(ភ្នំពេញ)៖ ក្រុមហ៊ុនខ្មែរ ប៊ែវើរីជីស លីមីតធីត ដែលជាក្រុមហ៊ុនផលិតស្រាបៀរកម្ពុជា បានបញ្ជូនរថយន្តសម្អាតផ្លូវ ធុនធ្ងន់ទាំងពីរគ្រឿង ទៅជួយសម្អាតផ្លូវនៅខេត្តស្ទឹងត្រែង ដើម្បីត្រៀមស្វាគមន៍ភ្ញៀវទេសចរណ៍មកកម្សាន្ត ក្នុងអំឡុងពេលបុណ្យទន្លេខាងមុខនេះ។
លោកឧកញ៉ា លាង ឃុន ប្រធានក្រុមអគ្គនាយកក្រុមហ៊ុនខ្មែរ ប៊ែវើរីជីស លីមីតធីតបានថ្លែងថា ក្រុមហ៊ុននឹងបញ្ជូនរថយន្តសម្អាតផ្លូវ ទៅខេត្តស្ទឹងត្រែងចំនួន១០ថ្ងៃ ដោយចាប់ផ្តើមពី ថ្ងៃទី២២ ខែមីនា ដល់ថ្ងៃទី០១ ខែមេសា ឆ្នាំ២០១៧។ លោកឧកញ៉ាបានបន្តថា «ខាងក្រុមហ៊ុនកំពុងពិភាក្សា ជាមួយអាជ្ញាធរខេត្ត និងស្ថាប័នពាក់ព័ន្ធនានា ដើម្បីកំណត់គោលដៅផ្លូវ ដែលត្រូវសម្អាតក្នុងក្រុងស្ទឹងត្រែង»។
សូមបញ្ជាក់ថា បុណ្យទន្លេ ឆ្នាំ២០១៧ ដែលរៀបចំដោយក្រសួងទេសចរណ៍ ត្រូវបានរៀបចំឡើងនៅខេត្តស្ទឹងត្រែង ចាប់ផ្តើមពីថ្ងៃទី២៤ ដល់ថ្ងៃទី២៦ ខែមីនា ឆ្នាំ២០១៧។ ក្រុមហ៊ុន ខ្មែរ ប៊ែវើរីជីស លីមីតធីត ជាអ្នកឧបត្ថម្ភធំផ្តាច់មុខ ការរៀបចំបុណ្យទន្លេឆ្នាំនេះ។
ខេត្តស្ទឹងត្រែង ជាគោលដៅទីពីរ ដែលរថយន្តសម្អាតផ្លូវរបស់ក្រុមហ៊ុន ខ្មែរប៊ែវើរីជីស បានទៅដល់ និងជួយសម្អាតផ្លូវក្នុងក្រុង នៅឆ្នាំ២០១៧នេះ។ ក្រោមយុទ្ធនាការ «ទីក្រុងស្អាត សុខភាពល្អ» ក្រុមហ៊ុននឹងបញ្ជូនរថយន្ត សម្អាតផ្លូវទាំងពីរគ្រឿង ទៅគ្រប់ខេត្តក្រុងរយៈពេលពេញមួយឆ្នាំ៕
