(ភ្នំពេញ)៖ ចៅក្រមលោក តុប ឈុនហេង ប្រធានក្រុមប្រឹក្សាជំនុំជំរះសាលាដំបូងរាជធានីភ្នំពេញ នៅព្រឹកថ្ងៃទី២៧ ខែមីនា ឆ្នាំ២០១៧នេះ បានប្រកាសសាលក្រមផ្តន្ទាទោសជនជាប់ចោទ ដែលជាឃាតកសម្លាប់សិស្សស្រីថ្នាក់ទី១២ នៅវិទ្យាល័យពងទឹក ក្នុងខណ្ឌដង្កោ អស់មួយជីវិត ខណៈបក្ខពួក៦នាក់ផ្សេងទៀត ត្រូវផ្តន្ទោទោសដាក់ពន្ធនាគារចាប់ពីជាង២ឆ្នាំ ដល់៣០ឆ្នាំ។
ជនដៃដល់ដែលសម្លាប់នារីរងគ្រោះឈ្មោះ ជុំ វីរៈ អាយុ២២ឆ្នាំ ត្រូវតុលាការសម្រេចផ្តន្ទោទោសដាក់ពន្ធនាគារអស់មួយជីវិត ខណៈដែលបក្ខពួក២នាក់ទី១ឈ្មោះ ហុង សុជាតា អាយុ២១ឆ្នាំ និង២ឈ្មោះ លឹម បញ្ញវ័ន្ត អាយុ២២ឆ្នាំ ដាក់ពន្ធនាគារម្នាក់ៗ៣០ឆ្នាំ ក្រោមការចោទប្រកាន់ពីបទ «ឃាតកម្មគិតទុកជាមុន តាមមាត្រា២០០នៃក្រមព្រហ្មទណ្ឌ»។
ជាមួយគ្នានេះ តុលាការក៏បានបង្គាប់ឲ្យជនជាប់ចោទទាំង៣នាក់ សងសំណងទៅដើមបណ្តឹងត្រូវជាឪពុកម្តាយ ជនរងគ្រោះឈ្មោះ វ៉ុន រដ្ឋា ភេទស្រី អាយុ១៩ឆ្នាំ សិស្សថ្នាក់១២A (ស្លាប់) ចំនួន៤០លានរៀលផងដែរ។ ចំណែកជនជាប់ចោទ៤នាក់ទៀត រួមមានឈ្មោះ សុខ សុភាព អាយុ១៨ឆ្នាំ ឈ្មោះ សុខ សុភា អាយុ២២ឆ្នាំ ឈ្មោះ ឡេង ដានី ភេទស្រី អាយុ១៨ឆ្នាំ និងឈ្មោះ គ្រី ចន្ធូ ភេទស្រី អាយុ១៨ឆ្នាំ ត្រូវផ្តន្ទាទោសដាក់ពន្ធនាគារម្នាក់ៗ២ឆ្នាំ៦ខែ ក្រោមការចោទពីបទ «ទទួលផលចោរកម្ម និងសមគំនិតទទួលផលចោរកម្ម»។
គួរំលឹកថា កាលពីថ្ងៃទី១០ ខែឧសភា ឆ្នាំ២០១៦ សិស្សថ្នាក់ទី១២A នៃវិទ្យាល័យពងទឹកឈ្មោះ វ៉ុន រដ្ឋា អាយុ១៩ឆ្នាំ ត្រូវបានឃាតកសម្លាប់នៅក្នុងផ្ទះបាក់បែកគ្មានមនុស្សនៅមួយកន្លែងក្នុងភូមិព្រៃល្វា សង្កាត់ចោមចៅ ខណ្ឌពោធិ៍សែនជ័យ។
នៅថ្ងៃដដែលនោះ កម្លាំងនគរបាលខណ្ឌពោធិ៍សែនជ័យ និងកម្លាំងនគរបាលខណ្ឌដង្កោ បានចាប់ខ្លួនជនសង្ស័យ និងបក្ខពួកសរុប៧នាក់។ នាពេលសវនាការជនជាប់ចោទ ជុំ វីរៈ បានសារភាពថា រូពគេជាអ្នកញៀនថ្នាំជាច្រើនឆ្នាំហើយ លុះនៅថ្ងៃកើតហេតុ រូបគេបានប្រើប្រាស់គ្រឿងញៀននៅពេលព្រឹក ហើយនៅពេលថ្ងៃត្រង់ បានផឹកស៊ីជាមួយឈ្មោះ ហុង សុជាតា និងឈ្មោះ លឹម បញ្ញវ័ន្ត រហូតស្រវឹងវង្វេង។ ដោយសារគេជំពាក់លុយអ្នកផ្សេងចំនួន៧០ដុល្លារ គ្មានអ្វីសង រូបគេក៏បានហៅជនរងគ្រោះ វ៉ុន រដ្ឋា ដែលជាប្អូនជីដូនមួយមកជួប។ ក្រោយមកក៏បាននាំនាងទៅកាន់កន្លែងស្ងាត់ ហើយទាញដៃចូលក្នុងផ្ទះបាក់បែក រួចយកដុំឥដ្ឋវាយលើមុខចំនួន២ដង បណ្តាលឲ្យស្លាប់តែម្តង៕
