(ភ្នំពេញ)៖ លោក អឿត អាង ហៅ «ជួប សម្លាប់» ដែលជាឃាតកបាញ់សម្លាប់ លោកបណ្ឌិត កែម ឡី អ្នកវិភាគសង្គមនោះ នៅថ្ងៃពុធនេះ បានអះអាងថា លោកនៅមិនទាន់សម្រេចចិត្តនៅឡើយទេថា ត្រូវប្តឹងជំទាស់ទៅកាន់សាលាឧទ្ធរណ៍ឬទទួលយកសាលក្រមតុលាការដែលផ្តន្ទាទោសលោក ឱ្យជាប់ពន្ធនាគារអស់មួយជីវិត។ នេះបើតាម លោក យុង ផានិត មេធាវីការពារក្តីរបស់ លោក អឿត អាង។
លោក យុង ផានិត នៅព្រឹកថ្ងៃទី២៩ ខែមីនា ឆ្នាំ២០១៧នេះ បានទៅសួរសុខទុក្ខ លោក អឿត អាង ហៅជួបសម្លាប់ នៅក្នុងពន្ធនាគារព្រៃស ដើម្បីផ្តល់ការប្រឹក្សាផ្នែកច្បាប់ និងសាកសួរអំពីការសម្រេចចិត្តរបស់គាត់ថា ត្រូវប្តឹងជំទាស់ទៅសាលាឧទ្ធរណ៍ ឬក៏ទទួលយកការប្រកាសសាលក្រមរបស់តុលាការក្រុងភ្នំពេញ។
លោក យុង ផានិត បានបញ្ជាក់បន្ថែមថា បន្ទាប់ពីបានជួបពិភាក្សានោះ លោក អឿត អាង បានប្រាប់ លោក យ៉ុង ផានិតថា លោកសុំពេលគិតមួយរយៈ ហើយលោកនឹងផ្តល់ដំណឹងជូនតាមក្រោយ។
សូមបញ្ជាក់ថា កាលពីថ្ងៃទី២៣ ខែមីនា ឆ្នាំ២០១៧ សាលាដំបូងរាជធានីភ្នំពេញ បានប្រកាសសាលក្រមផ្តន្ទាទោសជនជាប់ចោទ អឿត អាង ហៅជួបសម្លាប់ ឱ្យជាប់ពន្ធនាគារអស់មួយជីវិត ពាក់ព័ន្ធឃាតកម្មលើ លោកបណ្ឌិត កែម ឡី នៅក្នុងស្តាម៉ាតបូកគោ កាលពីថ្ងៃទី១០ ខែកក្កដា ឆ្នាំ២០១៦។ លោក ជួប សម្លាប់ ត្រូវបានតុលាការក្រុងភ្នំពេញ ចោទប្រកាន់ចំនួន២បទល្លើសរួមមាន៖ បទឃាតកម្មគិតទុកជាមុន និងបទរក្សាទុកអាវុធខុសច្បាប់។
ក្នុងសវនាការជាបន្តបន្ទាប់នាពេលកន្លងទៅ ជនជាប់ចោទ អឿត អាង បានសារភាពថា ខ្លួនពិតជាអ្នកបាញ់សម្លាប់លោកបណ្ឌិត កែម ឡី ពិតប្រាកដមែន ហើយសកម្មភាពនេះគឺខ្លួនធ្វើតែម្នាក់ឯង ពុំមានអ្នកនៅពីក្រោយខ្នងនោះទេ បើទោះបីជាក្រុមគ្រួសារនៃសពមិនជឿក៏ដោយ។ ជនជាប់ចោទ ជួប សម្លាប់ អះអាងទៀតថា មូលហេតុដែលខ្លួនសម្លាប់លោកបណ្ឌិត កែម ឡី ព្រោះខឹងនឹងជនរងគ្រោះដែលជំពាក់ប្រាក់ចំនួន៣០០០ដុល្លារ មិនព្រមសង ទើបខ្លួនធ្វើសកម្មភាពបែបនេះតែម្តង។
ទោះជាយ៉ាងណា បន្ទាប់ពីប្រកាសសាលក្រម កាត់ទោសឃាតក ជួប សម្លាប់ អស់មួយជីវិតនោះ តុលាការក្រុងភ្នំពេញបានសម្រេចបំបែកសំណុំរឿងនេះ ទៅជាសំណុំរឿងថ្មីមួយទៀត ដោយប្រកាសបើកការស៊ើបអង្កេតទៅលើអ្នកផ្តល់អាវុធឱ្យ លោក អឿត អាង ដើម្បីសម្លាប់លោក កែម ឡី និងអ្នកដែលនាំឃាតក ជួប សម្លាប់ មកស្គាល់លោក កែម ឡី ផងដែរ។ នេះបើតាមការបញ្ជាក់របស់លោក យុង ផានិត៕
