(ក្រចេះ)៖ យ៉ាងហោចណាស់ មានមនុស្សម្នាក់ស្លាប់ និង៨នាក់ទៀត បានរងរបួសធ្ងន់ស្រាល ក្នុងហេតុការណ៍គ្រោះថ្នាក់​ចរាចរណ៍មួយ បង្កដោយរថយន្តហ៊ីយ៉ាន់ដាយ ជ្រុលទៅព្រលះរថយន្តតាកូម៉ាពេញទំហឹង នៅកំណាត់ផ្លូវជាតិលេខ៧៦A ស្ថិតនៅភូមិក្រញូងសែនជ័យ ឃុំក្រញូងសែនជ័យ ស្រុកស្នួល ខេត្តក្រចេះ។

មន្រ្តីនគបាលបានឲ្យដឹងថា ហេតុការណ៍នេះកើតឡើងនៅថ្ងៃទី២៧ ខែមីនា ឆ្នាំ២០១៧។ មុនពេលកើតហេតុ រថយន្តហ៊ីយ៉ាន់ដាយ ពាក់ស្លាកលេខ កំពង់ចាម 3A-0419 បើកបរដោយឈ្មោះ អោក ហាក់ រស់នៅភូមិព្រែកតាមូង ស្រុកមេមត់ ខេត្តត្បូងឃ្មុំ បានរងរបួសធ្ងន់ បញ្ជូនមកសង្គ្រោះនៅមន្ទីពេទ្យបង្អែកស្រុកស្នួល រួមដំណើជាមួយមនុស្ស៣នាក់ និងម្នាក់ទៀតត្រូវស្លាប់នៅនឹងកន្លែង បានជ្រុលទៅបុករថយន្តម៉ាកតាកូម៉ា ពាក់ស្លាកលេខ ភ្នំពេញ 2V-6120 បើកបរដោយឈ្មោះ គា សុភា មានទីលំនៅភូមិត្រពាំងហិត ឃុំដូនតឹង ស្រុកកំចាយមារ ខេត្តព្រៃវែង រងរបួសធ្ងន់ រួមដំណើមនុស្ស៣នាក់ទៀត។

ក្រោយកើតហេតុ រថយន្តទាំង២គ្រឿង ត្រូវបានកម្លាំងសមត្ថកិច្ចអូសយកទៅរក្សាទុក នៅអធិការដ្ឋាននគបាលស្រុកស្នួល រងចាំដោះស្រាយគ្នានៅពេលក្រោយ។ រីឯសាកសពត្រូវបានមន្រ្តីនគបាល ប្រគល់ជូនក្រុមគ្រួសារ និងសាច់ញាតិ យកទៅធ្វើបុណ្យតាមប្រពៃណី៕