(ភ្នំពេញ)៖ ស្រ្តីម្នាក់ ដោយសារតែទ្រាំ និងការវាយតបពីប្ដីខ្លាំងពេក រហូតដល់គាត់ទ្រាំលែងបាន ក៏សម្រេចរត់ទៅប្ដឹងឲ្យនគរបាល ប៉ុស្ដិ៍ចោមចៅ ឲ្យជួយចាប់ខ្លួនបុរសជាប្ដីចាត់ការ តាមច្បាប់ និងបានសម្រេចចិត្តសុំលែងលះជាមួយគ្នានោះផងដែរ។
ហេតុការណ៍ខាងលើនេះ បានកើតឡើង កាលពីវេលាម៉ោង៣រសៀល ថ្ងៃទី២៣ ខែមីនា ឆ្នាំ២០១៧នេះ នៅក្នុងភូមិព្រៃស្វាយ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។
មន្ដ្រីនគរបាលបានឲ្យដឹងថា ស្រ្តីខាងលើនេះ ឈ្មោះ ពុធ មឿន អាយុ៤៣ឆ្នាំ ស្នាក់នៅក្នុងភូមិកើតហេតុ និងមានស្រុកកំណើតនៅភូមិ ព្រៃផ្ដៅ ឃុំសំបួរ ស្រុកទ្រាំង ខេត្តតាកែវ រីឯប្ដីឈ្មោះ ប៊ុន លាងប៉ូច អាយុ៣៦ឆ្នាំ មុខរបរកម្មករ សំណង់មាន ស្រុកកំណើត នៅខេត្ត កំពង់ចាម និងមានកូនប្រុសម្នាក់អាយុ៦ឆ្នាំ នៅក្នុងបន្ទុកគ្រួសារ។
តាមការរៀបរាប់ពីស្រ្តីខាងលើនេះបានឲ្យដឹងថា នាងនិងប្ដី បានរស់នៅជាមួយគ្នាជាប្ដីប្រពន្ធ ដោយមិនបានរៀបការ អស់រយៈពេលជាង ១០ឆ្នាំកន្លងមកហើយ ដោយប្ដីមានមុខរបរ ជាកម្មករសំណង់ ចំណែកនាងមានមុខរបរ ជាអ្នកលក់ពងទា។
ពេលនោះនាងនិងប្ដីបានស្រលាញ់គ្នាខ្លាំងណាស់ ប៉ុន្តែរយៈពេលឆ្នាំចុងក្រោយនេះ ចេះតែមានភាពរកាំរកូសជាមួយគ្នាជាបន្តបន្ទាប់ រហូតត្រូវប្ដីប្រើហិង្សាជាញឹកញាប់មកលើរូបនាង មិនតែប៉ុណ្ណោះ ឲ្យតែពេលខឹងបន្តិចបន្តួច លោកប្ដី បានវេចបង្វិចចាកចោលនាង បាត់មួយរយៈពេល លុះពេលនឹកឃើញចង់រកនាង។
ទើបវិលត្រឡប់ទៅរកនាងវិញ គឺធ្វើបែបនេះជាច្រើនលើកច្រើនសារ ដោយទ្រាំនិងទង្វើរនោះមិនបាន ទើបគាត់សម្រេចដាក់ពាក្យបណ្ដឹង សុំឲ្យនគរបាលចុះទៅឃាត់ខ្លួន ចាត់ការតាមច្បាប់ និងសុំលែងលះប្តីនោះចោល ឈប់យកទៀតហើយ សុខចិត្តនៅតែ២នាក់កូន វិញប្រសើរជាង។
ចំណែកបុរសជាប្ដី បាននិយាយថា គាត់និងប្រពន្ធ គឺចេះតែមានភាពរកាំរកូសនិងគ្នាពិតមែន ព្រោះខ្លួនប្រច័ណ្ឌប្រពន្ធ ដោយកាលពី២ ទៅ៣ឆ្នាំមុន ខ្លួនបានដឹងថាប្រពន្ធផិតក្បត់លួចលាក់ ទៅមានស្នេហាជាមួយប្រុសម្នាក់ទៀត ជាកូនប្រុសម្ចាស់ផ្ទះជួល ដែលមាន វ័យក្មេង ជាងរូបគេដែលជាប្ដីទៅទៀត។ ដោយសារតែបែបនេះហើយ ទើបធ្វើឲ្យគ្រួសារគ្មានសេចក្ដីសុខ និងមានទំនាស់គ្នា កើតឡើងជាហូរហែមកដល់សព្វថ្ងៃនេះ៕
