(ភ្នំពេញ)៖ ដើម្បីបង្ហាញពីសមានចិត្តជួយគ្នា និងជាសកម្មភាពមនុស្សជួយដល់សង្គម ក្រុមគ្រួសារតារាកម្ពុជា ដឹកនាំដោយលោក ផាត់ តារារដ្ឋ ស្ថាបនិកក្រុមគ្រួសារតារាកម្ពុជា បានសហការជាមួយតារាជាច្រើនរូបយកថវិកាមួយចំនួនជូន លោក សុវណ្ណ រិទ្ធី ហៅលោកតា វ៉ិចទ័រ អ្នកផលិតកម្មកម្មវិធីរបស់ CTN និង CNC ដើម្បីបន្តប្រគល់ជូនមន្ទីរពេទ្យគន្ឋបុប្ជា ខណៈដែលពិធីនេះ បានរៀបចំធ្វើឡើងក្នុងបរិវេណស្ថានីយទូរទស្សន៍ ស៊ីធីអិនឫស្សីកែវ នៅល្ងាចថ្ងៃទី២១ មីនា ឆ្នាំ២០១៧នេះ។
លោក ផាត់ តារារដ្ឋ ស្ថាបនិកក្រុមគ្រួសារតារាកម្ពុជា បានថ្លែងឲ្យដឹងថា សម្រាប់ថ្ងៃនេះ ថវិកាដែលយកមកប្រគល់ជូនលោកតា វ៉ិច ទ័រ មានចំនួន៥០០ដុល្លារ ដោយសមាជិកក្រុមគ្រួសារតារាកម្ពុជា រៃអង្គាសពីទឹកចិត្តសមាជិក បានប្រមាណមួយពាន់ដុល្លារ ហើយទុក៥០០ដុល្លារ ដើម្បីប្រើការក្នុងកម្មវិធីមនុស្សធម៌ផ្សេងៗទៀត។ សម្រាប់ថ្ងៃនេះយើងជូនបានតែ៥០០ទេ តែយើងនឹងបន្តរៃអង្គាសប្រាក់ តាមផែនការជួយសង្គមបន្តទៀតជាក់ស្តែង ដោយយើងបានមើលឃើញថា លោកតា វ៉ិច ទ័រ គាត់ប្រមូលប្រាក់បានច្រើនក្បែរ២០ម៉ឺនដុល្លារ ជួយមន្ទីរពេទ្យគន្ធបុប្ជាក្នុងឆ្នាំនេះ ទើបលោកនិងសមាជិកប្រគល់ជូនខាងលោកតា វ៉ិច ទ័រ តែម្តង ដើម្បីឲ្យគាត់បានចាត់ចែងជាបន្តទៀត។
លោកបន្តថា តាមរយៈការជួយគ្នារបស់តារាខ្មែរ កាន់តែធ្វើឲ្យមហាជនមើលឃើញថា តារាកម្ពុជាឥឡូវចេះរួបរួមគ្នា ធ្វើកិច្ចការសង្គមទោះតិចឬច្រើន។ លោកសូមឲ្យបន្តការងារទាំងនេះជាបន្តទៀត ដើម្បីមុខមាត់សិល្បៈទាំងអស់គ្នា។
ដោយឡែកលោកតា វ៉ិច ទ័រ ដែលបានរៀបចំធ្វើមូលនិធីប្រមូលថវិកា ជូនមន្ទីរពេទ្យ គន្ឋបុប្ជា បានឲ្យដឹងថា ឆ្នាំនេះក្រុមការងារកំប្លែងប្រចាំស៊ីធីអិន បានដើរប្រមែប្រមូលថវិកាជាច្រើន តាមបណ្តាខេត្តក្រុងនានា ដើម្បីធ្វើក្នុងគោលដៅជួយដល់ មន្ទីរពេទ្យគន្ឋបុប្ជាបន្តទៀត ដែលនេះជាលើកទី២។ បន្ទាប់ពីបានរៀបចំលើកទី១រួច យើងបានស្នើសុំមួយទៀត គឺធ្វើកម្មវិធីមួយទៀត ដែលមានឈ្មោះថា «យុទ្ធនាការនៃក្តីសង្ឃឹម» ដោយបានថវិកា យកទៅជីកស្រះជូនប្រជាពលរដ្ឋ ធ្វើបន្ទប់ទឹកដល់ក្មួយៗចសាលាមត្តេយ្យ និងសាលាបឋមសិក្សានៅតាមខេត្តស្រុកភូមិ ដែលក្រខ្សត់ បន្ទាប់មកគឺយើងបានជួយសាងសង់ នៅដំបូងសលារៀនដែលបាក់បែក។
អ្នកដឹកនាំកម្មវិធីទូរទស្សន៍ដ៏ល្បីរូបនេះ បានបន្តទៀតថា កម្មវិធី «កាបូបនៃក្តីសង្ឃឹម» មិនមានលទ្ធភាពជួយសិក្សានុសិស្ស ដែលមានចំនួនរាប់លាននាក់ ក្នុងប្រទេសយើងទេ ក្រោយមកយើងបានស្នើសុំក្រសួងអប់រំ ដោយធ្វើការជាមួយគ្នាដោយប្រគល់ កាបូបជូនសិស្សថ្នាក់ទី១ប៉ុណ្ណោះ។ នេះជាយុទ្ធនាការបន្តទៀត សម្រាប់ពេទ្យគន្ឋបុប្ជាយុទ្ធនាការទាំងអស់នេះសូមអរគុណ ដល់បងប្អូនប្រជាពលរដ្ឋ ដែលមានជំនឿជឿជាក់មកលើរូបលោក ក្រុមតារាកំប្លែងរបស់ CTN ដែលទុកចិត្តពួកយើងផ្តល់ថវិក ដើម្បីសម្រេចគោលដៅ ហើយដោយមានការអាណិតស្រឡាញ់ ទោះជាពួកយើងធ្វើការដើររៃអង្គាស ក្រោមពន្លឺថ្ងៃខ្លោចស្បែក ក៏ស៊ូទ្រាំ ដើម្បីតែការងារសង្គម ដែលជាសកម្មភាពមនុស្សធម៌ របស់យើង តែងតែធ្វើឡើងជាប្រចាំ៕
