(ភ្នំពេញ)៖ លោក អេង ខេង ដែលទទួលបានការឧបត្ថម្ភ២៥,០០០ដុល្លារ ពីក្រុមហ៊ុន ខ្មែរ ប៊ែវើរីជីស លីមីតធីត ទៅវះកាត់ជំងឺមហារីកមាត់ដ៏ធ្ងន់ធ្ងរ នៅប្រទេសអូស្រ្តាលី តាមរយៈសមាគមន៍ចក្ខុកម្ពុជាអន្តរជាតិ បានវិលត្រឡប់មកដល់មាតុភូមិកម្ពុជាវិញហើយ នៅល្ងាចថ្ងៃទី២២ ខែមីនា ឆ្នាំ២០១៧ ក្រោមការអបអរសាទរពីបងប្អូន ញាតិជិតខាង និងក្រុមហ៊ុនឧបត្ថម្ភ។
អ្នកស្រី អ៊ុក ប៊ុនថា ដែលជាប្អូនថ្លៃ និងបានអញ្ជើញទៅទទួលលោក អេង ខេង ដល់ព្រលានយន្តហោះ រៀបរាប់ថា «ពេលខ្ញុំឃើញគាត់ដំបូង ខ្ញុំរំភើបចិត្តមែនទែន។ គាត់មានមុខមាត់ស្អាតបាត ហើយលើផ្ទៃមុខរបស់គាត់ បង្ហាញតែក្ដីរីករាយ ដែលយើងកម្រឃើញណាស់ពីមុនមក។ ពេលមកដល់ផ្ទះ នៅកំពង់ចាមព្រឹកមិញ អ្នកភូមិជាច្រើនបានមកអបអរគាត់ដល់ផ្ទះ។ ការវះគាត់បានផ្លាស់ប្ដូរជីវិតគាត់ ដែលធ្លាប់តែគេខ្លាច ធ្លាប់គេរើសអើង ក្លាយជាមនុស្សអាចចូលរួមក្នុងសង្គមបាន ដូចមនុស្សទូទៅដែរ»។
លោកវេជ្ជបណ្ឌិត ង៉ូវ ស្រ៊ុន ស្ថាបនិកសមាគមន៍ចក្ខុកម្ពុជាអន្តរជាតិ ឲ្យដឹងថា «ជំងឺមហារីកមានច្រើនប្រភេទ។ ករណីជំងឺមហារីករបស់លោក អេង ខេង នឹងមិនបន្តកើតជាថ្មីទៀតឡើយ បន្ទាប់ពីការវះកាត់នេះ ប្រសិនបើគាត់ទទួលទានថ្នាំតាមវេជ្ជបញ្ជា និងរបបអាហាររូបត្ថម្ភ ដែលយើងផ្ដល់ឲ្យ»។
នាយកផ្នែកទំនាក់ទំនង នៃក្រុមហ៊ុន ខ្មែរ បែវើរីជីស លីមីតធីត បណ្ឌិត អ៊ឹម សុធារិទ្ធ ថ្លែងថា ក្រុមហ៊ុន ខ្មែរបែវើរីជីស លីមីតធីត ពិតជាមានមោទនភាព ដែលបានចូលរួមផ្លាស់ប្ដូរជីវិតរបស់លោក អេង ខេង។
លោកបន្ថែមថា «ការឧបត្ថម្ភលោក អេង ខេង ទៅវះកាត់ជំងឺមហារីក នៅប្រទេសអូស្រ្តាលីនេះ គឺជាសកម្មភាពសប្បុរសមួយទៀត ដែលក្រុមហ៊ុនចង់ចូលរួម ជួយប្រជាពលរដ្ឋដែលគ្មានលទ្ធភាព ឲ្យទទួលបានឱកាសដូចគេដូចឯងដែរ។ ក្រុមហ៊ុនសប្បាយចិត្ត និងអបអរសាទរដល់លោក អេង ខេង ដែលទទួលបានការវះកាត់ជាសះស្បើយ និងត្រឡប់មកកាន់មាតុប្រទេសវិញ ដោយសុវត្ថិភាព»៕
