រ្តីខ្មែរ និងគ្រួសារខ្មែរ គ្រប់បណ្តាក្រសួង មន្ទីរ អង្គភាព ឲ្យមានតម្លៃ និងមានលទ្ធភាព បំពេញភារកិច្ចរបស់ខ្លួនប្រកបដោយប្រសិទ្ធិភាព។

បច្ចុប្បន្ននេះ សាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ទូទាំងខេត្តពោធិ៍សាត់ បាននឹងកំពុងរៀបចំបង្កើត និងប្រកាសទទួលស្គាល់ជាផ្លូវការ នូវសមាសភាព សមាជិកភាពថ្នាក់ភូមិ បន្ទាប់ពីបានប្រកាសនូវសមាសភាព សមាជិកភាពថ្នាក់ស្រុក ថ្នាក់ឃុំរួចរាល់ ក្នុងគោលបំណងធ្វើឲ្យនារីនៅមូលដ្ឋាន បានយល់ដឹងអំពីសិទ្ធិ និងតួនាទីភារកិច្ចរបស់ខ្លួនក្នុងសង្គម ដើម្បីឈានទៅលុបបំបាត់ចោល នូវទស្សនៈកាលមើលស្រាល ខ្វះជំនឿជឿជាក់ខ្លួនឯង  បន្តខិតខំបង្កើនសមត្ថភាព និងយកអស់នូវកម្លាំងកាយចិត្ត ក្នុងការរួមចំណែកឲ្យបានទូលំទូលាយ ដើម្បីឈានទៅសម្រេចផែនការទាំងឡាយ ស្របតាមគោលការរបស់អាជ្ញាធរដែនដី ក៏ដូចរាជរដ្ឋាភិបាលកម្ពុជា។

នៅក្នុងពិធីប្រកាសនោះ លោកស្រី ហ៊ុន ចាន់ធី បានចែកជូនវត្ថុកំដរដៃ ដល់សមាជិកាថ្នាក់ភូមិសរុបទាំង២ស្រុក  ចំនួន៧៦៥នាក់ ក្នុងម្នាក់ៗទទួលបានសារុង១ ដែលជាអំណោយផ្ទាល់របស់ លោក ម៉ៅ ធនិន និងលោកស្រីផងដែរ៕